Ke Dirile Kgetho e Nepagetšego ya Mmošomo

KA GE GO ANEGA SONIA ACUÑA QUEVEDO

Ke ile ka newa maemo a mafsa mošomong. Mošomo wo o be o bolela gore ke tla ba le maemo a phagamego le mogolo o oketšegilego. Lega go le bjalo, ke be ke sa tšwa go laletšwa go yo hlankela bjalo ka modiredi wa mmulamadibogo wa nako e tletšego phuthegong e lego kgole. Ge ke lebelela morago kgethong ya-ka ka morago ga nywaga e 32, ke a tseba gore ke dirile kgetho e bohlale.

MMA o godišitšwe e le Moroma Katholika eupša o ile a ba le dipelaelo ka dithuto tša kereke. O ile a ipotšiša gore ke ka baka la’ng diswantšho—mediro ya diatla tša motho—di swanetše go hlompšha? Therešo ya bodumedi e be e le ya bohlokwa go yena gomme o ile a ya dikerekeng tše dintši tšeo di fapa-fapanego a nyaka dikarabo eupša a se di hwetše.

Ka letšatši le lengwe o be a dutše ka ntle ka gae kua Tuxtla, Mexico, a thabela moya o fodilego ge yo mongwe wa Dihlatse tša Jehofa a e-tla legaeng la gešo. A kgahlilwe ke dikarabo tšeo Hlatse e mo neilego tšona go tšwa Beibeleng ge e araba dipotšišo tša gagwe, o ile a dumela gore e boe gape. Ge Hlatse e boa, mma o be a letile a e-na le moruti wa Adventist, moruti wa Katholika gotee le moruti wa Nazarene. O ile a rotoša potšišo mabapi le Sabatha gomme ke Hlatse feela yeo e ilego ya mo nea karabo e kgotsofatšago ya Mangwalo. Ge e le gabotse, ke Hlatse feela yeo e bego e swere Beibele! Ka 1956, ka morago ga go ithuta Beibele ka dikgwedi tše tshela feela, mma o ile a kolobetšwa e le yo mongwe wa Dihlatse tša Jehofa. Ke be ke e-na le nywaga e seswai.

Dilo Tšeo Tate a Tshwenyegilego ka Tšona

Tate ga se a ka a ganetša mma ge a be a ithuta Beibele. Eupša ge a be a thoma go ruta rena bana ba bane—bašemane ba babedi le banenyana ba babedi—le go ya dibokeng tša Bokriste, tate o ile a senya dipuku tša mma. A kgodišegile gore re be re forwa, tate o ile a diriša Beibele ya Katholika a leka go bontšha gore Dihlatse di tsentše leina la Modimo—Jehofa—ka bofora ka phetolelong ya tšona. O ile a makala kudu ge mma a be a mmontšha lona leina leo ka Beibeleng ya gagwe gomme boemo bja gagwe bja kgopolo ka Dihlatse bo ile bja thoma go fetoga.—Psalme 68:4.

Kua Mexico, letšatši la matswalo la ngwanenyana wa nywaga e 15 ke nako e kgethegilego. Ka ge menyanya ya matšatši a matswalo e se ya Mangwalo, ke ile ka kgaotša go bina letšatši la-ka la matswalo. * Eupša tate o ile a gapeletša go ntirela selo se itšego se se kgethegilego. Ke ile ka naganišiša ka taba yeo gomme ka re, “Ke nyaka gore wena o be mpho ya-ka ka gore o ye le nna kopanong e latelago ya Dihlatse tša Jehofa.” O ile a dumela gomme a thoma go kgahlegela Beibele kudu.

Bošegong bjo bongwe ka morago ga ledimo le šoro, Tate o ile a gobala o šoro ge a be a gata thapo ya mohlagase yeo e bego e wele gomme gwa nyakega gore a buiwe ka mo go tseneletšego. Ge a dutše a fola sepetlele, Dihlatse tša tikologong yeo di ile tša mo nea tlhokomelo ka mehla—e lego pontšho ya lerato la Bokriste leo a sa kago a le lebala. Ka morago o ile a thoma go tšea karolo bodireding bja phatlalatša gomme a neela bophelo bja gagwe go Jehofa. Ka manyami, ka September 30, 1975, kgwedi e tee pele ga ge a tlo kolobetšwa, o ile a hwa. Re hlologetše gakaakang go tlo mo gokarela nakong ya tsogo!—Ditiro 24:15.

Tutuetšo e Botse ya Lapa

Mogol’a-ka Carmen, o be a dutše a tšeela bodiredi bja nako e tletšego godimo. Go se go ye kae ka morago ga go kolobetšwa ka 1967, o ile a ba mmulamadibogo wa ka mehla a fetša mo e ka bago diiri tše 100 bodireding kgwedi le kgwedi. Ge nako e dutše e e-ya, o ile a hudugela motseng wa Toluca, bogareng bja Mexico. Ka morago ga go fetša sekolo ke ile ka hwetša mošomo pankeng. Ke ile ka kolobetšwa ka July 18, 1970.

 Bodiredi bja nako e tletšego bo tlišeditše Carmen lethabo le legolo gomme o ile a nkgothaletša gore ke tlo šoma le yena kua Toluca. Ka letšatši le lengwe ke be ke naganišiša ka taba yeo ge ke be ke theeditše polelo yeo e bego e bontšha gore balatedi ba Jesu ba swanetše go diriša dilo tša bona tše bohlokwa tša moya go tumiša Modimo. (Mateo 25:14-30) Ke ile ka ipotšiša gore, ‘Na ke šoma ka thata ka dimpho tša moya tšeo ke di gafetšwego?’ Dikgopolo tše bjalo di ile tša tsoša ka go nna kganyogo ya gore ke hlankele Jehofa ka mo go oketšegilego.

Go Kgetha Magareng ga Dipakane tše Pedi

Ka 1974, ke ile ka dira kgopelo ya go hlankela bjalo ka modiredi wa mmulamadibogo tšhemong e nngwe. Kapejana ka morago ga moo, ke ile ka leletšwa mogala ge ke be ke sa le mošomong o e-tšwa go mogolo wa Mokriste kua Toluca. O ile a botšiša ka gore, “Re be re dutše re go letile. Ke ka baka la’ng o sa fihle?” Seo se ilego sa mmakatša ke gore ke be ke abetšwe go yo hlankela kua Toluca bjalo ka mmulamadibogo yo a kgethegilego eupša go be go bonala lengwalo la-ka la kabelo le lahlegile posong! (Babulamadibogo ba kgethegilego ba dumela go hlankela ka nako e tletšego kae le kae moo mokgatlo wa Jehofa o ba romelago gona.)

Ke ile ka tsebiša panka ka pela ka kgetho ya-ka ya go sepela. Mothwadi wa-ka a emišeditše pampiri godimo o ile a re, “Sonia, iketle pele! Re sa tšwa go botšwa gore o yo mongwe wa basadi ba šupago bao ba kgethilwego go tlo ba batlatša-balaodi. Ke mathomo khamphani ya rena e abela basadi maemo a. Na o ka se ke wa a amogela?” Bjalo ka ge go bontšhitšwe mathomong, mošomo wo o be o bolela gore ke tla hwetša mogolo wa godimo le maemo a phagamego. Lega go le bjalo, ke ile ka leboga mothwadi wa-ka gomme ka mmotša gore ke be ke ikemišeditše go hlankela Modimo ka mo go tletšego. O ile a re, “Tšwela pele ge. Eupša gopola, ge e ba go ka direga gore o nyake mošomo, panka e tla dula e ikemišeditše go go thwala.” Matšatši a mabedi ka morago ke ge ke le Toluca.

Bobulamadibogo bjo bo Kgethegilego Kua Mexico

Ge ke be ke thoma go šoma le yena, Carmen o be a šetše a hlanketše bjalo ka mmulamadibogo yo a kgethegilego kua Toluca ka nywaga e mebedi. Re be re thabetše gakaakang go ba gotee gape! Eupša go šoma ga rena gotee e be e le ga nakwana. Dikgwedi tše tharo ka morago, mma o ile a hwetša kotsi gomme ka morago ga moo o be a tla nyaka tlhokomelo ya ka gae ya ka mehla. Ka morago ga go boledišana le ofisi ya lekala ya Dihlatse tša Jehofa, nna le Carmen re ile ra dumelelana gore yena o tla boela gae gomme a hlokomele mma, e lego seo a se dirilego ka nywaga e 17. Ka nako yeo, Carmen o be a hlankela e le mmulamadibogo wa ka mehla, a laletša dithuto tša gagwe tša Beibele go tlo balela lapeng e le gore a ka kgona go thuša mma.

Ka 1976, ke ile ka abelwa go ya Tecamachalco gape, e lego motse wa maemo a fapanego kudu—moo badiidi ba dulago ka lehlakoreng le lengwe la toropo, gomme bahumi ba dula ka lehlakoreng le lengwe. Ke ile ka thoma thuto ya Beibele le mokgekolo yo a se a kago a nyalwa yoo a bego a dula le ngwanabo wa mohumi. Ge a be a mmotša gore o be a nyaka go ba Hlatse, ngwanabo o ile a mo tšhošetša ka gore o tla mo raka legaeng la gagwe. Lega go le bjalo, mosadi yoo yo a ikokobeditšego ga se a ka a tšhošwa ke seo, le gona ka morago ga gore a kolobetšwe, ngwanabo o ile a tšwetša pele ditšhošetšo tša gagwe. Gaešita le ge ka nako yeo a be a e-na le nywaga e 86, o ile a bota Jehofa ka mo go feletšego. A hlokomelwa ke phuthego, o ile a dula a botega go fihlela lehung la gagwe.

Sekolo sa Gilead, ke Moka go ya Bolivia

Ke thabetše go hlankela Tecamachalco ka nywaga e mehlano. Ke moka, ke ile ka amogela taletšo ya gore ke tle Sekolong sa mathomo sa Gilead seo se katološitšwego seo se bego se tlo swarelwa kua Mexico. Bjalo ka ge leina ka bo lona le hlalosa, e be e le katološo ya sekolo seo se swarelwago New York. Bobedi mma le Carmen ba ile ba phegelela gore ke amogele taletšo yeo, ka gona ke ile ka ya ofising ya lekala kua Motseng wa Mexico bakeng sa thuto ya dibeke tše lesome, tlhahlobo ya moya ya bophelo bja-ka. Klase ya rena e alogile ka February 1, 1981, gomme ke ile ka abelwa La Paz, Bolivia ke e-na le Enriqueta Ayala (ga bjale ke wa ga Fernández).

Ge re fihla boema-fofaneng bja La Paz, bana babo rena le kgaetšedi bao ba bego ba swanetše go tlo re gahlanetša ba be ba se ba hlwa ba fihla. Re ile ra re, “Ke ka baka la’ng re swanetše go senya nako?” Ka gona, re ile ra thoma go nea bohlatse go batho gona moo boema-fofaneng. Ka morago ga diiri tše tharo tše thabišago, re ile ra kopana le bana babo rena ba tšwago lekaleng. Ka morago ga gore ba kgopele tshwarelo, ba ile ba re ditarata di be di pitlagane ka baka la monyanya wa setšhaba.

Go Nea Bohlatse ka Godimo ga Maru

La Paz e phagametše lewatle ka dimithara tše e nyakilego go ba tše 3 625, ka gona ka matšatši a mantši  re be re le ka godimo ga maru. Ke be ke hema ka thata ka baka la go hlaela ga oksitšene gomme ke be ke ikwa ke lapile ka morago ga nako e kopana feela bodireding. Gaešita le ge go ntšere ngwaga gore ke tlwaele bophagamo bja motse wo, ditšhegofatšo tša Jehofa di feta mathata ao kgole. Ka mohlala, mesong e mengwe ka 1984, ke ile ka namelela ka thoko ga thaba ya mafsika ke e-ya ntlong yeo e bego e agilwe tlhoreng ya thaba. Ke lapile, ke ile ka kokota mojakong gomme go ile gwa tšwelela mosadi. Re bile le poledišano e thabišago gomme ke ile ka re ke tla boa gape ka morago ga matšatši a sego kae.

O ile a araba ka gore, “Ke belaela seo.” Lega go le bjalo, ke ile ka boela gape gomme mosadi yo o ile a nkgopela gore ke rute morwedi wa gagwe Beibele. Ke ile ka re go yena, “Seo ke boikarabelo bja batswadi. Lega go le bjalo, ke tla go thuša ge e ba o rata.” O ile a dumela gomme le yena ka noši o ile a amogela thuto ya Beibele. Ka gobane a be a se a rutega, re ile ra thoma fase ka pukwana ya Ithute go Bala le go Ngwala, yeo e lokišeleditšwego ke Dihlatse tša Jehofa bakeng sa maemo a bjalo.

Ge nako e dutše e e-ya, bana ba lapa leo ba ile ba oketšega ya ba ba seswai. Ge ke etela lapa le, ba bangwe ba bana ba be ba swarana ka diatla ba nkgoga gore ke kgone go namela patogeng ya thaba. Mafelelong, lapa ka moka le ile la hlankela Jehofa—tate, mma le bana ba seswai. Ba bararo go banenyana ke babulamadibogo gomme o tee go bašemane ke mogolo ka phuthegong. Tate wa bona e be e le mohlanka wa bodiredi ka phuthegong go fihlela lehung la gagwe ka 2000. Seo se thabiša pelo ya-ka gakaakang ge ke nagana ka lapa le leo le kgahlišago gotee le potego ya lona! Ke leboga Jehofa ge a ile a ntumelela go ba thuša.

Go ba Gotee Gape le Carmen

Ka morago ga gore mma a hwe ka 1997, Carmen o ile a laletšwa gape go hlankela bjalo ka mmulamadibogo yo a kgethegilego. Ka 1998, o ile a abelwa Cochabamba, Bolivia, moo ke bego ke hlankela gona. Ee, ka morago ga nywaga e 18 re be re le gotee gape gomme Carmen o ile a fiwa maemo a boromiwa. Re bile le nako e thabišago kua Cochabamba, moo boemo bja leratadima e lego bjo bo thabišago, moo go bolelwago gore dipeolwane ga di ke di tloga! Mo nakong ye, re hlankela Sucre, Bolivia, e lego motse o mobotse wo o nago le badudi ba 220 000 woo o ikadilego moeding o phagamego. Motse wo woo mathomong o bego o bitšwa gore ke Little Vatican ka gobane o be o e-na le dikereke tše dintši tša Katholika, ga bjale o na le diphuthego tše hlano tša Dihlatse tša Jehofa.

Ge re kopanya nywaga ya rena ka moka, nna le Carmen re butše madibogo ka nywaga e fetago 60 gomme re thabetše tokelo e sa bapišegego ya go thuša batho ba ka godimo ga lekgolo gore ba kolobetšwe. Ee, ka ntle le pelaelo go hlankela Jehofa ka moya ka moka ke tsela e putsago kudu ya bophelo!—Mareka 12:30.

[Mongwalo wa ka tlase]

[Seswantšho go letlakala 31]

Ke ile ka namela ka thoko ga thaba ya mafsika ke e-ya go yo ithuta le lapa le

[Seswantšho go letlakala 31]

Ke le bodireding le mogol’a-ka, Carmen (ka go le letona)