Kamoo o ka Hwetšago Lerato la Kgonthe

Ke’ng seo o swanetšego go se dira e le gore o be le lerato gomme o ratege kudu, e sego feela ka kgopolo ya go kgahlegela batho ba bangwe? Na o swanetše go ba le tšhelete e ntši? Na o swanetše go kaonefatša ponagalo ya gago?

BANNA le basadi, bao ba forilwego ke dipapatšo le mekero ya ditaba, gantši ba amogela dipakane tše bjalo e le dilo tšeo di ka thušago motho go hwetša lerato. Ke therešo gore ke ga tlhago le mo go swanetšego go tshwenyega ka ponagalo ya rena, eupša bobotse—bjoo ge e le gabotse e lego bja lebakanyana—ga se motheo wa tlemo e swarelelago. Go bjalo le ka tšhelete. Go rata ba bangwe ka go tšwa pelong ke gona go thušago. Jesu o rutile gore: “Tlwaelang go fa, gomme batho ba tla le fa.” (Luka 6:38) Mantšu a a bolela gore ge e ba o nyaka go ratwa, rata ba bangwe.

Re ka dira se bjang? Moapostola Paulo o arabile potšišo ye ge a be a ngwala a le ka tlase ga tlhahlo ya moya wa Modimo o mokgethwa. O utolotše gore lerato le mafolofolo e bile ga le bonagatšwe ke maikwelo a motho eupša le hlaolwa kudu ka seo le se direlago ba bangwe goba seo le ba thibelago go se dira. Ela hloko mantšu a Paulo: “Lerato le na le bopelotelele e bile le botho. Lerato ga le hufege, ga le ikgantšhe, ga le ikgogomoše, ga le dire tša go leša dihlong, ga le nyake tša go ikhola, ga le rumolege. Ga le boloke pego ya bobe. Ga le thabele go se loke eupša le thaba le therešo. Le tiišetša tšohle, le dumela tšohle, le holofela tšohle, le kgotlelela tšohle.”—1 Bakorinthe 13:4-7.

O ikwa bjang ge motho yo mongwe a go swara ka botho goba a go amogela go sa šetšwe mantšu a sa kgahlišego ao o ka a bolelago goba dilo tše sa kgahlišego tšeo o ka di dirago? Na ga o kgahlegele motho yo a kgomegilego ka wena e le ka kgonthe, yo a sa galefego gabonolo, yo a swarelago le yo a bolelago therešo gaešita le ge go swarela le go botega go se bonolo?

Ka gona, swara batho ba bangwe ka yona tsela yeo. Jesu o itše: “Ka baka leo, dilo tšohle, tše le nyakago batho ba le dira tšona, le lena ka mo go swanago le ba dire tšona.” (Mateo 7:12) Ga se ka mehla go lego bonolo go  rata batho ba bangwe, eupša re ka se ke ra itsholela boiteko bjoo re ka bo dirago. Sa pele, o tla ratwa kudu ke ba lapa leno, bagwera, molekane wa gago wa lenyalo goba motho yo o nyakago go nyalana le yena. Le gona, o tla hwetša lethabo leo le tlišwago ke go dira selo se se swanetšego ge o ikgafa bakeng sa ba bangwe. Ee, “Go na le lethabo le legolo go neeng go feta go amogeleng.”—Ditiro 20:35.

Ithute go Rata ba Bangwe go tšwa Mothopong o Phagamego Kudu wa Tsebišo

Jehofa ke Modimo wa lerato, mothopo o phagamego kudu wa tsebišo tabeng ya lerato. (1 Johane 4:8) Lerato la gagwe le mo tutueletša gore a rute seka se go bohle bao ba ikemišeditšego go ithuta. Ela hloko mehlala e sego kae ya melao ya motheo ya Beibele yeo e re thušago go ba le lerato le gore re ratege.

‘Akgofela go kwa gomme o diege mabapi le go bolela.’ (Jakobo 1:19) Nyakišišo yeo e dirilwego go banyalani ba 20 000 e bontšhitše gore batho ba thabilego kudu ke bao balekane ba bona ba theetšago gabotse. Poledišano e botse ke ya bohlokwa tswalanong ya lerato. Moprofesa wa tša leago o ngwadile gore: “Ge e ba o nyaka go se thabele tswalano ya lerato, ratana le motho yo a sa tsebego selo ka mathata a gago. Goba se sebe le go feta, ratana le motho yo a tsebago mathata a gago eupša a sa kwešiše gore ke ka baka la eng mathata ao e swanetše go ba taba e kgolo gakaaka.” O oketša ka gore gaešita le ge batho ba babedi ba fapane ka ditsela tše dintši, “ge e ba molekane wa gago a kwešiša tsela yeo o bonago dilo le go di kwešiša ka yona, go se swane moo ga e be bothata bjo bogolo.”

“Le pitlagane maikwelong a lena a borutho a bonolo. . . . Katologang.” (2 Bakorinthe 6:12, 13) Go katološetša lerato la rena go ba bangwe go tliša mehola. Puku ya Harvard Medical School e re: “Dinyakišišo tše dintši di bontšhitše gore batho bao ba hwetšago thekgo—ke gore, bao ba nago le ditswalano tše dibotse le malapa a bona, bagwera, le setšhaba—ba thabile kudu, ga ba no tsena-tsenwa ke malwetši e bile ba phela nako e telele.”

“A re naganelaneng gore re hlohleletšaneng leratong le medirong e mebotse.” (Baheberu 10:24, 25) Bagwera ba rena ba na le tutuetšo go rena. Ge e ba o gwerana le bao ba nago le lerato la kgonthe la Bokriste, o tla ithuta go tšwa go bona seo lerato le e lego sona gomme wa ithuta kamoo o ka le bontšhago bophelong bja gago. Dihlatse tša Jehofa di katanela go bontšhana lerato le, ka ge di tseba gore ke leswao leo le hlaolago barutiwa ba therešo ba Jesu. (Johane 13:35) O laletšwa ka borutho gore o be gona dibokeng tša bona tša Bokriste.

Ge e ba o ikwa o sa ratwe, o se ke wa nyama goba wa ikahlola o šoro. Dula o gopola gore Jehofa o bona boemo bja gago. Na o sa gopola Lea yo go boletšwego ka yena sehlogong sa mathomo sa lelokelelo le la dihlogo? Jehofa o ile a lemoga boemo bja gagwe gomme a ba le barwa ba tshela le morwedi o tee, e lego tšhegofatšo e botse mehleng yeo bana ba bego ba lebelelwa bjalo ka lehumo la bohlokwa! Go oketša moo, bana ba Lea ka moka e ile ya ba bagologolo ba meloko ya Isiraele. (Genesi 29:30-35; 30:16-21) Tlhokomelo e lerato ya Modimo e swanetše go ba ile ya homotša Lea gakaakang!

Ga go motho yoo a tlago go ikwa a sa ratwe lefaseng le lefsa leo le holofetšwago ka Mangwalong. Go e-na le moo, lekoko la batho le tla be le tletše lerato la kgonthe. (Jesaya 11:9; 1 Johane 4:7-12) Ka gona, a re bontšheng gona bjale gore re nyaka go phela nakong yeo ka go hlagolela lerato leo le rutwago ka Beibeleng le leo le bontšhitšwego ke Mongwadi wa yona. Ee, lethabo la kgonthe ga le tlišwe ke go ratwa, eupša le tlišwa ke go bontšha ba bangwe lerato le le se nago boithati.—Mateo 5:46-48; 1 Petro 1:22.

[Ntlhakgolo go letlakala 28]

“Go na le lethabo le legolo go neeng go feta go amogeleng.”—Ditiro 20:35

[Seswantšho go letlakala 28]

Ge e ba o nyaka go ratwa, rata ba bangwe