Go Kganyoga go Ratwa

Kgale-kgale kua motseng woo o lego nageng yeo lehono e bitšwago Turkey, go be go e-na le mosetsana yoo leina la gagwe e bego e le Lea. Lea e be e se yo mobotse gakaalo, eupša moratho’agwe e lego Ragele, o be a le botse.

RAGELE o ile a hwetša monna yo a bego a mo rata kudu yo a ilego a dumela go šomela tatagwe ka nywaga e šupago e le gore a mo nyale. Lega go le bjalo, bošegong bja letšatši la lenyalo tatago banenyana ba o ile a nea monna yo Lea go e-na le go mo nea Ragele. Ga re tsebe gore Lea o ile a ikwa bjang ka boradia bja tatagwe, eupša ga go pelaelo gore o be a tseba gore ye ga se tsela e botse ya go tsena lenyalong.

Monna yoo o ile a galefa ge a se na go lemoga seo se diregilego. Tatago banenyana o ile a hlalosa gore ka tlwaelo motseng wa gabo go nyadišwa morwedi yo mogolo pele. Ka baka leo, Lea o ile a ikhwetša a nyalane ka boradia le monna yoo ge e le gabotse a bego a rata moratho’agwe le yoo mafelelong a ilego a mo nyala. Lea o swanetše go ba a ile a nyama gakaakang ge a bona gore moratho’agwe o ratwa go feta yena! Lea ga a ka a ba le nako e thabišago ya lefereyo goba letšatši le le kgahlišago la lenyalo. O swanetše go ba a be a hlologela gakaakang go ratwa ka tsela yeo Ragele a bego a ratwa ka yona! Ka gona, Lea o swanetše go ba a ile a ikwa a sa ratwe e bile a hloilwe, mohlomongwe ka baka la maemo ao a bego a ka se kgone go a laola. *

Batho ba bantši lehono ba ikwa ka tsela yeo Lea a bego a ikwa ka yona go ya bokgoleng bjo itšego. Ka moka ga rena re na le kganyogo e matla ya go rata motho yo mongwe le go nyaka go ratwa. Mohlomongwe re hlologelwa go ba le balekane bao ba tlago go re rata. Le gona re nyaka go ratwa ke batswadi ba rena, bana ba rena, dikgaetšedi tša rena le bagwera ba rena. Go etša Lea, re ka bona ba bangwe ba ratwa eupša rena re sa ratwe.

Go tloga re sa le ba banyenyane, re kwa dikanegelo tša lerato tša batho ba babotse bao ba ratanago gomme ba phela ka lethabo go ya go ile. Diopedi tša mmino di opela ka lona gomme direti di reta ka lona. Lega go le bjalo, monyakišiši yo mongwe wa lerato o ngwadile gore: “Ga go modiro goba selo le ge e le sefe seo se thongwago ka kholofelo le maikemišetšo a magolo, eupša seo ka mehla se folotšago go swana le lerato.” Ka kgonthe, gantši ke ditswalano tša rena le batho bao re ba ratago tšeo di re bakelago kgateletšego—di re tlišetša tlaišego go e na le lethabo la sa ruri. Dinageng tše dintši, mo e ka bago 40 lekgolong ya manyalo ka moka ga bjale a feleletša ka tlhalo gomme banyalani ba bantši bao ba sa hlalanego ga se ba thaba le gatee.

Dinageng tše dintši go šetše go e-na le malapa a mantši a motswadi o tee le malapa ao a se nago lerato ao bana bao ba golelago go ona ba bilego bahlaselwa. Lega go le bjalo, bana ka mo go kgethegilego ba nyaka go šireletšwa maikwelong, e lego tšhireletšego yeo ba ka e hwetšago lapeng le nago le borutho le lerato. Ka gona, go diragetše’ng ka lerato? Ke kae moo re ka ithutago gona ka seka se se se kgahlišago? Dihlogo tše di latelago di tla araba dipotšišo tše.

[Mongwalo wa ka tlase]