Pono ya Beibele

Na o ka Thuša Bahu?

“Go tloga mathomong Kereke e be e . . . rapelela [bahu] . . . e le gore, ge ba se na go sekišwa, ba ka kgona go bona Modimo ba thabile.”—“Catechism of the Catholic Church.”

MERAFO ka moka ya batho e tshwenyegile ka boemo bja bahu. Mohlomongwe o ile wa nyama le go ikwa o lahlegetšwe ge yo o mo ratago a e-hwa. O ka ipotšiša gore na bao ba hwilego ba tšwela pele ba phela e le ka kgonthe, gore na ba a tlaišega goba gore na ba na le khutšo le gore na go na le seo o ka se dirago bakeng sa go ba thuša.

Batho ba bantši ba bodumedi ba dumela gore ba ka thuša bahu. Ka mohlala, ma-Hindu a dumela gore ge a tšhuma setopo sa moratiwa wa ona khwiting ya Noka ya Ganges le go gaša molora wa gagwe ka meetseng a yona, a ka kgonthišetša lethabo la ka mo go sa felego bakeng sa moya (soul) wa motho yo a hwilego. Kua Bohlabela, ma-Buddha a tšhuma diswantšho tša pampiri tša dikoloi, magae, diaparo le tšhelete, e le ge a dumela gore mohu o tla kgona go diriša dilo tše bjalo lefaseng leo a ilego go lona. Afrika gona, go tšhelwa bjala mabitleng ka kgopolo ya gore bahu ba tla holwa ke dineo tše bjalo.

Bokatholika bo ruta gore ge motho a ka hwa a sa itshole ka ge a dirile ‘sebe se itšego sa ka boomo,’ o ipakela go se amogelwe ke Modimo. Boemo bjo “go thwe ke ‘hele.’” Ka lehlakoreng le lengwe, bo ruta gore motho yoo a amogelwago ke Modimo a ka ba le kholofelo ya go hwetša “lethabo le legolo, la ka mo go sa felego” a e na le Modimo legodimong, eupša o swanetše gore pele a be yo a sekilego ka mo go phethagetšego. Tshekišo ye e ka nyaka gore a fetše nako a le pakatoring bakeng sa  go kgotlelela “mollo wa tlhwekišo” e le kotlo ya dibe tšeo di ka lebalelwago. Lega go le bjalo, ge a le pakatoring, motho a ka thušwa ka go rapelelwa—dithapelo tša go lopa tšeo di fetišwago ka leina la kereke—le ka go mo swarela Mmisa. Ditirelo tše bjalo gantši di lefelelwa ke bagwera le ba leloko babo mohu.

Ke ga tlhago go nyaka go dira sohle seo o ka se kgonago go imolla baratiwa ba gago tlaišegong le ga e le efe yeo ba ka bago ba le go yona. Ge nkabe go ba thuša go be go kgonega, na Modimo o be a ka se hlalose ka mo go kwagalago gore seo se ka dirwa bjang? Anke re boneng seo Beibele e se rutago mabapi le go thuša bahu.

Boemo bja Bahu

Mekgwa ka moka yeo go boletšwego ka yona ka mo godimo e theilwe tumelong ya moya o sa hwego, e lego gore, karolo e itšego ya motho e tšwela pele e phela ka morago ga ge mmele wa gagwe o hwile. Na Beibele e ruta seo? E re: “Ba ba phelaxo ba tseba xore ba tlo hwa; ’me xo bahu xa xo se se tsebyaxo, xa ba sa newa selô, xobane ba lebetšwe. Xobane leratô la bôná, lehlôyô la bôná, lehufa la bôná, di fedile kxalê; xa ba sa na kabêlô neng le neng ya se se kaxo dirwa fá tlase xa letšatši. Tšohle tše ’atla sa xaxo se di kxônaxo, di dirê ka matla a xaxo, xobane kwa bo-dula-bahu [Sheole, NW] mo O yaxo xôna, xa xo na modirô, xa xo na kxopolô, xa xo tsebô le bohlale.” (Mmoledi 9:5, 6, 10) Sheole e fo ba e le lentšu la Seheberu leo le bolelago lebitla le le tlwaelegilego la batho.

Mopsalme yo a buduletšwego o ngwadile mabapi le mafelelo a lehu bathong gore: “Môya wa motho o a tloxa, ’me yêna o boêla mmung wa xaxwe; mohla woo ké mo xo fêlaxo maanô a motho.”—Psalme 146:4.

Seo Beibele e se bolelago se ka botwa e bile se a kwagala. O nagana’ng ka se? Na tate yo lerato a ka tlaiša bana ba gagwe ka baka la ditshekamelo tša sebe tšeo e lego karolo ya tlhago ya bona? (Genesi 8:21) A ka se ke le gatee. Ka gona Tatago rena wa legodimong o tla be a direla’ng selo le ga e le sefe se se swanago le seo? Ge ba bangwe kua Isiraeleng ya bogologolo ba be ba amogela tirelo ya boheitene ya go direla medimo ya maaka dihlabelo ka go tšhuma bana ba bona, Jehofa o ile a sola mokgwa o bjalo wo o selekišago, a ba a re ke ‘tše di sa kago tša ba tša rotoga pelong ya gagwe.’—Jeremia 7:31.

Mafelelo a dibe tša motho ke lehu, e sego tlaišo ya ka morago ga lehu. Go ya ka Mangwalo, “moputso woo sebe se o lefago ke lehu,” gomme “yo a hwilego o hunologile sebeng sa gagwe.”—Baroma 5:12; 6:7, 23.

Bahu ga ba tlaišege. Go e na le moo, go bjalo ka ge eka ba robetše boroko bjo bogolo, ba sa kwe selo—e ka ba se se thabišago goba se se sa thabišego. Ka gona, go molaleng gore maiteko ao batho ba a dirago go thuša bahu ga a dumelelane le dithuto tša Beibele.

Go na le Kholofelo Efe ka Bahu?

Se ga se re gore baratiwa ba gago bao ba hwilego ba tla dula ba sa kwe selo go ya go ile. Ka mo go fapanego, ditebelelo tša bona ke tše di kgahlišago.

Pele a bušetša mogwera wa gagwe yo a rategago Latsaro bophelong, Jesu o ile a re o be a e ya go “mo tsoša borokong.” (Johane 11:11) Lebakeng le lengwe o ile a bolela gore ‘bohle bao ba lego mabitleng a kgopotšo ba tlo kwa lentšu la gagwe gomme ba tšwa.’ (Johane 5:28, 29) Bao ba tsošitšwego ba tla be ba šetše ba hunolotšwe dibeng tša bona tša nakong e fetilego gomme ka go rialo ba ka se ke ba tlaišega ka baka la seo ba ilego ba se dira nakong e fetilego ya ge ba be ba sa phela. Ba tla ba le sebaka sa go ithuta go thabela bophelo maemong a phethagetšego. A tebelelo e kgahlišago gakaakaang!

Ge e le gore tebelelo yeo e a go kgahla, o se ke wa dika-dika go kgonthišiša go botega ga dikholofetšo tše. Dihlatse tša Jehofa di tla thabela go go thuša.

NA O KILE WA IPOTŠIŠA?

▪ Na bahu ba na le seo ba se kwago?—Psalme 146:4; Mmoledi 9:5, 6, 10.

▪ Na Modimo a ka dumelela bahu ba tlaišega diheleng tše tukago?—Jeremia 7:31.

▪ Na go na le kholofelo ka bahu?—Johane 5:28, 29.