Mpho yeo e Ilego ya Tšeelwa Godimo Kudu

Bobedi monei le monewa ba hwetša lethabo ge mpho e kgotsofatša senyakwa e bile e lebogwa e le ka kgonthe. E sego kgale, mohlankedi wa mmušo wa maemong a phagamego kua Mexico o ngwaletše ofisi ya lekala ya Dihlatse tša Jehofa go bontšha tebogo ya ge a amogetše kopi ya puku ya Ithute go Morutiši yo Mogolo. Ka boripana, lengwalo la gagwe le re:

“Dikagare tša puku ye di bohlokwa e le ka kgonthe. Ke lemoga gore le ge tsebišo e theilwe pukung ya bogologolo, e nakong e bile e a šoma maphelong a rena a letšatši le letšatši.

“Ke kgodišegile gore bjalo ka batswadi re swanetše go tsenya ka baneng ba rena ditekanyetšo tšeo di ba thušago go lemoga kamoo ba swanetšego go itshwara ka gona, tšeo di ba thušago go ba batho ba nago le bokgoni le bao ba itshwarago ka tlhompho le ka go botega lefaseng leo le hlokago dilo tše. Ka godimo ga tšohle, re swanetše go ba thuša go lemoga gore go na le Mo-ba-Gona yo a Phagamego, yo lerato le yo botho. Ntumeleng ge ke re, puku ye le nthometšego yona e tla nkhola kudu, bobedi mošomong wa-ka le modirong woo batswadi ba o filwego ke Mmopi wa rena, e lego wa go thuša bana ba rena go gola e le gore e tle e be batho ba bagolo bao ba ratago baagišani ba bona.”

Mohlankedi yo wa mmušo o lemogile bohlokwa bja dithuto tšeo di hwetšwago dithutong le mohlaleng wa Jesu Kriste tšeo di bontšhitšwego ka pukung ya Ithute go Morutiši yo Mogolo. Le wena o ka ikhweletša kopi ya puku ye yeo e nago le diswantšho tše dibotse ya matlakala a 256, yeo e nago le matlakala a lekanago le makasine wo ka bogolo. O ka kgopela kopi ka go tlatša setlankana se se lego ka mo tlase gomme o se romele atereseng yeo e bontšhitšwego mo setlankaneng goba atereseng e swanetšego e lokeleditšwego go letlakala 5 la makasine wo.

□ Hle ke tla rata gore le ntlišetše kopi ya puku e bontšhitšwego mo. Bontšha gore ka leleme lefe.

□ Hle ikopanyeng le nna mabapi le thuto e sa lefelelwego ya legae ya Beibele.