Modimo o na le Taba!

TSELA ya Modimo ya go swaragana le borabele bjoo bo thomilego kua Edene e bonagatša lerato la gagwe le legolo leo a ratago yo mongwe le yo mongwe wa rena ka lona le go tshwenyega ga gagwe ka bokamoso bja rena. Hle ela hloko bohlatse bjo bo latelago bja gore Modimo ruri o na le taba le rena gomme o diriše Beibele ya gago go bala mangwalo a bontšhitšwego.

❖ O re neile lefase, leo le tletšego botse bja tlhago, diphoofolo tšeo di kgahlišago gotee le naga e enywago dienywa.—Ditiro 14:17; Baroma 1:20.

❖ O re file mmele o makatšago woo o re kgontšhago go hwetša lethabo dilong tšeo di diregago letšatši le letšatši, tše bjalo ka go kwa tatso ya dijo tše bose, go bona letšatši le dikela, go kwa sesego sa ngwana gotee le go kgwathwa ke yo o mo ratago ka tsela e borutho.—Psalme 139:14.

❖ O re fa tlhahlo e bohlale yeo e re thušago go lebeletšana le mathata le dikgateletšo.—Psalme 19:7, 8; 119:105; Jesaya 48:17, 18.

❖ O re fa kholofelo e kgahlišago, go akaretša le tebelelo ya go phela paradeiseng mo lefaseng le go bona tsogo ya baratiwa ba rena bao ba hwilego.—Luka 23:43; Johane 5:28, 29.

❖ O rometše Morwa wa gagwe yo a tswetšwego a nnoši gore a tlo re hwela bakeng sa gore re be le kholofelo ya go phela ka mo go sa felego.—Johane 3:16.

❖ O hlomile Mmušo wa Mesia legodimong gomme a re nea bohlatse bjo bontši bja gore Mmušo woo kgaufsinyane o tla laola lefase ka mo go feletšego.—Jesaya 9:6, 7; Mateo 24:3, 4, 7; Kutollo 11:15; 12:10.

❖ O re laletša gore re mmatamele ka thapelo, go mo tšhollela sa mafahleng a rena, gomme ge re dira bjalo o re theetša e le ka kgonthe.—Psalme 62:8; 1 Johane 5:14, 15.

❖ O kgonthišetša batho kgafetša-kgafetša gore o ba rata ka lerato le le tseneletšego le gore o tshwenyegile kudu ka bona.—1 Johane 4:9, 10, 19.