Go Thwe’ng ka Dikeno tša Mabapi le go se be le Dikopano tša Botona le Botshadi?

NYWAGENG ya morago bjale, dikeno tša gore motho a se be le dikopano tša botona le botshadi tše bjalo ka, “Nka se be le dikopano tša botona le botshadi go fihlela ke e-ba lenyalong,” di atile gare ga bafsa. Dikeno tše di bonagatša dipakane tše di retegago e bile di dumelelana le ditaelo tša Beibele. (1 Bakorinthe 6:18; Baefeso 5:5) Lega go le bjalo, go na le dipelaelo mabapi le ge e ba di šoma. Go ya ka nyakišišo e nngwe, mo e ka bago 60 lekgolong ya bafsa ba lego mahlalagading ba robile keno ya bona pele ngwaga o fela.

Go tlaleletša moo, selo seo se tshwenyago ke tsela yeo bafsa ba bangwe ba hlalosago “go se be le dikopano tša botona le botshadi” ka yona. Charlene C. Giannetti le Margaret Sagarese ba ngwadile ka pukung ya bona ya Boy Crazy! gore: “Ditsebi di kgokaganya mokgwa o golago wa dikopano tša botona le botshadi wa go hupa ditho tša pelego le wa go tsenya ka morago le bana bao ba rego ‘ka kwešišo e itšego’ ga ba nyake go ba le dikopano tša botona le botshadi. Ba phetha ka gore mokgwa le ge e le ofe wo o sa kopanyego ditho tša pelego ga se kopano ya botona le botshadi.”

Go bonagala pono yeo e atile. Ka morago ga go boledišana le bafsa ba lego mahlalagading ba fetago sekete, mongwadi yo mongwe o itše: “Go bonagetše eka mofsa o tee goba ba babedi go ba lekgolo o lebelela go hupa ditho tša pelego e le go ba le dikopano tša botona le botshadi.” O okeditše ka gore: “O swanetše go lemoga gore go ka direga gore ye ke tsela yeo ngwana wa gago yo a lego mahlalagading—gomme mohlomongwe le ngwana wa gago yoo a sego a hlwa a e-ba mahlalagading—a naganago ka yona.”

Bao ba kgomarelago ditekanyetšo tša Beibele ba lemoga gore go hupa ditho tša pelego le go di tsenya ka morago—go etša ge go itlhalosa—ke kopano ya botona le botshadi. Taelo ya Beibele ya gore re “ile bootswa” (“re be . . . kgole ka mo go feletšego le boitshwaro bjo bo gobogilego bja tša botona le botshadi,” Today’s English Version) e akaretša mehuta ka moka ya dikopano tša botona le botshadi tše di gobogilego.—1 Bathesalonika 4:3.