Dikereke di Lebile Kae?

GO DIREGA’NG ka dikereke tšeo go thwego ke tša Bokriste? Moo o dulago gona, na di a phuhlama goba di a atlega? O ka no ba o e-kwa ka dipolelo tša go tsošološwa ga kgahlego ka bodumedi le gona dipego tša diphuthego tšeo di oketšegago ka dinako tše dingwe di tšwa mafelong a bjalo ka Afrika, Yuropa Bohlabela le United States. Lega go le bjalo, dipego tša ditaba go tšwa dikarolong tše dingwe tša lefase gomme ka mo go kgethegilego tšeo di tšwago Yuropa Bodikela di bolela ka go tswalelwa ga dikereke, diphuthego tšeo di fokotšegago le go feta gotee le go se kgahlegele ga batho bodumedi mo go apareditšego.

Ka baka la palo e fokotšegago ya bao ba bago gona kerekeng, dikereke tše dintši di fetotše tsela ya tšona ya go ruta. Tše dingwe di ipolela gore ga di “ahlolele batho,” di fetiša kgopolo ya gore Modimo o amogela mokgwa le ge e le ofe wa boitshwaro. Dikereke tše dintši di nea batho boithabišo, maipshino gotee le dilo tše dingwe tše di bonagalago tšeo ba di ratago go e na le tlhahlo e tšwago Lentšung la Modimo. Gaešita le ge ba bangwe ba bao ba tsenago kereke ba bona diphetogo tše di nyakega e le gore batho ba itumelelanye le bophelo bja mehleng yeno, batho ba bantši ba dipelo tše di botegago ba ipotšiša ge e ba dikereke di fapoga thomong yeo Jesu a e neilego batho. A re lebeledišišeng mekgwa yeo dikereke di e latetšego nywaga-someng ya morago bjale.