Lebaka Leo ka Lona a Lego Bohlokwa Kudu

EŠETŠE e le nywaga e 2 000 go dutše go lebišitšwe tlhokomelo matswalong a Jesu. Go ya ka ngaka ya lekgolong la pele la nywaga e lego Luka, kgarebe yeo e bitšwago Maria e ile ya botšwa ke morongwa gore: “Bona! o tla ima popelong ya gago gomme wa belega morwa, leina la gagwe o mmitše Jesu.” Ke’ng seo moromiwa wa morongwa a ilego a se bolela ka Jesu? O ile a re: “Yo e tla ba yo mogolo gomme o tla bitšwa Morwa wa Yo Godimo-dimo. . . . O [Jesu] tla buša e le kgoši,” gomme “mmušo wa gagwe o ka se fele.”—Luka 1:31-33.

Ruri seo ke se batho ba se nyakago—mmuši wa lefase yo a lokilego yo a tlago go laola ditaba tša lefase ka tsela e lerato! Ke therešo gore nako e telele pele ga go belegwa ga Jesu, Beibele e ile ya bolela e sa le pele gore: “Re tswaletšwe ngwana re neilwe morwa, yo pušô e lexo lexetleng la xaxwe. Leina la xaxwe ké . . . Tatê wa xo sa felexo, Kxoši ya kaxišô. Mmušô wó ké wa kênêlô, wa khutšô ye e sa felexo.”—Jesaya 9:5, 6.

Mmušo wa go loka le khutšo—a kholofelo e thabišago gakaakang! Eupša ela hloko gore mmušo wo go boletšwe ka wona e sa le pele gore o tla ba magetleng a kgoši—“Kxoši ya kaxišô”—gomme seo sa utolla gore Kgoši ya dilo ka moka, e lego Modimo Ramatlaohle, e nea Morwa wa Yona bobuši bjo bjalo. Ka gona, Jesu o boletše leboelela gore mmušo wo woo a tlago go ba Kgoši ya wona o tla bitšwa, “mmušo wa Modimo.”—Luka 9:27, 60, 62.

Mathomong a bodiredi bja gagwe Jesu o ile a re: “Ke swanetše go bolela ditaba tše dibotse tša mmušo wa Modimo, gobane ke sona se ke se rometšwego.” (Luka 4:43) Jesu o ile a ba a ruta balatedi ba gagwe go rapelela gore Mmušo wa Modimo o tle. (Mateo 6:9, 10) Makasine wa Christianity and Crisis o re, “Mmušo e be e le taba-kgolo ya thuto ya [Jesu],” gomme wa oketša ka gore: “Ga go na taba e nngwe yeo e bego e duma mogopolong wa gagwe goba yeo e bego e le bohlokwa kudu molaetšeng wa gagwe. Go bolelwa ka wona ka makga a makgolo dipegong tša Ebangedi.”

Dipotšišo Tšeo di Swanetšego go Elwa Hloko

O nagana eng ka Jesu lehono? Ka tlwaelo, nakong ye ya ngwaga, Jesu o lebelelwa e le lesea leo le lego ka legopong. Le gona ke therešo gore o ile a ba lesea leo le sa kgonego go dira selo ka lebakanyana. (Luka 2:15-20) Eupša na yeo ke yona tsela yeo a swanetšego go gopolwa kudu ka yona? Anke o nagane ka taba ye, Ke ka baka la’ng Jesu a ile a belegwa e le motho? Ge e le gabotse e be e le mang?

Encarta Yearbook ya 1996 e ile ya botšiša gore, “Na Jesu Morwa wa Modimo, e be e le Mesia yo a holofeditšwego wa Beibele ya Seheberu? Goba na e be e fo ba motho, mohlomongwe yo a sa tlwaelegago, eupša lega go le bjalo e le motho?” Dipotšišo tše bjalo di nyaka gore go naganišišwe kudu ka tšona. Ka baka la’ng? Ka gobane  bophelo bja rena le lethabo la rena di ithekgile ka tsela yeo re lebelelago Jesu ka yona le ka karabelo ya rena. Beibele e re, “Yo a dumelago go Morwa o na le bophelo bjo bo sa felego,” eupša “yo a sa kwego Morwa a ka se ke a bona bophelo.”—Johane 3:36.

E be e se Motho Feela

Ka morago ga go hlalosa mediro ya Jesu ya tempeleng ya kua Jerusalema ge a be a e-na le nywaga e 12, Beibele e re o ile a boela gae a e-na le Maria le monna wa gagwe, Josefa, gomme “[Jesu] a tšwela pele a ikokobeleditše bona.” (Luka 2:51, 52) Eupša ka morago ga gore Jesu a gole, go ile gwa bonagala gore e be e se motho feela.

Ge Jesu a be a homotša lewatle leo le bego le akga-akgwa ke ledimo, mogwera yo a bego a tšhogile o ile a re: “Gabotse-botse yo ke mang?” (Mareka 4:41) Mafelelong, Jesu o ile a išwa go Mmušiši wa Roma e lego Pontio Pilato ka ditatofatšo tša maaka. A kgodišegile gore Jesu ga a na molato e bile a kgomilwe ke seriti sa Jesu go sa šetšwe tshwaro e mpe le go swarwa ka tsela ya go hloka toka, Pilato ka go hlompha Jesu o ile a mo tliša pele ga lešaba, gomme a re: “Bonang! Motho yo!” Eupša Bajuda ba fetola ka gore: “Re na le molao gomme go ya ka molao, o swanetše go hwa, gobane o itirile morwa wa Modimo.”—Johane 19:4-7.

Ge a e-kwa gore Jesu o bitšwa “morwa wa Modimo,” Pilato o ile a tšhoga. Pejana o ile a botšwa ka toro ya mosadi wa gagwe ya mabapi le Jesu, yoo mosadi wa gagwe a ilego a mmitša “moloki yoo.” (Mateo 27:19) Ka gona, Pilato o ile a ipotšiša gore ge e le gabotse Jesu yo ke mang! Gaešita le ge a be a tseba gore Jesu o tšwa Galilea, Pilato o ile a botšiša gore: “O tšwa kae?” Ge Jesu a gana go araba, kapejana poledišano e ile ya fela.—Johane 19:9, 10.

Go molaleng gore Jesu e be le motho, eupša o be a sa swane le batho ba bangwe ka baka la gore peleng o ile a ba motho wa moya, yo legodimong a tsebjago e le Lentšu. Ke moka bophelo bja gagwe bo ile bja fetišetšwa ka mohlolo popelong ya Maria. Moapostola Johane o ile a hlatsela gore, “Lentšu e bile nama, a tla a dula le rena.”—Johane 1:1, 2, 14, 18; Kutollo 3:14.

Lebaka le Bohlokwa la Gore Modimo a Romele Morwa wa Gagwe wa Legodimong mo Lefaseng

Pele ga ge motho wa pele, Adama, a ka ba le bana, o ile a dira sebe. Morongwa wa lerabele, yo a ilego a tla a bitšwa Diabolo le Sathane, o ile a atlega go mo direng gore a se kwe Modimo. Ka baka leo, Adama o ile a lahlegelwa ke tswalano ya gagwe ya go ba morwa wa Modimo, ka ge Modimo a ile a re go tla ba bjalo ge e ba a ka se kwe. Ka baka leo, Adama o ile a tlaišwa ke ditla-morago tša seo. O ile a ba yo a sa phethagalago, a tšofala gomme mafelelong a hwa.—Genesi 2:15-17; 3:17-19; Kutollo 12:9.

Ge e bolela ka mafelelo ao go se kwe ga Adama go bilego le wona go rena ka moka, ditlogolo tša gagwe, Beibele e hlalosa gore: “Ka motho o tee [Adama] sebe se tsene lefaseng, gomme lehu la tsena ka sebe, ka baka leo lehu le aparetše batho bohle gobane bohle ba dirile sebe.” (Baroma 5:12) Ka manyami, ka moka ga rena re abetše sebe go tšwa go rakgolo-khukhu wa rena  Adama, gotee le ditla-morago tša sona tše kwešago bohloko, e lego botšofadi le lehu.—Jobo 14:4; Baroma 3:23.

Go lokologa ditla-moragong tše bjalo go be go ka kgonega ge feela re ka ba le tate yo a phethagetšego, yo a sego a abela sebe le ditla-morago tša sona tše di kwešago bohloko. Ela hloko kamoo tate yoo yo mofsa, ge a bapetšwa le Adama yo a phethagetšego, go ilego gwa direga gore a be gona.

Yo a Nyakegago o Ile a Newa

Ka ge o tla gopola, “Kxoši ya kaxišô” yeo e holofeditšwego, gape e bitšwa gore ke “Tatê wa xo sa felexo.” Go belegwa ga gagwe e le motho go ile gwa bolelwa e sa le pele ka tsela ye: “Kxarebe e tlo ima, ya bêlêxa morwa.” (Jesaya 7:14; Mateo 1:20-23) Jesu ga se nke a e ba le tate wa motho, gomme le Adama, motho wa pele, ga se nke a e ba le yena. Ge a tšea taba go tloga morago mathomong a histori ya motho, radihistori wa Beibele e lego Luka o bontšha gore Adama o phetše e le “morwa wa Modimo.” (Luka 3:38) Eupša bjalo ka ge re ithutile, Adama o ile a lahlegelwa ke tswalano yeo ya go ba morwa wa Modimo—go lahlegetšwe yena le bana ba gagwe ka moka. Ka gona, le rena ka tsela ya seswantšhetšo re nyaka tate yo mofsa yo a phethagetšego—yo a swanago le Adama nakong ya ge a be a bopša.

Modimo o rometše Morwa wa gagwe go tšwa legodimong go tlo ba Adama yoo yo mofsa e le gore a tšeele wa pele legato. Beibele e re: “‘Motho wa pele Adama e bile moya o phelago.’ Adama wa mafelelo ya ba moya o neago bophelo. Motho wa pele o tšwa lefaseng gomme o dirilwe ka lerole; motho wa bobedi o tšwa legodimong.” (1 Bakorinthe 15:45, 47) Jesu, “Adama wa mafelelo,” o swana le “motho wa pele Adama” ka baka la gore E be e le motho yo a phethagetšego, a kgona go ba tate wa bana ba ba phethagetšego, bao ba bego ba ka kgona go phela ba phethagetše ka mo go sa felego mo lefaseng.—Psalme 37:29; Kutollo 21:3, 4.

Jesu, yo a sa kago a e ba le bana, o ile a dula a botegela Modimo go fihla lehung, go sa šetšwe tlhaselo le ge e le efe ya Sathane. Bophelo bja potego bjo bo phethagetšego bjoo Jesu a ilego a bo nea e le sehlabelo, goba a bo gafa, bo bitšwa topollo. Beibele e hlalosa gore: “Re lokolotšwe [sebeng le lehung tšeo re di abetšego go Adama] ka topollo ka madi a [Jesu].” E bile e re: “Go etša ge ka go se kwe ga [Adama] ba bantši ba ile ba dirwa badiradibe, ka mo go swanago ka go kwa ga [Jesu] ba bantši ba tla dirwa ba lokilego.”—Baefeso 1:7; Baroma 5:18, 19; Mateo 20:28.

Ge e ba re e-na le tumelo go Jesu, o tla ba “Tatê wa xo sa felexo” le “Mophološi” wa rena. O tla diriša go buša ga gagwe e le kgoši ka tsela e kgahlišago, ge a dutše a hlankela e le Kgoši ya Mmušo wa Tatagwe. Ere se se latelago re hlahlobe gore go tla ba bjang go phela ka tlase ga pušo yeo gomme re lebelele gore ke neng moo re ka letelago go tlelwa ke ditšhegofatšo tše bjalo.—Luka 2:8-11.

[Diswantšho go letlakala 13]

O nagana eng ka Jesu lehono?

[Seswantšho go letlakala 14]

Ke ka baka la’ng Jesu a bitšwa “Adama wa mafelelo”?