O ka Hwetša Lethabo la Kgonthe!

BATHO ba bantši lefaseng ka bophara ba nagana gore go ba le koloi e botse, tšhelete e ntši pankeng, mošomo wa maemo, ntlo e kgolo le didirišwa tša morago bjale tša elektroniki, go akaretša le go ba le mmele o mosesane goba mmele wa digoba, go dira gore motho a thabe. Lega go le bjalo, na ruri lethabo le ithekgile ka dilo tše bjalo tše di bonagalago goba ka ponagalo ya mmele?

Pego e kgethegilego ka makasineng wa Time e begile gore, go bile le “dinyakišišo tše dintši ka lethabo, kholofelo, pono e nepagetšego le ka go phela gabotse mmeleng, monaganong le boitshwarong.” Dipoelo tša dinyakišišo tše bjalo di makatša ba bantši. Bohlatse bjo bo sa fetogego ka tsela e makatšago bo bontšha gore batho bao ba tutuetšwago ke kgopolo ya gore tšhelete, botumo goba bobotse di ka dira gore ba thabe, ba a iphora. Ge e le gabotse, ba thea maphelo a bona motheong wo o ka senyago menagano ya bona le go dira gore ba swarwe ke kgateletšo ya monagano.

Kua United States, batho ba bantši ba humile go feta kamoo ba bego ba le ka gona pele. Makasine wa Time o re: “Eupša ge e le gabotse seo ga se sa ka sa dira gore re thabe.” Go ba gona, go ka bolelwa se se swanago le ka batho bao ba dulago dinageng tše dingwe. Kua China, yeo boemo bja yona bja tša ditšhelete bo atlegago ka lebelo le legolo, go na le koketšego e makatšago ya batho bao ba nyamilego. Makasine wo o gatišwago gane ka ngwaga wa Access Asia o bega gore kua China go ipolaya go fetogile “sebaki se segolo sa mahu a batho bao ba nago le nywaga e 15 go fihla go 34.” Go bonala eka bothata bjo bo bakwa ke kgatelelo ya gore bafsa ba atlege maemong a lefase ao a lego thata le ao a nyakago mo gontši.

Ka mo go kwagalago, go atlega ka dilo tše di bonagalago ga go fediše dipelaelo le kgateletšo; go e na le moo go a di gakatša. Phetho ya nyakišišo ya yunibesithi e nngwe e re: “Ga bjale tsela ya rena ya go phela e fetogile sebaki se segolo seo se dirago gore re se ke ra leka-lekana maikwelong le monaganong.” Go ya ka Van Wishard yo e lego moseka-seki wa ditlwaelo tša setšhaba (social-trends), “dikhamphani tše dintši di lefa di-inšuranse tša tša maphelo bakeng sa go thuša bašomi ba tšona, gagolo kudu tabeng ya go hlokomelwa monaganong le maikwelong.”

Gaešita le bana ba kgongwa ke lefase la rena leo le feto-fetogago ka lebelo. Wishard o re ga bjale go na le dipuku tša bana ba nywaga e seswai, “tšeo di ba eletšago ka mokgwa woo ba ka lemogago ditšhupo tša kgateletšego le kamoo ba ka e fenyago ka gona.” Go ya ka pego ya lelokelelo la dibaki tša kgateletšego, kgateletšo yeo e hweditšwego baneng bao ba hlahlobilwego dinageng tše mmalwa tša ka Bodikela e gola ka lebelo le makatšago la 23 lekgolong ka ngwaga. Ka godimo ga moo, “dihlare tša go thibela kgateletšo ya monagano di rekelwa kudu bo-mapimpana.”

Poifo le yona e a gola—e sego feela ka lebaka la go se tsepame ga tša boiphedišo. Ka baka la go fetelela ga maemo a dipolitiki le a bodumedi, batho ba bantši ba thothometšwa ke dilo tša go tšhoša kudu tšeo di ka tšwelelago ka moso. Na go na le thušo?

Nywageng e ka bago e dikete tše pedi e fetilego Jesu Kriste o ile a ruta ka mokgwa wa go phela wo o lapološago le wo o fokotšago kgateletšego. Molaetša o mogolo wa thuto ya gagwe o be o le bonolo eupša e le therešo e kwešišegago. O boletše gore: “Go thaba bao ba lemogago go nyaka ga bona dilo tša moya.” (Mateo 5:3) Ke therešo gore Jesu o ile a kgothaletša batheetši ba gagwe gore ba lebiše tlhokomelo senyakweng sa batho sa bohlokwa—therešo ya bodumedi mabapi le Mmopi le morero wa Gagwe ka rena.

Ka ge re tla bona dihlogong tše di latelago, therešo yeo e ka re thuša go lemoga se se lego bohlokwa gomme ya re lebiša bophelong bja lethabo le bjo bo tlogago bo e-na le morero. Le gona therešo e bjalo ya bodumedi e re nea kholofelo e kgahlišago.

[Ntlhakgolo go letlakala 3]

Na dilo tše di bonagalago di dira gore re thabe?