Go Tloga go Beng yo a se Nago Kholofelo go ya go Beng yo a Nago le Lethabo

KA GE GO ANEGA VICENTE GONZÁLEZ

Ge baagišani ba e-kwa gore ke ithuntše ka makga a mane gomme ga se ka hwa, ba ile ba thoma go mpitša Superman. Eupša ge e le gabotse ke be ke se superman. Ere ke hlalose gore ke’ng seo se ntirilego gore ke nyake go ipolaya.

KE BELEGWE ka 1951 kua Guayaquil, Ecuador. Batswadi ba-ka ba ile ba agela bana ba bona ba senyane ntlo lefelong leo le bitšwago Šušumela leo le lego kgaufsi le lewatle. Malapa a badiidi a be a “falaletše” lefelong leo ka ntle ga molao, a aga dintlo ka me-bamboo gomme a di rulela ka masenke a potegilego. Ka baka la gore dintlo tšeo di be di agwa nageng e alegilego le mehlakeng e tletšego dihlare tša mangrove, di be di agelwa godimo ga dikota. Re be re se na mohlagase, re be re apea ka setofo sa malahla gomme re sepela khilomithara go ya go ga meetse a go nwa.

E le gore ba thuše lapa ka ditshenyagalelo, bagolo’ake ba ile ba thoma go šoma e sa le ba banyenyane. Ge ke be ke e-na le nywaga e 16, ke se ka tšwa ke fetša sekolo, ke ile ka hwetša mošomo wa go ba moromiwa feketoring e itšego. Nna le bagwera ba-ka re ile ra thoma go nwa bjala le go itshwara ka tsela e gobogilego. Ge letswalo la-ka le be le ntshwenya, ke ile ka ya go ipobola dibe. Moruti pele a mpotša gore ke sepele, ka ntle le go nnea thušo le ge e le efe ya moya o be a tla re, “Morwa’ke, o ipobotše dibe ka tsela e swanetšego.” Ka gona, ke ile ka fo tšwela pele ke dira tšona dilo tšeo ke bego ke di dira. Mafelelong, go dira sebe leboelela le go yo ipobola go ile gwa bonala go se na mohola, ka baka leo ke ile ka tlogela go ya kerekeng. Mo e ka bago ka yona nako yeo, ke ile ka lemoga go hloka toka setšhabeng mo ke bego ke go bona. Batho ba diilago ba be ba swanetše go šoma ka thata gore ba iphediše mola batho ba humilego ba be ba phela maphelo a manobonobo. Bophelo bo be bo se na morero. Ke ile ka ikwa ke se na bokamoso le morero bophelong.

Ke moka, letšatši le lengwe ke ile ka lemoga gore dikgaetšedi tša-ka tše nne di be di bala dikgatišo tšeo di tšweletšwago ke Dihlatse tša Jehofa. Le nna ke ile ka thoma go di bala. Go na le puku e tee yeo e ilego ya ntanya ka mo go kgethegilego, e be e le Therešo e Išago Bophelong bjo bo sa Felego. E ile ya mpontšha seetša mabapi le ditaba tše dintši tša Beibele ka tsela e kwagalago. Ke gopola ke ipotša gore, ‘Se ke therešo!’ Eupša ke be ke tla bona ka morago ga nywaga e 15 e latelago gore go phela ka go dumelelana le therešo go thata kudu.

Ke ile ka thoma go šoma ka pankeng ge ke e-na le nywaga e 22. Letšatši le lengwe, mošomi-gotee le nna o ile a mpontšha kamoo a bego a ikadima tšhelete ka boradia pankeng gomme ka morago a tle a e bušetše. Le nna ke ile ka thoma go itirela dikadimo tša boradia, go fihlela ge ke ikadimile tšhelete e ntši kudu moo ke bego ke se sa kgona go uta bokebekwa bja-ka. Ke ile ka atelwa ke manyami a magolo, ka ge ke be ke bona gore nka se kgone go bušetša tšhelete yeo ke ikadimilego yona. Ka gona, ke ile ka phetha ka gore ke ipobole dibe go ba panka gomme ka morago ke dire mohuta o feteletšego wa go ikweša bohloko, e lego go ipolaya.

Ka morago ga go ngwalela panka lengwalo, ke ile ka reka sethunya se senyenyane, ka ya lefelong leo le lego thokwana lebopong la lewatle ka ithunya gabedi mo hlogong le gabedi mo sefegeng. Gaešita le ge ke be ke gobetše wa go  šiiša, ga se nke ke e-hwa. Motho yo a bego a ragela paesekela o ile a nkhwetša, gomme ka pela-pela a dira dithulaganyo tša gore ke išwe sepetlele. Ka morago ga go hlaphogelwa, ke ile ka sekišwa ka taba ya gore ke a utswa gomme ka išwa kgolegong. Ge ke lokollwa, ke ile ka lewa ke dihlong ka ba ka gateletšega ka ge bjale ke be ke e-na le molato wa bosenyi. Ka ge ke be ke se ka bolawa ke dintho tša dikolo tše nne tša sethunya, baagišani ba ile ba thoma go mpitša Superman.

Sebaka sa Gore ke Fetoge

Ka nako yeo, Paul Sánchez, e lego moromiwa wa Dihlatse tša Jehofa, o ile a nketela. Selo sa pele seo ke ilego ka se lemoga e be e le go myemyela ga gagwe mo go kgahlišago. Paul e be e le motho yo a thabilego le yo a nago le pono e botse ka dilo moo e lego gore ke ile ka dumela taletšo ya gagwe ya gore a be le thuto ya Beibele le nna. Ke ile ka nagana gore, ‘Mohlomongwe a ka nthuša go hwetša lethabo le morero bophelong.’

Ka thušo ya Paul, ke ile ka ithuta gore go na le seo Modimo a se reretšego batho le gore letšatši le lengwe bao ba mo ratago le go Mo kwa ba tla phela paradeiseng mo lefaseng. (Psalme 37:29) Ke ile ka ithuta gape le gore, go hloka toka le bodiidi ga di bakwe ke Modimo eupša ke mafelelo a borabele bja batho malebana le Modimo. (Doiteronomio 32:4, 5) Ditherešo tše di bile bjalo ka seetša bophelong bja-ka. Eupša go fetoša semelo sa-ka go be go le thata kudu go feta go ithuta Beibele.

Ke ile ka hwetša mošomo wa ka ofising wa gore ke šome ka ditšhelete tša khamphani. Le moo gape ke ile ka ineela tekong gomme ka thoma go utswa. Ge ke be ke sa hlwe ke kgona go uta bohodu bja-ka, ke ile ka tšhabela toropong e nngwe kua Ecuador gomme ka dula moo mo e ka bago ngwaga. Ke ile ka leka go tšhaba nageng, eupša ka palelwa ka ba ka boela gae.

Paul o ile a kopana le nna gape, gomme ra thomološa thuto. Mo nakong ye ke ile ka ikemišetša go diriša melao ya motheo ya Beibele bophelong bja-ka le go hlankela Jehofa. Ka gona, ke ile ka utollela Paul gore peleng ke be ke sa botege, gomme yena a nkeletša ka bolokologi e bile a bolela go tšwa pelong. O ile a mpontšha ditemana tša Beibele tše bjalo ka Baefeso 4:28, yeo e rego: “Yo a utswago a se ke a hlwa a utswa.” Ke ile ka bona gore ke swanetše go amogela gore ke utswitše gomme ke amogele ditla-morago tša seo.

Ge ke dutše ke nagana ka boemo bja-ka, ke ile ka thoma go itšhomela bjalo ka rabokgabo. Letšatši le lengwe monna yo mongwe o ile a tla ka mo ke bego ke šomela ka gona gomme a bontšha gore o thabela se sengwe sa diswantšho. Lega go le bjalo, e be e le monyakišiši wa melato e bile o be a dumeletšwe ka molao gore a ka ntshwara. Le gona moo gape ke ile ka swanelwa ke go ya kgorong ya tsheko gomme ka morago ka ya kgolegong. Paul o ile a nketela, gomme ka mo holofetša ka gore, “O ka se ke wa itshola ka maiteko ao o a dirilego a go nthuša go kwešiša Beibele.” Re ile ra tšwela pele ka go ithuta ge ke dutše ke le kgolegong.

Ke Hlatsetše go Botega Ga-ka

Ge ke lokollwa, ke ile ka ikemišetša go hlankela Jehofa ka pelo ya-ka ka moka, gomme ke ile ka hlatsela go botega ga-ka nywageng e mebedi e latetšego. Ka 1988, ke ile ka kolobetšwa gomme ka ba yo mongwe wa Dihlatse tša Jehofa. Ke fagahletše go lefa nako yeo ke e sentšego, ke ile ka thoma tirelo ya nako e tletšego ke le modiredi wa mmulamadibogo, ke dira maiteko a kgethegilego gore ke fihlelele ditho tša bafsa ba dihlopha tša bahlola-mpherefere.

Se sengwe sa dihlopha tšeo gantši se be se thala diswantšho tša go se ye ka tsela Holong ya rena ya Mmušo. Ka ge ke be ke tseba ditho tša sehlopha se sa bahlola-mpherefere le mo di dulago gona, ke ile ka di etela, ka hlalosa morero wa go ba gona ga Holo ya Mmušo, gomme ka di kgopela ka botho gore di hlomphe thoto ya rena. Ka morago ga seo ga se gwa hlwa go e ba le diswantšho le maina a thadilwego Holong ya Mmušo.

Ka morago, ge re be re mpshafatša holo e bile re tloša pente ya kgale, Hlatse ya mofsa yeo e bitšwago Fernando e ile ya khupolla leina leo le bego le re “The Frog [Segwagwa]” (La Rana, ka Sepaniše). Fernando o ile a re “Leina leo e be e le la-ka!”. Ka ge e be e le setho sa sehlopha seo, Fernando o be a thadile leina leo ba bego ba mo reta ka lona moagong woo. Ga bjale o be a le tloša!

Ge ke be ke bona Fernando ka lekga la pele, o be a tagilwe ke dihlare-tagi. Mmagwe o be a mo išitše mafelong a mabedi a go kgopamolla mekgwa, eupša go se gwa thuša selo. Ka baka leo, o ile a tlogela go mo  thuša, a huduga gomme a mo šia a nnoši ka ntlong. Fernando o ile a rekiša selo se sengwe le se sengwe seo se bego se ka rekwa—gaešita le mabati, mafasetere le marulelo a ntlo—e le gore a ka reka dihlare-tagi. Letšatši le lengwe ke ile ka mmatamela a le seterateng, ka mo fa senwa-maphodi, ka morago ka ithapela go mo swarela thuto ya Beibele. O ile a e amogela, gomme se se ilego sa nthabiša kudu ke gore o ile a arabela gabotse therešong. O ile a tlogela sehlopha sa bahlola-mpherefere, a tlogela mokgwa wa gagwe wa go kgoga dihlare-tagi, a thoma go tla dibokeng tša Bokriste gomme go se ye go ye kae a kolobetšwa.

Ge nna le Fernando re be re bolela ka ntlo le ntlo, batho gantši ba be ba re lemoga gomme ba bolele ka go makala gore “The Frog!” goba “Superman!” gomme ba botšiša gore re dira eng. Ba be ba makatšwa ke go bona ba etelwa ke motho yo e bego e le setho sa sehlopha sa bahlola-mpherefere le yo e bego e le lehodu, ba swere Dibeibele.

Lebakeng le lengwe ke be ke nea bohlatse go monna yo mongwe mola Fernando a be a bolela le moagišani wa monna yoo. Monna yoo o ile a bolela le nna a šupile Fernando, a re: “O a mmona monna yola a lego fale? Letšatši le lengwe o ile a ntšhupa ka sethunya mo hlogong.” Ke ile ka mo kgodiša gore ga bjale Fernando o lahlile mekgwa ya gagwe ya nakong e fetilego gomme mo nakong ye o phela ka go dumelelana le melao ya motheo ya Beibele. Ge e le gabotse, ge Fernando a fetša go bolela le moagišani yola, ke ile ka mmitša ka mo tsebiša go monna yoo. Mong wa ntlo o ile a re, “Lesogana, ke rata go go lebogiša ka baka la diphetogo tšeo o di dirilego bophelong bja gago.”

Ga ke kgone go gopola makga ao batho ba bego ba bolela mantšu a bjalo go nna le Fernando. Dilo tše di butše tsela ya gore go newe bohlatse bjo bobotse, gwa feleletša ka go ba le dithuto tše dintši tša Beibele. Ruri nna le Fernando re a godišwa ka gore re tsebja re le Dihlatse tša Jehofa.

Phetogo e Kgolo Bophelong Bja-ka

Ka 2001, ge ke be ke e-ba le nywaga e 50, ke be ke maketše e bile ke thabile ge ke be ke laletšwa gore ke be gona Sekolong sa Tlwaetšo ya Bodiredi seo se bego se tla swarelwa Peru. Sekolo se se nea Dihlatse tše di swanelegago tlhahlo e tseneletšego ya moya yeo e tšeago dibeke tše seswai e le go di thuša bodireding bja tšona.

Karolo e nngwe le nngwe ya sekolo e be e le e thabišago, ge e se feela selo se tee—go bolela phatlalatša, e lego selo seo se bego se ntšhoša. Barutwana ba bantši ba bafsa ba be ba bea dipolelo tše kgahlišago gomme ba bonagala ba e-na le kgodišego. Eupša ge ke be ke emelela gore ke yo bea polelo ya-ka ya mathomo, maikwelo a go ikwa ke nyatšega ao a ntshwentšego go tloga ke sa le yo monyenyane a ile a boa. Maoto a ile a thoma go thothomela, matsogo a-ka ao a bego a e-tšwa mphufutšo a ile a thothomela gomme lentšu la-ka la thothomela. Eupša Jehofa o ile a nthekga ka moya wa gagwe o mokgethwa le ka bana babo rena ba nago le lerato. Yo mongwe wa bahlahli o ile a ba a mpontšha kgahlego gomme ka morago ga dithuto a nthuša go lokišetša dipolelo tša-ka. Sa bohlokwa kudu ke gore o ile a nthuta go bota Jehofa. Ge re fetša dithuto tša rena, e be e le ka lekga la mathomo bophelong bja-ka, moo ke ilego ka thabela go bolela pele ga batheetši.

Teko e kgolo ya kgodišego ya-ka e ile ya tšwelela kopanong ya Dihlatse tša Jehofa kua Guayaquil. Ke ile ka anegela batho ba 25 000 gore go tlile bjang gore ke be Hlatse. Lega go le bjalo, ge ke dutše ke bolela, ke ile ka kgomega maikwelong kudu ka baka la tokelo ye ya gore ke kgothatše batho ba bantši gakaaka, gomme lentšu la-ka le ile la thoma go thothomela. Ka morago, yo mongwe wa batla-kopanong o ile a mpatamela gomme a re, “Ngwanabo Rena González, ge o be o anega phihlelo ya gago, batho ka moka gare ga batheetši ba be sekišitše megokgo.” Morero wa-ka o mogolo e be e le gore phihlelo ya-ka e be mothopo wa kgothatšo go bao ba ka bego ba be ba katana le go lahla mekgwa ya bona ya nakong e fetilego.

Ga bjale ke hlankela ke le mogolo e bile ke mmulamadibogo wa ka mehla gomme ke thabetše go thuša batho ba 16 gore ba hwetše tsebo e nepagetšego ya therešo ya Beibele. Ke thabile kudu gore batswadi ba-ka le dikgaetšedi tša-ka tše nne le bona ba neetše maphelo a bona go Jehofa. Mma o hlokofetše a dutše a botegela Modimo ka 2001. Ke leboga Jehofa kudu ge a ile a ntumelela gore ke mo tsebe, gomme ke tseba gore tsela e kaone-kaone ya go bontšha tebogo ke gore ke laletše ba bangwe gore le bona ba batamele kgaufsi le yena.—Jakobo 4:8.

[Seswantšho go letlakala 14]

Fernando, The Frog, yo ke ilego ka mo thuša, e be e le setho sa sehlopha sa bahlola-mpherefere

[Seswantšho go letlakala 14]

Paul Sánchez, moromiwa yo a ilego a ithuta Beibele le nna

[Seswantšho go letlakala 15]

Vicente González lehono