Bafsa ba a Botšiša . . .

Nka Phema Bjang go Tlwaelana le Batho ba Itshwerego ka Tsela e Fošagetšego?

“Ke ile ka thoma go tlwaelana le ngwanenyana yo mongwe sekolong. . . . O be a sa diriše dihlare-tagi, a sa ye meletlong e sa laolegego e bile a sa itshware ka tsela e gobogilego. O be a sa rogane le ka mohla, gomme e be e le morutwana yo bohlale kudu ka klaseng. Eupša e be le mogwera yo mobe ka mo go feletšego.”—Beverly. *

KE KA BAKA LA’NG Beverly a ile a fihlelela phetho yeo go boletšwego ka yona ka mo godimo? Bjale o a lemoga gore ngwanenyana yo o mo tutueleditše gore a be le mekgwa e mebe. Beverly ge a hlalosa o re: “Ge ke tšwela pele ke tlwaelana le yena ke ile ka thoma go bala dipuku tša bonoge, ka ba ka ngwala le dikanegelo tšeo di bolelago ka bonoge.”

Mofsa yo a bitšwago Melanie o ile a goketšwa ke yo mongwe yo a ipolelago gore ke Mokriste-gotee le yena gore a itshware ka tsela e sa swanelago. O ka tseba bjang ge e ba motho yo mongwe e ka ba mogwera yo a nago le mekgwa e mebotse? Na go kotsi gore re itlwaelanye kudu le batho ba sa dumelego? Na bogwera bjo bo bago gona magareng ga Bakriste-gotee ga bo kotsi?

Ge e le gabotse, go thweng ka go gwerana le motho wa bong bjo bo sa swanego le bja gago? Ge e ba go e-na le motho yoo o mmeilego leihlo gore o ka nyalana le yena, o ka tseba bjang gore tswalano ya lena e ka ba e holago? Anke re bone gore melao ya motheo ya Beibele e ka re thuša bjang go araba dipotšišo tše bjalo.

Ke Bagwera ba Mohuta Ofe Bao e Lego ba Babotse?

Na taba ya gore morutwana-gotee le yena e be e se morapedi wa Modimo wa therešo e ka be e dirile gore Beverly a belaele ka taba ya go thoma bogwera le yena? Ke therešo gore Bakriste ba therešo ga ba fo  nagana gore motho ga se a loka goba o itshwere gampe feela ka baka la gore e se modumedi-gotee le bona. Eupša go nyakega gore re be šedi ge go tliwa tabeng ya go tlwaelana le bona kudu. Moapostola Paulo o ile a lemoša bao ba bego ba le phuthegong ya lekgolong la pele la nywaga ya Korinthe gore: “Bagwera ba babe ba senya mekgwa e mebotse.” (1 Ba-Korinthe 15:33, The Bible—An American Translation) O be a bolela’ng?

Go na le kgonagalo e kgolo ya gore ba bangwe ba Bakriste bao ba Korinthe ba be ba gwerane le Baepikure bao e lego balatedi ba radifilosofi wa mo-Gerika e lego Epikure. Epikure o be a ruta balatedi ba gagwe go phela ka bohlale, go ba le sebete, boitshwaro le toka. E bile o be a sa ba kgothaletše gore ba dire dilo tše di fošagetšego ka sephiring. Ka gona, ke ka baka la’ng Paulo a be a lebelela Baepikure gaešita le bao ba lego ka gare ga phuthego bao ba nago le dikgopolo tše di swanago le tša Baepikure gore ke “bagwera ba babe”?

Baepikure e be e se barapedi ba Modimo wa therešo. Ka ge ba be ba sa dumele gore bahu ba tla tsoga, ba be ba lebišitše tlhokomelo go thabeleng bophelo bja bona bja gona bjale. (Ditiro 17:18, 19, 32) Ka gona ga go makatše gore ka baka la go tlwaelana le batho ba bjalo, ba bangwe ka phuthegong ya Korinthe ba be ba thomile go se sa dumela gore bahu ba tla tsoga. Ke ka baka leo 1 Ba-Korinthe kgaolo 15—moo re hwetšago mantšu a Paulo a go lemoša ka bagwera ba babe—e huperego mabaka ao a bego a reretšwe go kgodiša gape Bakriste bao ba pele ka go ba ga kgonthe ga kholofelo ya tsogo.

Ke’ng seo re ka ithutago sona tabeng ye? Batho bao ba sa dumelego go Modimo le bona ba ka bonagatša dika tše dibotse. Eupša ge o ba kgetha gore e be bagwera ba gago ba paale, tsela yeo o naganago ka yona, tumelo le boitshwaro bja gago di tla kgomega. Ka gona lengwalong la gagwe la bobedi leo le yago go ba-Korinthe, Paulo o ile a re: “Le se kê la ba ba xo ikxokêla jokong e šele ya ba ba sa dumelexo.”—2 Ba-Korinthe 6:14-18.

Fred wa nywaga e 16 o ile a lemoga bohlale bjo bo lego mantšung a Paulo. Mathomong o ile a dumela go tšea karolo modirong wa sekolo wo o sa akaretšwego lenaneo-thutong woo o bego o akaretša go ya nageng e itšego e hlabologilego bakeng sa go ruta bana ba moo. Lega go le bjalo, ge yena le barutwana-gotee le yena ba lokišeletša leeto, Fred o ile a thoma go bona dilo ka tsela e fapanego. O re: “Ke ile ka bona gore go fetša nako e ntši ke e-na le bona go ka se nkhole moyeng.” Ka lebaka leo, Fred o ile a phetha ka gore a tlogele seo a bego a tla se dira gomme a thuše ka ditsela tše dingwe batho bao ba fokolago.

Go Gwerana le Bakriste-gotee

Lega go le bjalo, go thweng ka bagwera bao ba lego ka phuthegong ya Bokriste? Ge a be a ngwalela Timotheo wa lesogana, Paulo o ile a mo lemoša gore: “Ngwakong o moxolo dibya xa se tša xauta le tša silifêra fêla; le tsa phata le tša letsopa di xôna; tše dingwê ké tša xo neneketšwa; tše dingwê ké tša xo nyatšêxa. Byale xe motho a ka ila tše mpe ó tlo ba sebyana sa xo neneketšwa, sa xo kxêthêxa, sa xo kxahla mong wa ngwakô, se se tl’o xo dirišwa modirô o botse.” (2 Timotheo 2:20, 21) Ka gona Paulo ga se a fo okola ka godimo taba yeo e lego gona ya gore gaešita le gare ga Bakriste go ka ba le bao ba sa itshwarego gabotse. E bile o be a bolela ka go tšwa pelong ge a be a kgothaletša Timotheo gore a se tlwaelane le batho ba bjalo.

Na se se bolela gore o swanetše go belaela Bakriste-gotee le wena? Ga go bjalo. E bile ga se bolele gore o swanetše go letela gore bagwera ba gago ba se dire diphošo. (Mmoledi 7:16-18) Lega go le bjalo, taba ya gore mofsa o ba gona dibokeng tša  Bokriste goba o na le batswadi bao ba fišegago ka gare ga phuthego, ga e bolele gore e ka ba mo gobotse gore e be mogwera wa gago wa paale.

Diema 20:11 e re: “Le mošemanyana [goba ngwanenyana] ó lemoxwa ka medirô y’axwe, xe e le yo botse le yo boló.” Ka gona, e tla ba gabohlale gore o nagane ka se: Na motho yo o tšea tswalano ya gagwe le Jehofa e le selo se bohlokwa kudu bophelong bja gagwe? Goba mohlomongwe go na le bohlatse bja gore go nagana ga gagwe le mekgwa ya gagwe e bonagatša go ba le “môya wa lefase”? (1 Ba-Korinthe 2:12; Ba-Efeso 2:2) Na go ba le yena go godiša kganyogo ya gago ya go rapela Jehofa?

Ge e ba o kgetha bagwera bao ba ratago Jehofa kudu ba bile ba rata le dilo tša moya, o tla phema mathata e bile o tla hwetša matla a oketšegilego kudu a go hlankela Modimo. Paulo o ile a bolela le Timotheo gore: “Phêxêlêla tokô le tumêlô, le leratô le leaxô xa-mmôxô le ba ba rapêlaxo Morêna ka pelo-thsekexi.”—2 Timotheo 2:22, mongwalo o sekamego ke wa rena.

Go Gwerana le Batho ba Bong bjo bo sa Swanego le bja Gago

Ge e ba o gotše ka mo go lekanego gomme o nyaka go nyala goba go nyalwa, na o ile wa naganišiša ka kelohloko kamoo yona melao ye ya motheo e swanetšego go go hlahla tabeng ya go kgetha molekane wa gago? Go na le dilo tše dintši tšeo di ka go gogelago go motho yo o ka mo lebelelago e le molekane wa nakong e tlago, eupša go tšona ga go na yeo e lego bohlokwa go feta boemo bja motho yoo bja moya.

Ka baka leo, Beibele e lemoša leboelela mabapi le go nyalana le motho yo a sego “Moreneng.” (1 Ba-Korinthe 7:39; Doiteronomio 7:3, 4; Nehemia 13:25) Ke therešo gore batho bao e sego badumedi-gotee le rena ba ka no ba ba botega, ba hlwekile e bile ba tshwenyega ka ba bangwe. Lega go le bjalo, ga go na seo se ba tutueletšago gore ba tšwele pele ba hlagolela dika tše bjalo gomme ba be le manyalo a atlegilego.

Ka lehlakoreng le lengwe, motho yo a ineetšego go Jehofa e bile a mmotegela ka go se kwanantšhe o hlagolela ka go rata dika tša Bokriste gomme o a di šireletša go sa šetšwe seo se ka diregago. O a tseba gore Beibele e tswalanya go rata molekane wa gagwe le go ba le tswalano e botse le Jehofa. (Ba-Efeso 5:28, 33; 1 Petro 3:7) Ka gona, ge balekane ka bobedi ba rata Jehofa, ba ba le selo seo se ba tutueletšago ka matla gore ba dule ba botegelana.

Na se se bolela gore manyalo a badumedi-gotee a tiišeditšwe gore a tla atlega? Ga go bjalo. Ka mohlala, go be go tla direga’ng ge e ba o be o ka nyala motho yo a se nago kgahlego dilong tša moya? Ka ge a se a hlamelwa gore a ganetše dikgateletšo tša tshepedišo ye, motho yo a fokolago moyeng ke yena gantši yo a arogago ka phuthegong ya Bokriste. (Ba-Filipi 3:18; 1 Johane 2:19) Anke o nagane ka manyami le mathata a lenyalo ao o ka lebeletšanago le wona ge e ba molekane wa gago a tantšwe ke “dithšila tša lefase.”—2 Petro 2:20.

Pele o ka hlagolela tswalano yeo e ka lebišago lenyalong, nagana ka se: Na motho yo o bontšha maswao a gore ke motho wa moya? Na o bea mohlala o mobotse bophelong bja Bokriste? Na motho yo o tloga a tsemile medu ditherešong tša Beibele, goba na go nyakega gore a fiwe nako e oketšegilego gore a gole moyeng? Na o kgodišegile gore go rata Jehofa ke selo se segolo seo se nago le tutuetšo bophelong bja gagwe? Go tseba gore o na le botumo bja mohuta mang le gona go a thuša. Lega go le bjalo, mafelelong o swanetše go ba o kgodišegile gore motho yoo o mo kgahlegelago o ineetše go Jehofa e bile go bonagala a tla ba molekane yo kaone kudu.

Gopola gape gore batho ba bangwe bao ba kgahlegelago “batho ba babe,” ba thoma pele ka go kgahlegela dilo tše di fošagetšego tše bjalo ka mohuta o sa swanelago wa boithabišo goba dilo tše dingwe tše bjalo. Ge e ba o kgahlegela dilo tše bjalo, bafsa ba beago mohlala ka gare ga phuthego ya Bokriste ba ka se sepedišane le wena dilong tše dibjalo. Ka gona hlahloba pelo ya gago.

Ge e ba o lemoga gore pelo ya gago e nyaka go laiwa, o se ke wa felelwa ke kholofelo. Pelo e ka rutwa goba ya laiwa. (Diema 23:12) Ntlha e bohlokwa ke gore: Ge e le gabotse o nyaka’ng? Na o nyaka go gogelwa dilong tše dibotse le go bao ba di dirago? O ka kgona go hlagolela kganyogo e bjalo ka thušo ya Jehofa. (Psalme 97:10) Le gona ka go tlwaetša matla a gago a go nagana e le gore o kgethologanye se se nepagetšego le se se fošagetšego, o tla hwetša go le bonolo go lemoga bao ba tlago go ba bagwera ba holago le ba agago.—Ba-Hebere 5:14.

[Mongwalo wa ka tlase]

[Seswantšho go letlakala 13]

Bagwera ba babotse ba na le tutuetšo e holago ya moya