Go ba le Matla a Bofsa ka mo go sa Felego!

MONNA yo a bego a kokotetšwe kgaufsi le Jesu o be a tla tloga a e-hwa. O ile a kgopela a re, “Jesu, o nkgopole ge o tsena mmušong wa gago.” Jesu o ile a mo araba ka gore: “Ruri ke go botša lehono, o tla ba le nna Paradeiseng.” (Luka 23:42, 43) Ke therešo gore monna yo yo re sa tsebego leina la gagwe o be a sa bolawe ke bolwetši goba botšofadi, o be a bolaelwa mediro ya gagwe ya bosenyi. Lega go le bjalo, batšofadi ba ka hwetša kgothatšo e kgolo boemong bja gagwe bjo bo hlomolago pelo.

Ruri re tutueletšega go reta monna yo ka baka la kgodišego ya gagwe e kgolo! Gaešita le ge Jesu a be a e-hwa koteng ya tlhokofatšo, monna yoo a bego a le kgaufsi le yena ruri o be a sa belaele gore Jesu o tla buša bjalo ka Kgoši Mmušong wa Modimo. Le gona, o ile a nagana gore Jesu a ka mo gopola ’tšatši le lengwe. Akanya feela—monna yola yo a rogakilwego o tlo tsogela paradeiseng e kgahlišago yeo Kgoši ya yona e tla bego e le Jesu!

Batho ba boemong bjo bo swanago le bja sesenyi sela seo se bego se tla tloga se e-hwa. Ka tsela efe? Go sa šetšwe gore re na le nywaga e mekae, ka moka ga rena re lefa kotlo ya sebe gomme re nyaka phološo. (Baroma 5:12) Go etša sesenyi sela, re ka hwetša kholofelo go Kriste Jesu—kholofelo ya go imologa mathateng ao a kwešago bohloko ao a bago gona nywageng ya botšofadi! Ge e le gabotse, Jesu o neile batho kholofelo ya go phela ka mo go sa felego ba e-na le mebele le menagano e phethagetšego paradeiseng mo lefaseng.—Johane 3:16, 36.

Dilo ka Moka e ba tše Difsa Bakeng sa Batšofadi le ba Bafsa

Ka tlase ga Mmušo wa Kriste baagi ba lefase “ba tlo thaba ka botlalô bya moláô.” (Psalme 37:11) Ga go motho yo a tlago gore: “Ke a babya.” (Jesaya 33:24) Bofokodi le ge e le bofe bjoo re ka bego re ile ra swanelwa ke go bo kgotlelela bo tla fedišwa ka gobane ‘digole di tlo taboga bo-ka tshepe, gomme leleme la semuma le tlo hlalala.’ (Jesaya 35:6) Batšofadi ba tla ba le matla a bona a bofsa gape gomme nama ya bona ‘e tlo etša mola e sa le ba bafsa.’—Jobo 33:25.

 Lega go le bjalo, na go a kwagala go ba le kholofelo e bjalo? Nagana ka Yoo a neilego monna yo a hwago kholofelo ya Paradeise. Ka dinako tše dintši mašaba a be a tliša dihlotša, digole, difofu le difoa go Jesu. Ka go rata o ile a fodiša “mohuta o mongwe le o mongwe wa bolwetši le mohuta o mongwe le o mongwe wa bofokodi.” (Mateo 9:35, 36; 15:30, 31; Mareka 1:40-42) O neile bohlatse bjo bo lego molaleng bja seo Mmušo wa gagwe o tlago go se dira. Jesu o ile a ba a tsoša batho ba mmalwa bao ba bego ba hwile. (Luka 7:11-17; Johane 11:38-44) Ka go dira bjalo o ile a kgonthišetša kholofetšo ya gagwe ya gore ‘bohle bao ba lego mabitleng a kgopotšo ba tla kwa lentšu la gagwe gomme ba tšwe.’—Johane 5:28, 29; Ditiro 24:15.

Akanya feela o tsoga Paradeiseng o e-na le mmele o mofsa, o kgona go bona gabotse, ditsebe di e-kwa melodi ya dinonyana le medumo ya mantšu a batho ba thabilego, matsogo le maoto a se sa opa gomme o e-na le monagano o šomago gabotse. “Matšatši a mabe” a botšofadi a tla be a feletše sa ruri. (Mmoledi 12:1-7; Jesaya 35:5, 6) Gaešita le lehu le tla be le ‘fedišitšwe’—le tlo “meletšwa sa ruri.”—1 Bakorinthe 15:26, 54.

Ditiragalo tša gona bjale tša lefase ge di bapišwa le boporofeta bja Beibele di bontšha gore re batamela ka lebelo bofelong bja botšofadi go etša ge re bo tseba. (Mateo 24:7, 12, 14; Luka 21:11; 2 Timotheo 3:1-5) Nako ya gore batšofadi bao ba bontšhitšego tumelo go Modimo gomme ba mo hlankela ba be le matla a bofsa gape e kgaufsi—eupša mo nakong ye e tla ba ka mo go sa felego!

[Lepokisi/Seswantšho go letlakala 9]

Tlwaetša Bjoko bja Gago.

Go fo etša ge go itšhidulla mmele go tiiša mešifa, go tlwaetša monagano go tiiša bjoko. E le gore re tlwaetše bjoko, re swanetše go ithuta dilo tše difsa. Dintlha tše di latelago ke ditšhišinyo tša kamoo o ka theago le go matlafatša kgokagano ya bjoko le dikwi.

▪ Hlagolela kgahlego ya go dira mediro e mefsa e bjalo ka bokgabo, go betla, dipapadi tša go aga mantšu o diriša ditlhaka, di-jigsaw le di-crossword puzzle; ithute leleme le lengwe.

▪ Tlwaelana le batho ba go fapa-fapana; gwerana le bona gaešita le go boledišana le bona e le gore o pheme go dira modiro o swanago ka mehla gomme o kaonefatše monagano wa gago.

▪ Hlagolela boemo bja moya. “Le se ke la belaela ka selo, eupša dilong tšohle tsebišang Modimo dikgopelo tša lena ka thapelo le ka topo gotee le ka go leboga; gomme khutšo ya Modimo ye e fetago kgopolo yohle e tla diša dipelo tša lena le matla a lena a monagano ka Kriste Jesu.”—Bafilipi 4:6, 7.

▪ Bala ditaba tše di swanelegago gomme o botše ba bangwe ka seo o se badilego.

▪ Gopola ditaba tšeo o di kwelego radiong goba o gopole ditaba tšeo o di bonego thelebišeneng gomme o di anegele ba bangwe e le gore o kaonefatše matla a gago a go gopola dilo tšeo o sa tšwago go di bona le tšeo e lego kgale o di bone.

▪ Diriša letsogo la gago leo le sego matla kudu (le letshadi ge e ba o diriša la le letona goba le letona ge e ba o diriša le letshadi) go šomiša remote control ya thelebišene, go diriša mogala goba go hlapa meno.

▪ Diriša dikwi tša gago ka moka ka gohle kamoo o ka kgonago letšatši ka moka.

▪ Ithute ka mafelo a kgahlišago a kgole le kgaufsi gomme o a etele.

[Seswantšho go letlakala 8, 9]

Kholofetšo ya Jesu ke gore botšofadi bjo bo kwešago bohloko bo tla fedišwa kgaufsinyane, bo tšeelwe legato ke matla a bofsa ao a tlago go ba gona ka mo go sa felego