Pono ya Beibele

Na Beibele e Kgetholla Basadi?

RATHUTATUMELO wa lekgolong la boraro la nywaga, Tertullian, o ile a hlalosa basadi e le “mojako woo diabolo a tsenago ka wona.” Ba bangwe ba dirišitše Beibele go hlalosa basadi e se ba bohlokwa gakaalo ge ba bapetšwa le banna. Ka baka leo, ba bantši ba nagana gore Beibele e kgetholla basadi.

Elizabeth Cady Stanton, e lego mosadi wa mathomo lekgolong la bo-19 la nywaga wa go lwela ditshwanelo tša basadi kua United States, o be a nagana gore “Beibele le Kereke e bile mapheko a magolo tseleng ya gore basadi ba hwetše tokologo.” Stanton o ile a bolela mabapi le dipuku tše hlano tša mathomo tša Beibele gore: “Ga ke tsebe dipuku tše dingwe tša go swana le tše tšeo di rutago ka mo go tseneletšego ka go bušwa le go nyenyefatšwa ga basadi.”

Le ge batho ba bangwe ba ka ba le dipono tše bjalo tše feteletšego, ba bantši ba sa dutše ba dumela gore dikarolo tše dingwe tša Beibele di thekga go kgethollwa ga basadi. Na phetho e bjalo e a kwagala?

 Tsela Yeo Basadi ba Lebelelwago ka Yona ka Mangwalong a Sehebere

“O tlo fêla O hloloxêlwa monna wa xaxo; ’me yêna ó tlo Xo buša.” (Genesi 3:16) Bahlahlobišiši ba dipuku ba šupa go mantšu a e le kahlolo ya Modimo go Efa le gona e le tumelelo ya Modimo ya gore basadi ba bušwe ke banna. Lega go le bjalo, go e na le go tsebatša merero ya Modimo, ao e be e le mantšu a nepagetšego a tsebatšago ka ditla-morago tše di nyamišago tša sebe le go ganetšwa ga bogoši bja Modimo. Go swarwa gampe ga basadi ga se thato ya Modimo, ke dipoelo tša go lebanya tša go se phethagale ga batho. Ditšong tše dintši, basadi gantši ba be ba dutše ba laolwa ke banna ba bona ka ditsela tše sehlogo. Eupša se e be e se morero wa Modimo.

Adama le Efa ba be ba bopilwe ka seswantšho sa Modimo. Go oketša moo, Modimo o be a ba neile taelo e swanago ya gore ba tswale, ba tlale lefase gomme ba le fenye. Ba be ba swanetše go šoma e le ngatana e tee. (Genesi 1:27, 28) Go molaleng gore ka nako yeo go be go se na yo a bego a tlaiša yo mongwe. Genesi 1:31 e re: “Modimo a lebêlêla tšohle tše a di dirilexo, a bôna e le tše botse kudu.”

Mabakeng a mangwe dipego tša Beibele ga di tšweletše pono ya Modimo tabeng e itšego. E ka no ba e le dipego feela tša histori. Pego ya ge Lota a nyaka go nea banna ba Sodoma barwedi ba gagwe ga e bolele selo kamoo Modimo a bego a ikwa ka gona ka seo goba ge e ba seo Lota a se dirilego se be se lokile. *—Genesi 19:6-8.

Ntlha ke gore Modimo o hloile dibopego ka moka tša tshwaro-mpe le kgobošo. (Ekisodo 22:22; Doiteronomio 27:19; Jesaya 10:1, 2) Molao wa Moše o be o thulana le go kata le bootswa. (Lefitiko 19:29; Doiteronomio 22:23-29) Bohlotlolo bo be bo ileditšwe gomme kahlolo ya bjona e be e le lehu go badiri ba bjona ka bobedi. (Lefitiko 20:10) Go e na le go kgetholla basadi, molao o be o ba godiša le go ba šireletša tlaišong ya phatlalatša yeo e bego e tlwaetšwe ditšhabeng tšeo di bego di ba dikologile. Mosadi wa sethakga wa mo-Juda o be a hlompšha e bile a tšeelwa godimo. (Diema 31:10, 28-30) Go palelwa ga ba-Isiraele ke go latela melao ya Modimo ya go bontšha go hlompha basadi e be e le phošo ya bona, e sego thato ya Modimo. (Doiteronomio 32:5) Mafelelong, Modimo o ile a ahlola setšhaba ka moka le go se otla ka baka la lenyatšo la sona la phatlalatša.

Na go Ikokobetša ke go Kgethollwa?

Mokgatlo ofe le ofe o ka šoma gabotse ge feela o e-na le thulaganyo. Seo se nyaka gore go be le matla a bolaodi. Ntle le moo e tla ba mathata. “Modimo xa se Modimo wa thlakathlakanô; ke Modimô wa moláô.”—1 Ba-Korinthe 14:33.

Moapostola Paulo o hlalosa molao wa lapa wa bohlogo ka gore: “Hlôxô ya monna mang le mang ké Kriste; ’me hlôxô ya mosadi ké monna; hlôxô ya Kriste ké Modimo.” (1 Ba-Korinthe 11:3) Motho yo mongwe le yo mongwe o ikokobeletša bolaodi bjo bo mo phagametšego, ke Modimo a nnoši yoo go se nago bolaodi bjo bo mo phagametšego. Na taba ya gore Kriste o na le hlogo e bolela gore o a kgethollwa? Ga go bjalo le gatee! Taba ya Mangwalo ya gore banna ba abetšwe go etelela pele ka phuthegong le ka malapeng ga e bolele gore basadi ba a kgethollwa. E le gore lapa le phuthego di atlege, go nyakega gore banna le basadi ba rwale boikarabelo bja bona ka lerato le tlhompho.—Ba-Efeso 5:21-25, 28, 29, 33.

Jesu o be a swara basadi ka tlhompho ka dinako tšohle. O ganne go latela ditšo le metlwae ya kgethollo yeo e bego e rutwa ke Bafarisei. O be a bolela le basadi bao e sego ba-Juda. (Mateo 15:22-28; Johane 4:7-9) O be a ruta basadi. (Luka 10:38-42) O be a šireletša basadi gore ba se hlalwe. (Mareka 10:11, 12) Mohlomongwe mogato o mogolo kudu wo o tšweleditšego diphetogo mehleng ya Jesu e bile wa gore a gwerane le basadi. (Luka 8:1-3) Bjalo ka ge Jesu e le mothofatšo yo a phethagetšego wa dika tša Modimo ka moka, o bontšhitše gore batho ka moka ba bong bjo bo sa swanego ba a lekana mahlong a Modimo. Ge e le gabotse, gare ga Bakriste ba mathomo bao ba ilego ba amogela mpho ya moya o mokgethwa go be go e-na le banna le basadi. (Ditiro 2:1-4, 17, 18) Go batlotšwa, e lego bao ba nago le tebelelo ya go ba dikgoši le baperisita gotee le Kriste, go ka se be le phapano ya bong gatee-tee ge ba tsošetšwa bophelong bja legodimong. (Ba-Galatia 3:28) Mongwadi wa Beibele e lego Jehofa, ga a kgetholle basadi.

[Mongwalo wa ka tlase]

[Seswantšho go letlakala 30]

Ka go fapana le batho ba bantši ba mehleng ya gagwe, Jesu o ile a swara basadi ka hlompho