Pono ya Beibele

Na o Swanetše go Rapela Maria Kgarebe?

MARIA ke motho yo a tsebjago kudu ke batho ba bantši bao ba tsebago selo le ge e le sefe ka Bokriste. Mangwalo a bega gore Modimo Ra-matla-ohle o ile a šegofatša kgarebe ye ka mo go kgethegilego ka go e kgetha gore e be mmago Jesu. Matswalo a Jesu a be a kgethegile ka gobane Maria e be e le kgarebe ge a be a mo ima. Ke kgale dikereke tše itšego tša Bojakane di hlompha Maria ka tsela e kgethegilego. Ka 431 C.E., Lekgotla la Efeso le ile la mo tsebatša e le “Mmago Modimo,” gomme batho ba bantši lehono ba rutwa go mo rapela. *

Barapedi ba botegago ba tseba gore ba swanetše go lebiša dithapelo tša bona go motho yo a swanetšego. Ke eng seo Beibele e se rutago tabeng ye? Na Bakriste ba swanetše go rapela Maria Kgarebe?

“Re Rutê xo Rapêla”

Pego ya Ebangedi ya Luka e bega gore yo mongwe wa barutiwa ba Jesu o ile a mo kgopela ka gore: “Morêna, re rutê xo rapêla.” Jesu ge a fetola o thomile ka gore: “Xe Le rapêla Le re: [Tate, NW]! Leina la xaxo a le kxêthwê.” Thutong ya gagwe ya thabeng, Jesu o ile a laela barutiwa ba gagwe ka mo go swanago gore ba rapele ka gore: “Tata-wešo wa maxodimong! Leina la xaxo a le kxêthwê.”—Luka 11:1, 2; Mateo 6:9.

Ka gona, selo sa pele seo re ithutago sona ke gore thapelo, goba mantšu a borapedi a go bolela le Modimo, e swanetše go lebišwa go Tatago Jesu, e lego Jehofa. Ga go moo Beibele e re dumelelago go rapela motho le ge e le ofe. Se ke seo se swanetšego  ka gobane, bjalo ka ge Moše a ile a botšwa ge a be a amogela Melao e Lesome, Jehofa ke “Modimo yo a nyakago boineelo bjo bo feletšego.”—Ekisodo 20:5, NW.

Go Thwe’ng ka Rosari?

Ba bantši bao ba rapelago Maria ba rutilwe gore ditšhegofatšo di ka hwetšwa feela ka go boa-boeletša palo e itšego ya dithapelo tšeo di rulagantšwego ka tatelelano—dithapelo tše bjalo ka Tumišang Maria, Tatawešo le tše dingwe. Puku ya Symbols of Catholicism ge e bolela ka Makatholika e bontšha gore “sebopego seo se atilego kudu sa boineelo bja go ineela go Maria ka ntle le pelaelo ke rosari.” Rosari ke tirelo ya bodumedi ya go godiša Maria Kgarebe. Polelwana ye gape e šupa go thapo ya dipheta tšeo di dirišetšwago go bala dithapelo. Puku yona yeo e hlalosa gore: “Dithapo tše hlano tše di nago le dipheta tše lesome tšeo di arogantšwego ka pheta e fapanego, di nyaka gore motho a boeletše thapelo ya ‘Tumišang Maria’ ka makga a masome-hlano, ya ‘Tatawešo’ gahlano le ya ‘A go Tumišwe Tate’ gahlano.” Na Modimo o theetša dithapelo tše di dirwago ka hlogo tša rosari le go di amogela?

Le gona, ditaelo tšeo Jesu a di filego barutiwa ba gagwe di re fa karabo e kwagalago. O itše: “Xe Le rapêla, Le se kê la touta byalo ka ba dithšaba; xobane bôná ba re ba tlo kowa xe ba bola-bola tše ntši.” (Mateo 6:7) Ka gona, Jesu o boditše barutiwa ba gagwe ka go lebanya gore ba pheme go boa-boeletša mantšu a rulagantšwego ka tatelelano dithapelong tša bona.

Yo mongwe a ka botšiša gore: ‘Na Jesu ga a ka a ruta barutiwa ba gagwe go boa-boeletša thapelo ya Tatawešo, yeo e lego karolo ya rosari?’ Re swanetše go amogela gore Jesu o neile thapelo ya mohlala, yeo e tsebjago e le Tatawešo goba Thapelo ya Morena. Lega go le bjalo, re swanetše go ela hloko gore o dirile bjalo kapejana ka morago ga go fa keletšo ye e lego ka mo godimo malebana le go “touta.” Bohlatse bja gore Jesu ga a ka a rera gore thapelo ya mohlala e boa-boeletšwe ka hlogo bo bontšhwa gape ke go se swane ga dipolelo tšeo a di boletšego ditiragalong tše pedi tše di begilwego tšeo go tšona a rutilego barutiwa ba gagwe go rapela. (Mateo 6:9-15; Luka 11:2-4) Dikgopolo tšeo Jesu a di boletšego ditiragalong tšeo di be di swana, eupša mantšu a gagwe a be a sa swane. Se se re lebiša phethong ya gore Jesu o be a nea feela mehlala goba mehuta ya tsela yeo balatedi ba gagwe ba ka rapelago ka yona le ya seo ge e le gabotse ba ka se rapelelago. Sa bohlokwa le go feta, mantšu a gagwe a bontšhitše motho yoo a swanetšwego ke go rapelwa.

Go Hlompha Maria

Lebaka la gore Mangwalo ga a rute Bakriste go rapela Maria ga le bolele go se hlomphe tema yeo a e kgathilego ge go phethagatšwa merero ya Modimo. Ditšhegofatšo tšeo di tlago ka Morwa wa gagwe di tla ba le mehola ya ka mo go sa felego go batho ka moka ba kwago. Maria ka boyena o itše: “Meloko ka moka e tlo re ke yo lehlogonolo.” (PK) Motswala wa gagwe Elisabetha le yena o boletše gore Maria e be e le “Mošexofatšwa xare xa basadi.” Ruri o be a šegofaditšwe. Maria o be a hweditše tokelo e kgahlišago kudu ya go kgethwa gore a belege Mesia.—Luka 1:42, 48, 49.

Lega go le bjalo, Maria ga se mosadi a nnoši yo Mangwalo a mmitšago mošegofatšwa. Jaele le yena o ile a bitšwa “Mošexofatšwa xo basadi,” ka baka la megato yeo a ilego a e gata bakeng sa go hola setšhaba sa bogologolo sa Isiraele. (Baahlodi 5:24) Jaele le Maria ba ba botegago gotee le basadi ba bangwe ba bantši bao ba boifago Modimo ruri ba tloga ba swanelwa ke gore re ba ekiše—eupša e sego gore re ba rapele.

Maria e be e le molatedi yo a botegago wa Jesu. O be a le gona ditiragalong tše fapa-fapanego tša nakong ya bodiredi bja gagwe bja lefaseng gotee le lehung la gagwe. Ka morago ga tsogo ya Jesu o ile a “tiišetša xo rapêla” gotee le barwarre ba Jesu. Se se re nea lebaka la go dumela gore le yena o ile a tlotšwa ka moya o mokgethwa gotee le bona ka Pentekoste ya 33 C.E. Ka gona o be a e-na le kholofelo ya go ba karolo ya sehlopha sa monyadiwa seo se tlago go buša le Jesu legodimong.—Mateo 19:28; Ditiro 1:14; 2:1-4; Kutollo 21:2, 9.

Lega go le bjalo, tše ka moka ga di re nee tumelelo ya go rapela Maria. Thapelo e tšwago pelong ke selo seo se nyakegago borapeding gomme Bakriste ba kgothaletšwa ‘go se kgaotše go rapela.’ (Ba-Roma 12:12) Lega go le bjalo, boineelo bjo bjalo ka moka bja borapedi bo swanetše go lebišwa go Jehofa a nnoši, ka Jesu Kriste.—Mateo 4:10; 1 Timotheo 2:5.

[Mongwalo wa ka tlase]