Ge Bolwetši bo tla ba bo se Gona!

BATHO ba bantši ba holofela gore ba tla imologa bohlokong le bolwetšing bophelong bja legodimong ka morago ga lehu. Lega go le bjalo, go fapana le seo ba bantši ba se dumelago, kholofelo yeo ge e le gabotse Beibele e e neago batho ka kakaretšo ke bophelo paradeiseng ya lefaseng. (Psalme 37:11; 115:16) Nako yeo e tlago e holofeditšwego e akaretša bophelo bjo bo phethagetšego, lethabo le bophelo bjo bo sa felego.

Ke ka baka la’ng re babja gomme re e-hwa? Le gona lefase leo le se nago bolwetši le tla ba gona bjang? Beibele e araba dipotšišo tšeo.

▪ Sebaki sa kgonthe sa bolwetši Adama le Efa, batswadi ba rena ba pele, ba be ba bopilwe ba e-na le mebele e phetšego gabotse. (Genesi 1:31; Doiteronomio 32:4) Ba be ba bopetšwe gore ba phele mo lefaseng ka mo go sa felego. Ka morago ga ge ba rabetše ka boomo kgahlanong le Modimo e bile moo mebele ya bona e ilego ya ba kotsing ya go tsenwa ke malwetši. (Genesi 3:17-19) Ka go gana bolaodi bja Modimo, ba ile ba senya tswalano ya bona le Mmopi, Mothopo wa bophelo bja bona bjo bo phethagetšego. Ba ile ba thoma go fokola. Ka baka leo, ba ile ba babja gomme ba hwa go etša ge Modimo a be a ba lemošitše gore go tla ba bjalo.—Genesi 2:16, 17; 5:5.

 Ka morago ga borabele bja bona, Adama le Efa ba be ba ka fetišetša go se phethagale feela go bana ba bona. (Baroma 5:12) Bjalo ka ge go boletšwe sehlogong se se fetilego, bo-rathutamahlale lehono ba a lemoga gore go na le dilo tše dingwe tšeo re di abetšego tšeo di dirago gore re babje gomme re hwe. Ka morago ga nyakišišo e tseneletšego, sehlopha sa bo-rathutamahlale se sa tšwa go bolela morago bjale gore: “Ke therešo yeo e ka se tšhabelwego ya tša thutaphedi gore go tloga nakong ya ge entšine ya bophelo e thoma go šoma, mmele o thoma go bjala dipeu tša phedišo ya wona e sa phemegego.”

▪ E sego ka maiteko a batho Thutamahlale e fihlelela dilo tše dikgolo ntweng ya yona kgahlanong le bolwetši. Eupša go bonala sebaki sa bolwetši se le thata kudu gore thutamahlale e ka se rarolla ka mo go feletšego. Se ga se makatše barutwana ba Beibele bao ba tlwaelanego le mantšu a a Modimo a buduletšwego: “Se boteng maxoši e lexo bana ba batho, bao xo sexo phološô xo bôná.”—Psalme 146:3.

Lega go le bjalo, go etša ge Beibele e bolela, “dilo tše di sa kgonegego go batho, di a kgonega go Modimo.” (Luka 18:27) Jehofa Modimo a ka fediša sebaki sa bolwetši. O tla fodiša malwetši a rena ka moka. (Psalme 103:3) Lentšu la Gagwe le le buduletšwego le holofetša gore: “Bonang! Tente ya Modimo e go batho, o tla dula le bona gomme e tla ba batho ba gagwe. Modimo ka noši o tla ba le bona. O tla phumola megokgo ka moka mahlong a bona, gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona. Dilo tša pele di fetile.”—Kutollo 21:3, 4.

▪ Seo o swanetšego go se dira Jesu Kriste o hlalositše ka mo go kwagalago seo re swanetšego go se dira e le gore re thabele lefase la nakong e tlago leo le se nago bolwetši. O itše: “Se se bolela bophelo bjo bo sa felego, gore ba hwetše tsebo ka wena Modimo a nnoši wa therešo le ka yo o mo romilego, Jesu Kriste.”—Johane 17:3.

Tsebo ya Modimo le dithuto tša Morwa wa gagwe, e lego Jesu, di hwetšwa ka Beibeleng. Tsebo e bjalo e akaretša keletšo e šomago yeo e ka kaonefatšago bophelo bja gago gona bjale. Eupša sa bohlokwa le go feta, Modimo o holofetša barapedi ba gagwe ba kwago lefase leo le se nago bohloko. Ee, Modimo o go holofetša nako yeo ka yona “xo ka se [bego] le e a rexo: Ke a babya!”—Jesaya 33:24.

[Lepokisi/Diswantšho go letlakala 11]

Pono e Leka-lekanego ya tša Maphelo

Beibele e re kgothaletša go hlompha bophelo. Dihlatse tša Jehofa di bontšha tlhompho e bjalo ka go katanela go hlokomela maphelo a tšona. Di phema mekgwa e kotsi, e bjalo ka go diriša dihlare-tagi gampe le go kgoga. Modimo o letetše gore barapedi ba gagwe ba lekanetše mekgweng ya bona ya go ja le go nwa. (Diema 23:20; Tito 2:2, 3) Megato e bjalo e šomago gotee le go robala ka mo go lekanego le go itšhidulla e ka diegiša goba ya thibela malwetši a mantši. Go ka nyakega gore bao ba babjago ba hwetše thušo ya ditsebi tša tša maphelo tše di ka botwago.

Beibele e kgothaletša go ba le teka-tekano le go ‘hlaphogelwa monaganong.’ (Tito 2:12; Bafilipi 4:5) Ba bantši lehono ga ba na teka-tekano gomme ba feteletše lesolong la bona la go nyaka kalafo ba bile ba hlokomologa boemo bja bona bja moya. Ba bangwe ba retologela mekgweng e belaetšago ya tša kalafo yeo e ka bakago kotsi. Ba bangwe ba senya tšhelete le nako mekgweng le dihlareng tšeo di sa šomego goba tše kotsi.

Therešo ke gore ga se gwa hlwa go kgonega go hwetša bophelo bjo bo phethagetšego. Ge o dutše o emetše nako e tlago yeo ka yona bolwetši bo ka se hlwego bo e-ba gona, bohlale le teka-tekano tšeo di hwetšwago ka Beibeleng di ka go thuša go ba le teka-tekano ge o dutše o nyaka bophelo bjo bobotse bja mmele.