Lefase Leo le Arogantšwego ke Bohumi

KAROLONG ya bobedi ya lekgolo la bo-20 la nywaga, lefase le be le nweletše Ntweng ya Mantšu gomme le arogane go tša dipolotiki ka dikarolo tše tharo. Karolo ya lefase ya Makomanisi yeo e bego e eteletšwe pele ke Union of Soviet Socialist Republics le karolo yeo e sego ya Makomanisi yeo e bego e eteletšwe pele ke United States di be di arogantšwe ke Iron Curtain yeo e sa bonagalego. Ditšhaba tšeo e bego e se karolo ya tše tše pedi, di ile tša bopa seo go thwego ke dinaga tše di diilago, goba Third World.

Lega go le bjalo, ka morago polelwana “Third World” e ile ya lebelelwa e le tlhaloso ya lenyatšo gomme ya tšeelwa legato ka polelwana e rego “dinaga tše sa hlabologago.” Ge nako e dutše e e-ya, polelwana ye le yona e ile ya thoma go tšweletša dikgopolo tše di fošagetšego, e lego lebaka leo le dirilego gore ditsebi tša tša ditšhelete di thome go diriša polelwana e rego “dinaga tše hlabologago.” Ka go rialo polelwana ye e ile ya se sa lebiša tlhokomelo tseleng yeo dinaga tše di fapanego ka yona ka tša dipolotiki eupša ya e lebiša tseleng yeo di fapanego ka yona ka tša ditšhelete.

Ga bjale, lekgolong le la bo-21 la nywaga, lefase ga le sa arogantšwe ka dikarolo tše tše tharo. Lega go le bjalo, ge go tliwa tabeng ya tša ditšhelete le tša kgwebo, phapano magareng ga dinaga tše di hlabologilego le tše di hlabologago e sa dutše e bonala. Baeti bao ba tšwago dinageng tše di humilego ba sa dutše ba kopana le batho bao ba diilago bao ba katanelago go fepa malapa a bona.

Ka lebaka leo, go sa dutše go swanela gore re botšiše potšišo ye: Na lefase le tla tšwela pele le arogane ka tša ditšhelete goba na bahumi le badiidi ba ka kgona go thabela go ba le dilo tše di bonagalago ka go lekana?

[Mothopo wa Seswantšho go letlakala 19]

© Qilai Shen/Panos Pictures