Bophelo Bjoo a Dirago Gore bo Kgonege

“TSEBANG! Xo tlo bewa kxoši ya xo buša ka xo loka.” Dikholofetšo tše di matlafatšago tšeo di swanago le ye tša mabapi le go buša ga Jesu Mmušong ke karolo e bohlokwa kudu ya Beibele. Kholofetšo e nngwe e swanago le tšeo ke e rego: “Xobane ó tlo hlakodiša modiitšana xe a lla, le mohlaki xe a hlôka monamodi. Ó tlo xauxêla mosenyi le mohloki; meôya ya bahumanexi ó tlo e phološa. . . . ’Me madi a bôná ó tlo a sema selô se bohlôkwa.”—Jesaya 32:1; Psalme 72:12-14.

Na go ka ba le yo a ganago gore batho lefaseng ka bophara ba nyaka go bušwa ka tsela e bjalo ya go loka? Jesu o ile a kgothaletša balatedi ba gagwe gore ba dule ba nagana ka Mmušo wa Modimo. O ba rutile go rapela ka gore: “Mmušo wa gago a o tle. Thato ya gago a e direge le mo lefaseng bjalo ka ge e direga legodimong.”—Mateo 6:9, 10.

Bohlatse bja Gore Mmušo wa Modimo o Kgaufsi

Re ka tseba bjang gore Mmušo woo o tla fihla neng e le go araba thapelo yeo? Balatedi ba pele ba Jesu ba be ba nyaka go tseba gomme ba ile ba botšiša gore: “Pontšho ya go ba gona ga gago [bjalo ka Kgoši e bušago] le ya bofelo bja tshepedišo ya dilo e tla ba eng?” Jesu o ile a araba ka gore: “Setšhaba se tla tsogela setšhaba . . . gomme go tla ba le tlhaelelo ya dijo le ditšhišinyego tša lefase lefelong le lengwe ka morago ga le lengwe. Dilo tše ka moka ke mathomo a dihlabi tša tlalelo.” Le gona o lemošitše gore: “Ka baka la go oketšega ga go hloka molao lerato la ba bantši le tla fola.”—Mateo 24:3-12.

Boporofeta bjo bongwe bja Beibele bo re “mehleng ya bofelo go tla ba le dinako tše di hlobaetšago tšeo go lego thata go lebeletšana le tšona. Gobane batho e tla ba baithati, barati ba tšhelete, ba go ipona, ba ikgogomošago, barogaki, ba go se kwe batswadi, ba go se leboge, ba go se botege, ba ba se nago maikwelo a borutho a tlhago, ba ba sa ikemišetšago go amogela tumelelano le ge e le efe, bathomeletši, ba se nago boitshwaro, ba bogale, ba go se rate go loka, baeki, ba hlogo-thata, ba tletšego boikgantšho, ba ratago maipshino go e-na le go rata Modimo, ba ba nago le sebopego sa boineelo go Modimo eupša ba latola matla a bjona.”—2 Timotheo 3:1-5.

O ka dumela gore seo se bolelwago ka “mehla ya bofelo” se bontšha tlwaa mehla yeo re phelago go yona. Go na le bohlatse bjo bontši bja gore ga bjale ke nako ya go phethagala ga boporofeta bjo bo latelago bja Beibele: “Mehleng ya dikxoši tšeo, ké mo Modimo a tl’o xo tsoša mmušô wo o ka se kexo wa šwalalanywa neng le neng, wo o ka se kexo wa selêla xo sethšaba se sengwê. O tlo phšatla mebušô e mengwê ka moka wa e fediša; xe e le wôna, o tlo êma xo ya xo ile.”—Daniele 2:44.

Go buša ga Mmušo moo go tlago go dirwa ke “Kxoši ya kaxišô” go tla tloša dilo ka moka tšeo di tlago go šitišana le khutšo ya bao ba tlago go phologa phedišo ya lefase le. (Jesaya 9:5) Boporofeta bja Beibele bo holofetša gore: “Lefase le a feta gomme go bjalo le ka kganyogo ya lona, eupša yo a dirago thato ya Modimo o dula a le gona ka mo go sa felego.” (1 Johane 2:17) Phedišo ye ya lefase e tla dumelela batho bao ba dirago thato ya Modimo gore ba thabele seo se ilego sa lahlegela moloko wa batho nakong ya ge batswadi ba rena ba pele, Adama le Efa, ba rabela malebana le Modimo.

 Bophelo bjo bo Lego Kgaufsi

Jesu o hlalositše gore: “Nakong ya go bopša lefsa ga dilo, . . .Morwa wa motho [o] dula sedulong sa gagwe sa bogoši sa letago.” (Mateo 19:28) “Go bopša lefsa ga dilo” mo ke’ng? Phetolelo e nngwe e diriša polelwana e rego, “xo mphsafala tšohle.” (Beibele ya Sepedi) Pego ya Beibele e sepedišanago le yeo e bitša nako yeo gore ke “tshepedišong e tlago ya dilo.” (Luka 18:30) Ka nako yeo Jesu o tla diriša matla a gagwe a taolo ao a a filwego ke Modimo e le Kgoši ya Kagišo goba Khutšo ka go nea bohle bao ba bontšhitšego tumelo sehlabelong sa gagwe sa topollo bophelo bjo bo sa felego.—Johane 5:21.

Tshepedišong e mpsha ya Modimo ya dilo, batho ba tla thabela bophelo bja go swana le bjoo Modimo a bego a bo file Adama le Efa ge a be a ba bea Paradeiseng ya lefaseng. Gopola gore Modimo o ba laetše gore ba be le bana, ee, ba ‘tlale lefase ba be ba le fenye.’ Kabelo ya bona e be e le gore ba katološetše Paradeise ya bona ya Edene lefaseng ka bophara! (Genesi 1:28) Ka mo go swanago, nakong ya go bopša lefsa ga dilo, lefase le tla ba le tletše ka baphologi ba phedišo ya lefase le, bana ba bona le bao ba bego ba hwile eupša ba boetše bophelong ge ba tsošwa. Kabelo ya ba ba bjalo e tla ba gore ba tšee karolo go direng lefase paradeise, bjalo ka ge Modimo a rerile mathomong.

Ela hloko tše dingwe tša ditšhegofatšo tšeo Beibele e bontšhago gore batho ba lego lefaseng leo le lefsa la go loka ba tla di thabela.—2 Petro 3:13.

 Gaešita le ge dikholofetšo tšeo di bontšhitšwego matlakaleng a go bonagala go ka ba thata go di dumela, ruri di tla ba gona “tshepedišong e tlago ya dilo.” Ge Jesu a be a rapela Modimo, o ile a bolela seo se nyakegago gore batho ba tle ba thabele ditšhegofatšo tše, ge a be a re: “Se se bolela bophelo bjo bo sa felego, gore ba hwetše tsebo ka wena Modimo a nnoši wa therešo le ka yo o mo romilego, Jesu Kriste.” (Johane 17:3) Anke o be gare ga bao ka boikokobetšo ba tsomago tsebo ye yeo e neago bophelo.

[Ntlhakgolo go letlakala 15]

“Leina la xaxwe ké . . . Tatê wa xo sa felexo, Kxoši ya kaxišô. Mmušô wó ké wa kênêlô, wa khutšô ye e sa felexo.”—Jesaya 9:5, 6

[Lepokisi/Seswantšho go letlakala 16, 17

Magae le Mošomo Bakeng sa Bohle

“Nywakô ye ba e axaxo ba tlo dula mo xo yôna. . . Ba ka se kê ba lema xwa ja o šele.”—Jesaya 65:21, 22.

Motlalo wa Dijo Bakeng sa Bohle

“Lefase le nthšitše dikenyô tša lôna.” “Xo tlo ba le mohora wa mabêlê, mo naxeng.”—Psalme 67:6; 72:16.

Khutšo ya Lefase ka Moka e tla Kgoma le Diphoofolo

“Phiri e tlo dula le kwanyana; nkwê e tlo hutama le putšanyana, . . . di xapye ke mošemanyana.”—Jesaya 11:6.

Ntwa e tla Fedišwa, go be le Khutšo ya ka mo go sa Felego

“Xo ka se bê le sethšaba se se tl’o xo tšwêla se sengwê lerumô; batho ba tlo lesa xo ithuta xo hlabana.” “Mmušô wó ké wa kênêlô, wa khutšô ye e sa felexo.”—Jesaya 2:4; 9:6.

Baratiwa ba ba Hwilego ba tla Tsošwa

“Nako e a tla yeo ka yona bohle bao ba lego mabitleng a kgopotšo ba tlago go kwa lentšu la [Jesu] gomme ba tšwa.”—Johane 5:28, 29.

Ga go sa na Bolwetši Goba Lehu

“Mo xo ba ba axilexo fá xo ka se bê le e a rexo: Ke a babya!” “Lehu le ka se hlwe le sa ba gona . . . Dilo tša pele di fetile.”—Jesaya 33:24; Kutollo 21:3, 4.