Na ke Nywaga ya Lethabo?

NAKO ke 6:30 mesong e tonyago kudu Soweto, Afrika Borwa. Evelyn o swanetše go tsoga. * Wo ke modiro o thata kudu ka ge e bile ntlo ya gagwe e se na tshepedišo ya meetse a go fiša.

O theoša maoto a gagwe malaong ka go neneketša matolo a gagwe ao a opago ka baka la bolwetši bja marapo. Ke moka o khutša go se nene. Ganyenyane-ganyenyane bohloko bo a okobala. Evelyn ga bjale o a itokiša ke moka o a emelela. O a tsetla ka baka la go kwa bohloko. A swere letheka, Evelyn o sepela ka go ikgoga a lebile phapošing ya go hlapela go fo etša ‘tšie yeo e se sa hlwago e pharuma.’—Mmoledi 12:5. *

‘Ka tla ka šoma!’ Evelyn o ipotša seo. Ga se feela gore o kgonne go bona la lehono, eupša gape o kgonne go šuthiša mmele wa gagwe woo o opago.

Lega go le bjalo, go na le selo se sengwe seo se mo tshwenyago. Evelyn o re: “Ke tšhoga gore ke tlo ‘fokola’ monaganong.” Ka dinako tše dingwe o lebala dinotlelo tša gagwe, eupša monagano wa gagwe o sa dutše o šoma gabotse. Evelyn o re: “Ke rapela feela gore ke se ke ka fokola monaganong go etša batšofadi ba bangwe.”

Nakong ya ge e sa le kgarebe, le ka mohla Evelyn o be a sa nagane ka botšofadi. Go bonala nywaga e fetile ka lebelo gomme ga bjale mmele wa gagwe woo o opago o mo gopotša ka mehla gore o na le nywaga e 74.

Batšofadi ba bangwe bao maemo a bona a lego kaone kudu go phala a Evelyn e bile ba se na malwetši a šoro le kgateletšego ba lebeletšana le botšofadi ka katlego gomme ba bo lebelela e le nywaga e mebotse ya lethabo. Go etša mopatriareka Aborahama, le bona ba ka “fihla botšofading ba gotše gomme ba kgotsofetše.” (Genesi. 25:8, NW) Ba bangwe ba ba le ‘nywaga le matšatši a mabe’ gomme selo feela seo ba ka se bolelago ke gore: “Ga e nthabiše.” (Mmoledi 12:1, PK) Nyakišišong e nngwe batho ba bantši ba bile le pono e fošagetšego ka botšofadi moo makasine wa Newsweek o ilego wa šišinya gore nywaga ya lethabo e bitšwe “Nywaga ya go se be le mohola.”

Pono ya gago ke efe ka botšofadi? Ke mathata afe a mangwe ao batšofadi ba lebeletšanago le ona? Na go fokola ga monagano ga go phemege nakong ya botšofadi? Go ka dirwa’ng go thuša batšofadi gore ba be le khutšo ya monagano nywageng ya bona ya lethabo?

[Mengwalo ya ka tlase]