Bafsa ba a Botšiša . . .

O Swanetše go Gwerana Gakaaka’ng le Bao o Tsenago le Bona Sekolo?

“Bana bao ke tsenago le bona sekolo ba be ba rata go bolela ka tsela yeo ba ipshinnego ka yona ge ba be ba kopane mafelo-bekeng. Ke be ke tloga ke ikwa ke le lehlaodi.”—Michelle. *

“Ka dinako tše dingwe ke be ke bona bana bao ke tsenago le bona sekolo ba le gotee gomme ke ipotše gore, ‘Ruri ba a kwana. Le nna ke nyaka go ba mogwera wa bona.’”—Joe.

“Ke be ke se na bothata bja go hwetša bagwera sekolong. Go be go le bonolo go dira bjalo. Bothata bja-ka e be e le bjona bjoo.”—Maria.

O FETŠA nako e ntši letšatši le letšatši o e-na le bao o tsenago le bona sekolo. O lebeletšana le ditlhohlo le mathata a swanago le a bona e bile o nyaka go fihlelela dipakane tše di swanago. Ka ditsela tše itšego, o ka ikwa eka o kwešišana gabotse le bao o tsenago sekolo le bona go feta batswadi ba gago, bana beno goba Bakriste-gotee le wena. Go a kwagala gore o ka ikwa o tutueletšega go gwerana le bona. Na seo ke phošo? Na go na le dikotsi? O swanetše go gwerana gakaaka’ng le bao o tsenago sekolo le bona? O ka lekanetša bjang segwera sa gago le bona?

O Swanetše go ba le Bagwera

Motho yo mongwe le yo mongwe o swanetše go ba le bagwera—batho bao a ka thabelago bophelo le bona ge dilo di sepela gabotse le bao a ka ithekgago ka bona dinakong tša mathata. Jesu o be a e-na le bagwera gomme o be a thabela go fetša nako le bona. (Johane 15:15) Ke moka, ge a be a kokotetšwe koteng ya tlhokofatšo, mogwera wa gagwe wa paala e lego Johane, “morutiwa yo a bego a mo rata [ka mo go kgethegilego],” o be a le kgaufsi le yena. (Johane 19:25-27; 21:20) Le wena o swanetše go ba le bagwera ba bjalo—batho bao ba tlago go go thekga dinakong tša mathata. Seema sa Beibele se re: “Moxwêra ké moratwa wa ka mehla; ké ngwan’ešo e a ntswáletšwexo wa mohla wa tlalêlô.”—Diema 17:17.

Mohlomongwe o nagana gore o šetše o hweditše motho yo bjalo sekolong, yo mongwe wa bao o tsenago le bona ka klaseng yoo o tlogago o kwešišana le yena. Le rata dilo tše di swanago e bile le rata go boledišana. Ke therešo gore motho yoo e ka no se be modumedi-gotee le wena, eupša go ya ka wena ga a bonale e le ‘mogwera yo mobe.’ (1 Bakorinthe 15:33) Ke therešo gore bafsa ba bangwe bao e sego Bakriste ba itshwere gabotse. (Baroma 2:14, 15)  Eupša na seo se bolela gore o swanetše go ntšhana sa inong le bona?

Bakriste ga se Majela-thoko

Go molaleng gore Bakriste ba therešo ga ba pheme batho bao e sego badumedi-gotee le bona. Ge e le gabotse, e le gore ba phethagatše taelo yeo ba e neilwego ya go ‘dira batho ba ditšhaba ka moka barutiwa,’ Bakriste ba boledišana le banna le basadi ba merafo ka moka, madumedi le ditšo ka moka. (Mateo 28:19) Ga ba pheme go dirišana le baagišani, bašomi-gotee goba bao ba tsenago le bona sekolo. Go e-na le moo, Bakriste ba kgahlegela ba bangwe e le ka kgonthe.

Moapostola Paulo o beile mohlala o mobotse tabeng ye. O be a kgona go boledišana le “batho ba mehuta ka moka” gaešita le ge ba be ba se na tumelo e swanago le ya gagwe. Ke therešo gore boikemišetšo bja Paulo e be e se go gwerana le bona. Go e-na le moo, o itše: “Ke dira dilo tšohle bakeng sa ditaba tše dibotse, e le gore ke di abelane le ba bangwe.”—1 Bakorinthe 9:22, 23.

Le wena o ka latela mohlala wa Paulo. E-ba botho go bao o tsenago le bona sekolo. Ithute go boledišana le bona gabotse. Ba bangwe bao o tsenago le bona sekolo ba ka no ba ba tsoma kholofelo e theilwego Beibeleng yeo o nago le yona. Ela hloko phihlelo ya ngwanenyana wa Mokriste yo a bitšwago Janet. Yena le bao a tsenago le bona ka klaseng ba ile ba abelwa gore ba ngwale taodišo e kopana ka barutwana-gotee le bona gomme morutwana yo mongwe le yo mongwe a newa sebaka sa go bala seo ba bangwe ba se naganago ka yena. E nngwe ya dipampišana tšeo Janet a ilego a di hwetša e be e ngwadilwe gore: “O bonala o dula o thabile ka dinako tšohle. Hle re hlalosetše gore ke ka baka la eng!”

Bjalo ka ge phihlelo ye e bontšha, ba bangwe bao o tsenago le bona ka klaseng ba ka ba ba nyaka go tseba ka tumelo ya gago. Ka ntle le pelaelo go tla go hola go ba botho go bona. Ga go pelaelo gore se se tla go bulela sebaka sa go hlalosa tumelo ya gago. Nea barutwana-gotee le wena sebaka sa gore ba hlalose pono ya bona gomme o theetše ka kelohloko ge ba dutše  ba bolela. Phihlelo yeo o e hwetšago ge o boledišana le bao o tsenago le bona sekolo e tla go thuša letšatši le lengwe ge o šetše o šoma gomme o lebeletšana le maemo a swanago. Go dula o e-na le bogwera ge o le sekolong le mošomong go tla go thuša gore o “kgabiše thuto ya Mophološi wa rena, Modimo, dilong ka moka.”—Tito 2:10.

Bagwera Bao “ba sa Dumelego”

Ke therešo gore go ba le bogwera go motho yoo o tsenago le yena ka klaseng ga go swane le go ba mogwera wa gagwe wa paala. Paulo o ngwadile gore: “Le se ke la rwala joko le ba ba sa dumelego.” (2 Bakorinthe 6:14) E le gore o be mogwera wa paala wa motho yo mongwe, ditekanyetšo tša gago le dipakane tša gago di swanetše go swana le tša gagwe. Seo ga go bonolo gore se kgonege ge e ba motho yoo a sa hlomphe ditumelo le ditekanyetšo tša gago tše di theilwego Mangwalong. Go gwerana le morutwana-gotee yo a sa dumelego go ka go tutueletša gore o kopanele mekgweng e sa lokago goba gwa senya mekgwa ya gago e mebotse.

Maria o ile a ithuta se gabohloko. Go rata ga gagwe batho go ile gwa dira gore go be bonolo gore a be le bagwera, eupša gwa dira gore go be thata gore a lekanetše segwera sa gagwe. O dumela gore: “Ke be ke thabela go ratwa ke bašemane le banenyana. Ka baka leo, ke ile ka ikhwetša ganyenyane-ganyenyane ke metšwa ke lefase.”

Go etša Maria, le wena o ka thatafalelwa ke go bona ge segwera sa gago le motho yo e sego Mokriste se feteletše. Lega go le bjalo, o ka itšhireletša bohlokong ka go bea melao yeo e hlaolago bao o tlago go tlwaelana le bona gotee le bao o tlago go ba kgetha gore e be bagwera ba gago ba paala. O ka dira bjalo bjang?

Kamoo o ka Kgethago Bagwera ba Lokilego

Go etša ge go boletšwe pejana, Jesu o ile a ba le bagwera ba paala ge a be a le mo lefaseng. O dirile bjalo ka go dula a botega e bile a bolela ka dilo tša moya. Ge batho ba be ba amogela dithuto tša gagwe le tsela ya gagwe ya bophelo, ba be ba batamela kgaufsi le yena. (Johane 15:14) Ka mohlala, ka morago ga go kwa Jesu a ruta, banna ba bane ba ile ba kgomega kudu moo ba ilego ba ba “ba tlogela tšohle gomme ba mo latela.” Banna ba—Petro, Andrea, Jakobo le Johane—ba ile ba ba bagwera ba Jesu ba paala.—Luka 5:1-1; Mateo 4:18-22.

Dipolelo tša Jesu le boitshwaro bja gagwe di ile tša dira gore go be molaleng gore o be a tiišitše ka seo a bego a se dumela le gore boemo bja gagwe bo be bo ka se ke bja fetoga. Bao ba bego ba sa nyake go mo amogela le go amogela dithuto tša gagwe ba ile ba mo tlogela gomme Jesu le yena a ba tlogela ba sepela.—Johane 6:60-66.

Ka mohlala, Jesu o ile a kgongwa ka mo go tseneletšego ke potego ya lesogana le lengwe. Beibele e re: “Jesu a mo lebelela, a kwa a mo rata.” Eupša ge le e-kwa seo Jesu a bego a se lebeletše go bagwera ba gagwe, le ile “la tloga.” Monna yo o be a bonala e le motho yo mobotse—ka kgonthe, Jesu o ile “a kwa a mo rata.” Lega go le bjalo, Jesu o be a nyaka se se oketšegilego go bagwera ba gagwe. (Mareka 10:17-22; Mateo 19:16-22) Go thwe’ng ka wena?

O ka no ba o tlwaelane le motho yo a itšego yoo o tsenago le yena sekolo. Eupša ipotšiše: ‘Na motho yo o ikemišeditše go dira seo Jesu a se laelago? Na o ikemišeditše go ithuta ka Jehofa, e lego yoo Jesu a re laetšego gore re mo rapele?’ (Mateo 4:10) Dikarabo tša dipotšišo tše di tla ba molaleng ge o dutše o boledišana le bao o tsenago le bona ka klaseng le ge o dutše o phela ka ditekanyetšo tša Beibele.

Ke mo go swanetšego gore o be botho go bao o tsenago le bona ka klaseng go fo etša ge Jesu a be a e-na le bogwera go batho ba mehuta ka moka. Eupša Jesu o be a kgonthišetša gore bagwera ba gagwe ba paala ba rata Tatagwe wa legodimong, Jehofa. Le wena o ka dira se se swanago. ‘Dula o itshwere gabotse’ sekolong gomme ka bohlale o bolele le ba bangwe ka tumelo ya gago. Ka godimo ga tšohle, kgonthišetša gore o kgetha bagwera ba ba kaone-kaone.—1 Petro 2:12.

SEO GO KA NAGANWAGO KA SONA

▪ Go fetša nako e ntši ka morago ga ge sekolo se tšwele o e-na le motho yo a sa dumelego yoo o tsenago le yena ka klaseng go na le dikotsi dife? Na ke gabohlale go dira bjalo?

▪ Na ka morago ga go bala sehlogo se o ikwa gore o gwerane ka mo go feteletšego le motho yo o tsenago le yena ka klaseng? Ge e ba go le bjalo, ke’ng seo o ka se dirago?

[Mongwalo wa ka tlase]

[Lepokisi/Diswantšho go letlakala 17]

HOW CAN I MAKE REAL FRIENDS?

Bidio ye, yeo e gatišitšwego ke Dihlatse tša Jehofa, e na le dipoledišano tša kgonthe tša bafsa ba tšwago United States, Italy, France le Spain. E hwetšagala ka maleme a 36.

[Seswantšho go letlakala 17]

Barutwana ba bangwe bao o tsenago le bona ka klaseng ba ka ba ba nyaka go tseba ka ditumelo tša gago