Tharollo ya Kgonthe ya Bodiidi

BATHO ba dimilione tše makgolo lefaseng ka bophara ba katanela go phela letšatši le letšatši go sa šetšwe gore ba tloga ba topa tša fase. Go molaleng gore batho ba nyaka mmušo o lokilego le o se nago kgobogo woo o tlogago o kganyoga go fediša boemo bjo bja go hloka toka. Mmušo o bjalo o swanetše go ba o matla ka mo go lekanego gore o kgone go phethagatša merero ya wona. Na ke mo go kwagalago go lebelela gore batho ba tliše mmušo o bjalo?

Histori e hlatsela go rereša ga temošo ya Beibele e rego: “Se boteng maxoši e lexo bana ba batho, bao xo sexo phološô xo bôná.” (Psalme 146:3) Na o lemogile gore go bota mebušo ya batho goba baetapele ba yona gantši go feleletša ka manyami? Lega go le bjalo, ke mang yo mongwe yoo re ka retologelago go yena?

Ge e le gabotse, batho ba dimilione ba rapeletše mmušo o lokilego bakeng sa go rarolla boemo bja go hloka toka. Mohlomongwe le wena o ile wa rapela thapelo ya mohlala yeo Jesu a e rutilego: “Tata-wešo wa maxodimong! Leina la xaxo a le kxêthwê; Mmušô wa xaxo a o tlê; thatô ya xaxo a e dirwê mono lefaseng byalo ka xe e dirwa lexodimong; Re fê lehono boxôbê bya rena bya ka mehla; Re lebalêlê melato ya rena byalo ka xe re lebalêla ba ba naxo le melato xo rena; O se re išê molekong xomme O re phološê bobeng.”—Mateo 6:9-13.

Na wo ke Mmušo woo re o nyakago? Na o lokile e bile ga o na kgobogo? Na o matla ka mo go lekanego gore o phethagatše maikemišetšo a wona a mabotse? Ka ntle le pelaelo go bjalo! Modimo yo a theilego mmušo wo, “Tata-wešo wa maxodimong,” ke ‘Modimo wa toko le Mophološi’ yo a ‘yago ka toko medirong ya gagwe ka moka.’ (Jesaya 45:21; Daniele 9:14) Go thwe ka yena: “Mahlô a xaxo ké ma-ila-sebe,” ka gona re ka kgodišega gore mmušo wa gagwe o ka se be le kgobogo le ka mohla. (Habakuku 1:13) Le gona ka ge ‘Modimo a sa bebe motho eupša ditšhabeng ka moka a kgahlwa ke ba ba mmoifago ge ba dira se se lokilego,’ re a tseba gore o kgahlegela bophelo bja motho yo mongwe le yo mongwe mo lefaseng ka go se bebe sefahlego.—Ditiro 10:34, 35; Ba-Roma 2:11.

O Šetše o Theilwe e Bile o a Buša!

Gaešita le ge Mmušo wa Modimo o buša o le legodimong, o tla laola dilo mo lefaseng gore o phethagatše merero ya Modimo. Se se akaretša go tšeela mebušo ya batho e sa phethagalago legato ka mmušo o phethagetšego wa  Modimo. Go Daniele 2:44 re holofetšwa gore: “Mehleng ya dikxoši tšeo, ké mo Modimo a tl’o xo tsoša mmušô wo o ka se kexo wa šwalalanywa neng le neng, wo o ka se kexo wa selêla xo sethšaba se sengwê. O tlo phšatla mebušô e mengwê ka moka wa e fediša; xe e le wôna, o tlo êma xo ya xo ile.”

Mafelelong, thato ya Modimo e tla dirwa mono lefaseng le legodimong ka tlase ga taolo ya Mmušo wo. Ke mo go kgothatšago gakaakang go tseba gore wo ke mmušo o nago le matla a go fediša go se lekane le ge e le gofe mo go dirilego gore go be le batho bao ba humilego kudu le bao ba diilago kudu! Go ka se sa hlwa go e ba le batho ba sego kae bao ba humilego le ba bantši bao ba diilago.

Ke mo go kgothatšago kudu go tseba gore Mmušo wa Modimo wa legodimong o šetše o loketše go fedišetša sa ruri mathata a. Tatelano ya mabaka a Beibele le ditiragalo tša lefase di šupa 1914 ka go lebanya e le ngwaga woo ka wona Mmušo wa Modimo o theilwego legodimong. * Ka baka leo, Mmušo wo o be o dutše o thea motheo wa lefase le lefsa la go loka ka nywaga e nyakilego go ba e lekgolo.

Bao ba šetšego ba lemogile gore Mmušo wa Modimo o theilwe le bao ga bjale ka boikokobetšo ba latelago tlhahlo ya wona ga ba na kgethollo. Dihlatse tša Jehofa di dira modiro wa tšona wa boboledi mo e nyakilego go ba nageng ye nngwe le ye nngwe. Badudi ba dinageng tše ba newa sebaka sa go ithuta kamoo ba ka hwetšago bophelo bjo bo sa felego go sa šetšwe gore ke bahumi goba ke badiidi. (Johane 17:3) Boemo bja Dihlatse ka phuthegong ga bo laolwe ke lehumo goba bodiidi bja tšona. Batho ga ba ahlolwe go ya ka seo ba nago le sona. Go e-na le moo, ba hlompšha ka baka la seo ba lego sona. Tlhokomelo e kgolo e lebišwa dilong tša moya go e-na le dilong tše di bonagalago.

Na o ka rata go tseba gore ke bjang o ka phelago ka tlase ga mmušo wo wa go loka? Gona thoma go dira nyakišišo lehono. Ithute kamoo o ka bago le tebelelo ya go thabela go phela nakong yeo ka yona lefase le tla bego le se sa hlwa le arogantšwe ke bohumi.

[Mongwalo wa ka tlase]

 [Lepokisi/Diswantšho go letlakala 24, 25]

Ka Moka ke Barwarre go sa Šetšwe Gore ke Bahumi Goba ke Badiidi

▪ Mafelelong a Ntwa ya II ya Lefase, bontši bja Dihlatse tša Jehofa kua Yuropa le Asia di be di se na dijo, diaparo le mafelo a bodulo. Dihlatse tša dinageng tše dingwe di ile tša romela bana babo tšona ba moya ba kua Yuropa, Philippines le Japane ditone tša dijo le diaparo. Dihlatse tša United States le Canada di ile tša neela ka thoto ya tlhakodišo gore e romelwe Austria, Belgium, Czechoslovakia (yeo ga bjale e lego Czech Republic le Slovakia), Engelane, Finland, Fora, Gerika, Holland, Hungary, Italy, Jeremane, Poland, le Romania.

[Diswantšho]

United States

Switzerland

Jeremane

▪ Morago bjale, ka selemo sa 1994, sehlopha sa baithapi ba Dihlatse se tšwago Yuropa se ile sa akgofela go yo thuša bana babo sona le dikgaetšedi ba Bakriste ba Afrika. Ba ile ba lokišeletša gore go be le dikampa le mafelo a go alafa ao a rulagantšwego gabotse bakeng sa bafaladi ba ma-Rwanda. Go ile gwa romelwa diaparo, dikobo le dijo tše dintši kudu go akaretša le dikgatišo tše theilwego Beibeleng go thuša bafaladi ba fetago ba 7 000—e lego palo e nyakilego e feta ya Dihlatse tša Jehofa tšeo di bego di le gona ka nako yeo kua Rwanda ka makga a mararo.

 ▪ Nywaga e mebedi ka morago, ka 1996, go ile gwa tsoga ntwa ka karolong ya ka bohlabela ya Democratic Republic of Congo. Mašemo a ile a senywa, mafelo a go bolokela dijo a thubja gomme gwa fedišwa tsela le ge e le efe ya go romela dijo le ditlabakelo tše dingwe. Batho ba bantši ba be ba e-ja gatee feela ka letšatši, e lego seo se ilego sa baka phepo-mpe le malwetši a mangwe. Dihlatse tša Jehofa tša Yuropa di ile tša arabela ka pela. Sehlopha sa tlhakodišo sa Dihlatse, seo se bego se akaretša dingaka, se ile sa tla se swere dihlare le tšhelete. Ka June 1997, Dihlatse tša Belgium, Fora le Switzerland di be di šetše di neetše ka dihlare tša dikhilograma tše 500, ditone tše 10 tša dikuku tše nago le diprotheine tše dintši, ditone tše 20 tša mehuta e mengwe ya dijo, ditone tše 90 tša diaparo, dieta tše 18 500 le dikobo tše 1 000—tšeo di ilego tša bitša diranta tše nyakilego go ba dimilione tše 6,7.

▪ Ka ntle le go hlokomela batho ka dinyakwa tša nama, Dihlatse tša Jehofa di kgahlegela kudu go thuša batho dilong tša moya. Ke ka baka leo di nago le kganyogo ya go aga Diholo tša Mmušo gore di dirišwe bjalo ka mafelo ao go ona go ithutwago ka Modimo. Ka 1997 go ile gwa begwa gore: “Mokgatlo [wa Watch Tower] o kgonne go thuša go aga Diholo tše mpsha tša Mmušo tše 413 le go mpshafatša tše dingwe gape tše 727 ka nako ya dikgwedi tše nne feela dinageng tše sa swanego tše 75 ka thušo ya bana babo rena bao ba lego dinageng tše dingwe.” Ka 2003, go ile gwa begwa gore: “E nngwe ya dinaga tša Yuropa tšeo di holwago ke lenaneo la go thuša go aga Diholo tša Mmušo dinageng tšeo di diilago ke Romania, e lego moo go agilwego Diholo tša Mmušo tše 124 go tloga ka July 2000. Ukraine go agilwe Diholo tša Mmušo tše 61 ka ngwaga wa 2001 gomme ka 2002 gwa agwa tše dingwe gape tše 76 go dirišwa mokgwa o swanago wa go aga. Diholo tša Mmušo tše makgolo di ile tša agwa Bulgaria, Croatia, Macedonia, Moldova, Russia, Serbia le Montenegro ka thušo ya ditšhelete tšeo di neelwago Sekhwameng sa Diholo tša Mmušo.”

[Diswantšho]

Croatia

Bulgaria

Romania

[Seswantšho go letlakala 23]

Moithapi yo a hlokomelago ditšhiwana tše pedi tša bafaladi

[Mothopo]

© Liba Taylor/Panos Pictures

[Seswantšho go letlakala 26]

Dihlatse tša Jehofa di gaša molaetša wa kholofelo

[Seswantšho go letlakala 26]

Mmušo wa Modimo o tla fediša bodiidi