Potšišo e Thata go di Feta

“KE KA baka la’ng?” Ke mo go nyamišago kudu go bona gore ke manyami a makaaka’ng le bohloko bjo bokaaka’ng tšeo di ka hlaloswago ka polelwana yeo e bonolo. Batho gantši ba botšiša potšišo yeo ka morago ga go welwa ke kotsi goba masetlapelo: Ledimo le lešoro le gogola naga, la šia batho ba hwile e bile le sentše. Tšhišinyego ya lefase e fetoša toropo lerope. Tlhaselo ya botšhošetši e dira gore letšatši le lebotse leo le tlwaelegilego e be leo le boifišago le le lešoro. Goba kotsi e gobatša motho yo re mo ratago goba ya mmolaya.

Ka manyami, gantši bahlaselwa ba akaretša batho bao ba tlogago ba se na molato le bao ba ka se iphemelego ba lego gare ga rena. Morago bjale go bile le bontši bja dikotsi tše bjalo tšeo di dirilego gore batho ba bantši ba llele Modimo ka gore, “Ke ka baka la’ng?” Ela hloko mehlala e mengwe:

▪ “Modimo, ke ka baka la’ng o re dirile se? Re go befedišitše ka’ng?” Lekgotla la ditaba la Reuters le begile gore mokgekolo yo mongwe kua India o botšišitše dipotšišo tšeo ka morago ga ge tsunami e sentše motse woo a bego a dula go wona.

▪ “Modimo o be a le kae? Le gona ge e le gore Modimo ke yena a laolago dilo ka mo go feletšego, ke ka baka la’ng a dumeletše selo se se direga?” Dipotšišo tše di ile tša rotošwa ke kuranta ya kua Texas, U.S.A., ka morago ga ge motho yo a bego a swere sethunya a thuntšhitše batho ka kerekeng, a gobaditše le go bolaya barapedi ba mmalwa.

▪ “Ke ka baka la’ng Modimo a dumeletše gore a hwe?” Mosadi o botšišitše potšišo ye ka morago ga ge kankere e bolaile mogwera wa gagwe, gomme ya dira gore monna yo a hwetšwego a šale a hlokometše bana ba bahlano.

Batho ba ga se bona feela bao ba naganago gore ka tsela e itšego Modimo a ka ba a bakile mathata a bona. Ka mohlala, mabapi le dikotsi tša tlhago, mo e nyakilego go ba seripa-gare sa bao ba arabetšego nyakišišong ya morago bjale e dirilwego ka Internet, ba bona nke dikotsi tša tlhago tše bjalo ka madimo a mašoro di tšwa go Modimo. Ke ka baka la’ng batho ba bantši gakaakaa ba ikwa ka tsela yeo?

Kgakanego e Bakwago ke Bodumedi

Go e na le go nea dikarabo tše kgotsofatšago, baetapele ba bodumedi gantši ba baka kgakanego. Anke re lebišeng tlhokomelo go tše tharo feela tša dikarabo tšeo ba tlwaetšego go di nea.

Ya mathomo, baetapele ba bantši ba bodumedi ba re Modimo o baka dikotsi tša tlhago bakeng sa go otla batho ba hlogo tše thata. Ka mohlala, kua United States, ka morago ga ge Ledimo la Katrina le sentše New Orleans, Louisiana, baruti ba bangwe ba ile ba bolela gore Modimo o be a otlile toropo yeo. Ba ile ba re go atile kgobogo, go petšha le boitshwaro bjo bo gobogilego. Ba bangwe ba ile ba hlatsela seo ka go tsopola Beibele, ba šupa dinako tšeo ka tšona Modimo a ilego a fediša batho ba kgopo ka meetse-fula goba ka mollo. Lega go le bjalo, dipolelo tše bjalo di tlontlolla Beibele.—Bona lepokisi, “Na ke Ditiro tša Modimo?”

Ya bobedi, baruti ba bangwe ba bolela gore Modimo o na le mabaka a kwagalago a go tlišetša batho masetlapelo eupša mabaka ao re ka se a kwešiše. Batho ba bantši ba bona kgopolo e bjalo e le e sa kgotsofatšego. Ba ipotšiša gore, ‘Na ruri Modimo yo a nago le lerato a ka dira bobe bjo bobjalo gomme a gana go sedimoša bao ba tlogago ba tsoma khomotšo e bile ba botšiša gore, “Ke ka baka la’ng?”’ Ee, Beibele e re: “Modimo ke lerato.”—1 Johane 4:8.

Ya boraro, baetapele ba bangwe ba bodumedi ba nagana gore mohlomongwe Modimo ga  a na matla e bile ga a na lerato. Gape-gape, tlhaloso e bjalo e rotoša dipotšišo tše bohlokwa. Na Yoo a ‘bopilego dilo ka moka’—go akaretša le legohle le legolo ka tsela e sa latišegego—ga a kgone go thibela tlaišego yeo e lego mo polaneteng e tee? (Kutollo 4:11) Yoo a re felego bokgoni bja go rata, yo Lentšu la gagwe le rego ke mohlala o mobotse wa lerato, a ka palelwa bjang ke go šokela batho ge ba tlaišega?—Genesi 1:27; 1 Johane 4:8.

Ke therešo gore dintlha tše tharo tšeo go sa tšwago go bolelwa ka tšona ka mo godimo e fo ba tše dingwe tša ditsela tšeo ka tšona batho ba lekago go hlalosa lebaka la Modimo la go dumelela tlaišego—e lego potšišo yeo ka nywaga-kgolo e tshwentšego batho bao ba naganago. Sehlogong se se latelago, re tla ahla-ahla seo Beibele e se rutago ka taba ye yeo e lego bohlokwa e bile e lego nakong. Bjalo ka ge o tla bona, tlhaloso ya Beibele e kwagalago le e nago le tlhaologanyo e tloša kgakanego ka moka. Go oketša moo, Beibele ruri e homotša bohle bao ba ilego ba welwa ke masetlapelo bophelong.

[Lepokisi/Seswantšho go letlakala 4]

Na ke Ditiro tša Modimo?

Na Beibele e ruta gore Modimo ke yena a bakago dikotsi tša tlhago tšeo re di bonago lehono? Ga go bjalo le gatee! Bjalo ka ge go bolelwa ka Beibeleng, dikahlolo tša Modimo di fapana kudu le dikotsi tša tlhago. Ka mohlala, Modimo ke yo a kgethago; o hlahloba dipelo tša batho gomme a fediša feela bao a bonago e le bakgopo. (Genesi 18:23-32) Go oketša moo, Modimo o nea ditemošo pele a phethagatša kahlolo, ka go rialo a fa batho ba lokilego sebaka sa go phologa.

Ka mo go fapanego, dikotsi tša tlhago di nea temošo e nyenyane goba tša hlasela ntle le temošo gomme tša bolaya batho le go ba golofatša di sa hlaole. Go fihla bokgoleng bjo itšego, batho ba dutše ba mpefatša dikotsi tše bjalo ka go senya dilo tša tlhago le ka go aga mafelong ao a bekilwego ke ditšhišinyego tša lefase, mafula le maemo a feteletšego a leratadima.

[Mothopo]

SENA VIDANAGAMA/AFP/Getty Images

[Seswantšho go letlakala 4]

Baetapele ba bodumedi ba neile dikarabo tše fapa-fapanego tšeo di gakantšhago