Thabang Kholofelong

JOE o be a babja kudu a le mogatong wa mafelelo wa bolwetši bja kankere. Mosadi wa gagwe Kirsten, le bagwera ba mmalwa ba be ba boledišana ba le ka lehlakoreng la malao a gagwe. Kirsten o ile a lebelela monna wa gagwe gomme a lemoga gore megokgo e be e elela dithameng tša gagwe. Mathomong o be a nagana gore Joe o kwa dihlabi. Mohlomongwe o be a di kwa, eupša o boditše mosadi wa gagwe gore mo lebakeng le dihlabi e be e se tšona di bakago gore a tšwe megokgo.

Kirsten o re: “Mo nakong ye e thata, Joe o be a dikologilwe ke bagwera ba paala bao ba bego ba tlile go ba le yena. Le gona, mo nakong ye o be a kgodišegile go feta nakong le ge e ka ba efe bophelong bja gagwe gore kholofelo ya gagwe e kgahlišago e kgaufsi le go phethega gomme o be a tseba gore ga go na yo a ka mo tšeelago kholofelo yeo. Ge e le gabotse o ile a utolla gore megokgo yeo e be e le ya lethabo. Ka morago bošegong bjoo Joe o ile a hwa.”

Ke kholofelo efe ye e ilego ya matlafatša Joe ge bolwetši bo be bo dutše bo gola? E be e le kholofetšo ya Jehofa Modimo ya bophelo bja go hloka malwetši bjo bo sa felego lefaseng la paradeise. (Psalme 37:10, 11, 29) Kutollo 21:3, 4 e bolela gore: “Tente ya Modimo e go batho . . . O tla phumola megokgo ka moka mahlong a bona, gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona. Dilo tša pele [go akaretša le mathata a mantši a lehono] di fetile.”

Le Bahu ba na le Kholofelo

Go Joe, go phethagatšwa ga kholofelo ya gagwe go bolela go tsošwa bahung. Ka kgonthe, o ile a homotšwa ke kholofetšo ya Jesu ya gore: “bohle bao ba lego mabitleng a kgopotšo”—bahu bao ba lego ka mogopolong wa Modimo—ba tla tsoga borokong bja lehu. (Johane 5:28, 29) Na o nyamile ka baka la gore setho sa lapa goba mogwera o hwile? Ge e ba go le bjalo, le wena kholofelo ya tsogo e ka go matlafatša. Ke therešo gore kholofelo ye ga e phumole bohloko bjo bogolo bjo re bo kwago ge motho yo re mo ratago a e-hwa. Jesu o ile “a ntšha megokgo,” ka ge mogwera wa gagwe Latsaro a hwile. Eupša kholofelo ya rena e thoba bohloko bjo re bo kwago.—Johane 11:14, 34, 35; 1 Bathesalonika 4:13.

 Kirsten o re: “Ge Joe a be a bolawa ke bolwetši bja kankere ke ile ka nagana gore nka se sa kgona go thaba gape le ka mohla. Le mo nakong ye ka morago ga nywaga e mmalwa, ke nagana gore mo tshepedišong ye ya dilo bophelo bja-ka bo ka se ke bja boela sekeng. Joe o tlogetše sekgoba seo se ka se kego sa thibja. Lega go le bjalo, nka bolela ke tiišitše gore ke sa dutše ke e-na le khutšo ya monagano le kgotsofalo.”

Mantšu a Kirsten a re gopotša gore mo tshepedišong ye ya gona bjale ya dilo, re ka se letele gore re tla thaba nako le nako ge re phafoga. Bophelong go na le lethabo le manyami. Le gona go na le dinako tšeo re swanetšego go nyama, tšeo go tšona lethabo le tlogago le sa swanele. (Mmoledi 3:1, 4; 7:2-4) Le gona, ba bangwe ba rena ba ka lwantšhana le kgateletšego yeo e ka bego e bakilwe ke dilo tša go fapa-fapana. Lega go le bjalo, dikholofetšo tša Beibele ke mothopo o mogolo wa khomotšo, le gona bohlale bjo bo phalago ohle bjo bo hwetšwago ka Beibeleng bo ka re thuša go efoga mereo yeo e bakago manyami. Modimo o re: “Xe e le eo a kwaxo nna, ó tlo dula a iketla, ó ikaxêla à sa šie kotsi.”—Diema 1:33.

Ka kgonthe, Jehofa o re kganyogela dilo tše dibotse. O nyaka gore re thabe—e sego ka ponagalo feela, eupša go tšwa pelong, le gona e sego nywaga e mmalwa feela eupša ka mo go sa felego! Ke ka baka leo Morwa wa gagwe a ilego a bolela therešo ye e sa fetogego e rego: “Go thaba bao ba lemogago go nyaka ga bona dilo tša moya.” (Mateo 5:3) Re bontšha bohlale ge re e diriša.

[Lepokisi/Seswantšho go letlakala 9]

Ditsela tše Senyane Tšeo di Nyakegago Bakeng sa go Hwetša Lethabo

1. Go ba le pono ya dilo tša moya bophelong.—Mateo 5:3.

2. Go kgotsofala le go phema “lerato la tšhelete.”—1 Timotheo 6:6-10.

3. Maipshino a swanetše go ba le nako ya wona.—2 Timotheo 3:1, 4.

4. Go fana ka seatla se se bulegilego le go dira maiteko a go dira gore ba bangwe ba thabe.—Ditiro 20:35.

5. Go ba le tebogo gotee le go lebiša tlhokomelo ditšhegofatšong tša gago.—Bakolose 3:15.

6. Go ba le moya wa go lebalela.—Mateo 6:14.

7. Go kgetha bagwera ba gago ka bohlale.—Diema 13:20.

8. Go hlokomela mmele wa gago gotee le go phema mekgwa e mebe.—2 Bakorinthe 7:1.

9. Go ‘Thaba kholofelong’ yeo Beibele e go neago yona.—Baroma 12:12.

[Diswantšho go letlakala 8, 9]

Kholofelo e theilwego Beibeleng ya go phela lefaseng le lefsa ke mothopo o mogolo wa khomotšo