Bafsa ba a Botšiša . . .

Nka Fenya Bjang Mokgwa wo?

“Ke thomile go tsoša ditho tša pelego ge ke be ke e-na le nywaga e seswai. Ka morago ke ile ka ithuta pono ya Modimo ka mokgwa woo. Ke be ke nyama kudu ka mehla ge ke be ke ineela go tsošeng ditho tša pelego. Ke be ke ipotšiša gore: ‘Modimo a ka rata bjang motho yo a swanago le nna?’ Ke be ke ikwa ke kgonthišegile gore nka se phologele lefaseng le lefsa la Modimo.”—Luiz. *

MOHLOMONGWE le wena, bjalo ka Luiz, o be o dutše o le lekgoba la mokgwa wa go tsoša ditho tša pelego. O a tseba gore Jehofa o tla thaba ge o ka ganetša kganyogo ya go dira bjalo gomme wa bonagatša boitshwaro, e lego seenywa sa moya wa Modimo o mokgethwa. (Bagalatia 5:22, 23; 2 Petro 1:5, 6) Eupša ka dinako tše dingwe o a ineela. Ka morago ga poelo morago e nngwe le e nngwe, o phetha ka gore o motho yo a ka se kgonego go fetoša ditsela tša gagwe, le gore ga o kgone go phela ka ditekanyetšo tša Modimo tša go loka.

Pedro yo monyenyane le yena o be a ipona ka yona tsela yeo. O re: “Ge ke be ke boela mokgweng woo, ke be ke nyama kudu. Ke be ke nagana gore nka se tsoge ke lefeletše seo ke se dirilego. Ke be ke thatafalelwa ke go rapela. Ke be ke tla thoma ka gore: ‘Jehofa, ga ke tsebe gore na o tla kwa thapelo ye, eupša . . . ’” Lesogana leo le bitšwago André le be le nagana ka tsela e swanago. Le re: “Ke be ke ipona ke le moikaketši. Ke be ke thatafalelwa ke go tsoga mesong gomme ke dire mediro ya letšatši. Go ba dibokeng goba go tšea karolo bodireding go be go le thata.”

Ge e le gore o ikwa bjalo ka Luiz, Pedro, goba André, beta pelo. Ga se wena feela o nago le bothata bjoo e bile taba ya gago ga se yeo e kago hlobogwa! Bafsa ba bantši—gotee le batho ba bagolo—ba ile ba lwa le mokgwa wa go tsoša ditho tša pelego gomme ba kgona go o fenya. Le wena o ka o fenya. *

Go Lebeletšana le go Ipona Molato

Bjalo ka ge go šetše go boletšwe, bao ba nago le mokgwa wa go tsoša ditho tša pelego gantši ba hlaselwa ke go ipona molato. Ka ntle le pelaelo,  go “nyamišwa . . . ka tsela ya go boifa Modimo” go ka go šušumeletša go fenya mokgwa wo. (2 Bakorinthe 7:11) Eupša go ipona molato ka tsela e feteletšego go ka mpefatša boemo. Go ka go nyamiša kudu moo e lego gore o ka tsoma go bea fase.—Diema 24:10.

Ka gona, katanela go lebelela dilo ka tsela e swanetšego. Go tsoša ditho tša pelego ke sebopego sa go se hlweke. Go ka go dira ‘lekgoba la dikganyogo tše fapa-fapanego le maipshino,’ gomme gwa go dira gore o be le mekgwa yeo e senyago kgopolo. (Tito 3:3) Lega go le bjalo, go itsoša ditho tša pelego ga se sebopego sa boitshwaro bjo bo gobogilego bja tša botona le botshadi, bjo bjalo ka bootswa. (Baefeso 4:19) Ka baka leo, ge e le gore o na le bothata bja go tsoša ditho tša pelego, o se ke wa phetha ka gore o dirile sebe seo se sa lebalelwego. Se bohlokwa ke gore o ganetše kganyogo ya go dira bjalo gomme o se ke wa bea fase le ka mohla!

Ka dinako tše dingwe go bonolo go nyama kudu ge o se na go boela mokgweng woo. Ge seo se direga, gopola mantšu a Diema 24:16 a rego: “Moloki, le xe a ka wa xašupa, ó tlo fêla a tsoxa; ’me ba babe ba wêla bobeng.” Go boela mokgweng ka nakwana ga go go dire motho yo kgopo. Ka gona o se ke wa bea fase. Go e na le moo, bona gore ke eng seo se lebišitšego go boeleng mokgweng woo gomme o leke go se phema.

Go e na le go dula o ikomanya ka baka la bothata bjoo o nago le bjona, tšea nako o naganišiša ka lerato la Modimo le kgaugelo ya gagwe. Mopsalme Dafida, yoo le yena a ilego a dira diphošo, o boletše gore: “Morêna ó šôkêlwa ba ba mmoifaxo byalo ka tata xo bana xe a xauxêla bana b’axwe. Xobane Yêna ó tseba lebopô le re lexo ka lôna, xa a lebale xe re le lerole.” (Psalme 103:13, 14) Ee, Jehofa o lemoga gore ga ra phethagala gomme ke “molebaledi” ge re dira diphošo. (Psalme 86:5) Ka lehlakoreng le lengwe, o nyaka re dira maiteko a go lokiša boemo.

Ke megato efe e šomago yeo o ka e gatago gore o fenye mokgwa wa gago le gore o pheme go boela mokgweng woo?

Bohlokwa bja go Bolela le yo Mongwe

Go sa šetšwe kamoo kopano ya botona le botshadi e tumilego ka gona dinageng tše dintši, batho ba bantši ba sa thatafalelwa ke go bolela ka kopano ya botona le botshadi ka tsela e tseneletšego le e nago le seriti. Go nyama go ka ba gwa go dira gore o thatafalelwe ke go bolela le motho ka taba ye. Mokriste yo mongwe yo a kilego a lwa le mokgwa wa go tsoša ditho tša pelego ka nywaga e mmalwa o hlalositše gore: “Ruri ke duma ge nkabe  ke ile ka beta pelo gomme ka bolela le yo mongwe ka taba ye ge ke be ke sa le mofsa! Maikwelo a go ipona molato a ile a ntlhasela ka nywaga e mentši gomme a ile a tloga a kgoma tswalano ya-ka le ba bangwe gampe e bile go feta moo a ile a kgoma tswalano ya-ka le Jehofa gampe.”

O swanetše go bolela le mang? Motho yo kaone-kaone yo o ka bolelago le yena e ka ba motho yoo a godilego moyeng, kudu-kudu motswadi. O ka thoma ka gore: “Na nka bolela le wena ka bothata bjo bo ntshwenyago kudu?”

Mário o ile a kgetha go bolela le tatagwe, yoo a ilego a itlhatsela e le yo a kwelago bohloko kudu le yo a kwešišago. O ile a ba a botša Mário gore le yena o ile a lwa le mokgwa woo ge a be a sa le yo monyenyane. Mário o re: “Potego ya tate le go bolela ga gagwe ka go tšwa pelong go ile gwa nkgothatša kudu. Ke ile ka ipotša gore ge e le gore o ile a kgona go fenya bothata bjo, le nna nka bo fenya. Boemo bja tate bja kgopolo bo ile bja nkgoma kudu moo ke ilego ka ba ka lla.”

André o rapile sebete sa go bolela le mogolo wa Mokriste gomme o thabela gore o ile a dira bjalo. * André o re: “Ge mogolo a be a ntheeditše, mahlo a gagwe a ile a tlala megokgo. Ge ke fetša, o ile a nkgonthišetša gore Jehofa o a nthata. O ile a mpotša gore bothata bja-ka ke bjo bo tlwaelegilego. O ile a nkholofetša gore o tla hlokomela tšwelopele ya-ka le gore o tla ntlišetša tsebišo e oketšegilego e tšwago dithušong tša go ithuta Beibele. Ke ile ka mmotša gore ke ikemišeditše go tšwela pele ke e-lwa—gaešita le ge nka fela ke boela mokgweng woo.”

Ka go swana le Mário le André, o ka hwetša thušo maitekong a gago a go fenya mokgwa wa go tsoša ditho tša pelego. Latela keletšo e lego lepokising leo le sepedišanago le sehlogo se leo le rego, “E-lwa ka Thata!” Ee, kgonthišega gore o ka fenya ntweng ye!

Lelokelelo la dihlogo tše oketšegilego tša “Bafsa ba a Botšiša . . . ” di ka hwetšwa go mokero wa Web wa www.watchtower.org/ype

SEO GO KA NAGANWAGO KA SONA

▪ Ke ka baka la’ng go le bohlokwa go gopola gore Jehofa ke “molebaledi”?—Psalme 86:5.

▪ Ke megato efe yeo o tlago go e gata gore o fenye mokgwa wa go tsoša ditho tša pelego?

▪ Ke ka baka la’ng o se wa swanela go ja ke dihlong tša go kgopela thušo?

▪ O ka tsepamiša mogopolo gakaone bjang dilong tše di hlwekilego?

[Mengwalo ya ka tlase]

[Lepokisi/Seswantšho go letlakala 19]

Go Boela Mokgweng Gape ga go Bolele Gore o Paletšwe!

Go bonolo gakaakang go nagana gore: ‘Ke paletšwe, ka gona nka upja ka bea fase.’ Lwantšha maikwelo ao. Gana go dumelela go palelwa ga nakwana, goba gaešita le go palelwa gantši go go dira gore o ikwe o fentšwe.

Ela hloko seswantšho se: Ge e ba o be o sepela lelokelelong la manamelo gomme wa thelela wa boela morago ka kgato e tee goba tše pedi ka baka la go kgopja, na o be o tla nagana gore, ‘Ke tla fo swanelwa ke go boela morago mathomong a manamelo gomme ke thomološe’? Le gatee ga go bjalo! Ka gona, ke ka baka la’ng o swanetše go diriša kgopolo ye ya maaka go lwantšheng mekgwa e mebe?

Gantši maikwelo a molato a tla ka morago ga go palelwa. Mo gongwe o ka feteletša maikwelo a ka go phetha ka gore ga o kgone, gore o motho yo a fokolago gomme ga o swanelwe ke selo lege e le sefe se sebotse. O se ke wa itumelela go nwelela maikwelong a bjalo a feteletšego a molato. A go amoga matla ao o a nyakago bakeng sa go tšwela pele ntweng. Gopola se: Motho yo a phagamego kudu yo a kilego a phela lefaseng le, Jesu Kriste, o be a tletše go lopolla badira-dibe, e sego batho bao ba phethagetšego. Ka gona ga go le o tee wa rena yo a tlago go dira dilo ka mo go phethagetšego mo nakong ye.—Le tšwa ka go Phafoga! ya April 8, 1991, letlakala 15.

[Lepokisi/Seswantšho go letlakala 20]

E-lwa ka Thata!

▪ Gapeletša kgopolo ya gago go nagana ka dilo tše dingwe.—Bafilipi 4:8.

▪ Phema go bogela dilo tšeo di tlago go tsoša dikganyogo tše sa swanelago.—Psalme 119:37.

▪ Rapelela “matla a fetago a tlwaelegilego.”—2 Bakorinthe 4:7.

▪ Swarega ka mediro ya Bokriste.—1 Bakorinthe 15:58.

[Lepokisi/Seswantšho go letlakala 20]

Thušo e Oketšegilego

Go hwetša tsebišo e oketšegilego ya kamoo o ka fenyago mokgwa wa go tsoša ditho tša pelego, bona kgaolo 25 le 26 tša puku ya Dipotšišo tša Bafsa . . . Dikarabo tše Šomago, e gatišitšwego ke Dihlatse tša Jehofa.