Na go tla ka gwa ba le Bokamoso bjo bo Thabišago Kudu?

Go bolela ka bokamoso ke selo seo batho ba se thabelago kudu. Ke mang go rena yo a ka se thabelego go tseba seo re tlago go ba re se dira kgweding e tlago, ngwageng o tlago goba nywaga e lesome go tloga ga bjale? Ge re lebelela dilo ka mahlakoreng ka moka, lefase le le tla ba le le bjang nywageng e 10, 20, goba e 30 e latelago?

NA O na le kholofelo ka bokamoso? Batho ba dimilione ba na le yona, gomme ba ka arolwa ka dihlopha tše pedi: bao ba rego ba na le mabaka a kwagalago a go dumela gore dilo di tla ba kaone le bao ba nago le kholofelo e itšego feela ka gobane ba bona gore dilo di ka no loka goba di ka no se loke.

Ke therešo gore batho ba bangwe ga ba bone bokamoso bo tla tla le tše di thabišago. Gare ga bona go na le baporofeta bao ba bolelago e sa le pele ka masetlapelo, bao go bonagalago ba kgahlwa ke go bolela ka go fedišwa ka mo go feletšego le mo go šiišago ga polanete ya Lefase. Go ya ka pono ya bona ya bokamoso, go tla ba le baphologi ba sego kae feela.

Wena o bona bokamoso bo re swaretše’ng? Na o nagana gore bo tla tliša ditlaišego le masetlapelo goba khutšo le polokego? Ge e ba o nagana gore bo tla tliša khutšo le polokego, ke’ng seo se go dirago gore o be le kholofelo yeo—na ke seo wena o fo go inaganela sona goba ke bohlatse bjo bo tiilego?

Go fapana le bao ba bolelago ka masetlapelo, bagatiši ba Phafoga! ga ba dumele gore batho ba lebile tshenyegong. Go e na le moo, Beibele e nea mabaka a kwagalago a gore re dumele gore dinako tše di thabišago kudu di sa e-tla.

[Mothopo wa Seswantšho go letlakala 13]

U.S. Department of Energy photograph