Ga ke sa le Lekgoba la Bjala

Go nwa bjala bjo bonyenyane go ka natefiša nako ya dijo goba gwa oketša lethabo ge go e-na le mokete. Lega go le bjalo, go batho ba bangwe, go dirišwa ga bjala go ka lebiša bothateng bjo bogolo. Ela hloko kanegelo ye e latelago ya monna yo a ilego a kgona go lokologa go dirišeng bjala gampe.

GAEŠITA le gona bjale boemo bjo bo sa thabišego bjo bo bego bo le gona ka gae ke bjo bohloko kudu gore ke bolele ka bjona. Tate le mma ba be ba e-nwa. Ke moka tate o be a betha mma. Gantši tate o be a mpetha. Ke be ke e-na le nywaga e mene ge ba be ba phetha ka go kgaogana. Ke gopola ke išwa ga makgolo gore ke yo dula le yena.

Ke be ke ikwa ke sa ratwe. Ge ke be ke e-na le nywaga e šupago, ke be ke nanya ke e-ya ka phapošing ya tlase go yo nwa beine ye ba e dirilego ka gae yeo e bego e tloša manyami a-ka. Makgolo le mma ba ile ba lwa ka baka la-ka ge ke be ke e-na le nywaga e 12. Mma o ile a befelwa o šoro gomme a mphoša ka foroko e kgolo. Ke ile ka kgona go e phema ke sa gobatšwa! Le e be e se lekga la mathomo bophelo bja-ka bo e-ba kotsing. Lega go le bjalo, mabadi ao a lego mmeleng wa-ka a be a se a tsenelela go swana le ao ke bego ke e-na le wona maikwelong.

Ge ke e-na le nywaga e 14, ke be ke e-nwa ka mehla. Mafelelong, ge ke e-na le nywaga e 17 ke ile ka tšhaba ka gae. Go nwa go ile gwa mpha maikwelo a tokologo, ke be ke le šoro e bile ke baka mathata mafelong ao go rekišwago bjala go ona. Ke be ke thabela go nwa. Ka letšatši le tee feela, ke be nka nwa dilithara tše hlano tša beine, dipiri tše mmalwa le mabjala a mangwe a thata.

Ge ke be ke nyetše, go nwa ga-ka go ile gwa bakela mosadi wa-ka mathata. Sekgopi le go befelwa di ile tša gola gomme ke be ke mmetha le go betha bana, ke dira gore go be le maemo a kotsi ao ke goletšego go ona. Tšhelete ka moka yeo ke bego ke e šomela e be e felela bjaleng. Re be re se na diphahlo tša ka ntlong, ka gona nna le mosadi wa-ka re be re robala fase. Ke be ke se na lebaka la go phela gomme ke sa dire boiteko bja go lokiša boemo.

Ka letšatši le lengwe ke ile ka boledišana le yo mongwe wa Dihlatse tša Jehofa. Ke ile ka botšiša gore ke ka baka la’ng go e-na le tlaišego e kaakaa gomme Hlatse e ile ya mpontšha go tšwa Beibeleng dikholofetšo tša Modimo tša lefase le le se nago mathata. Se se ile sa nkgodiša gore ke thome go ithuta Beibele le Dihlatse. Ge ke dutše ke diriša se ke ithutago sona ka Beibeleng ke ile ka fokotša go nwa gomme bophelo bja lapa la-ka bo ile bja kaonefala kudu.  Lega go le bjalo, ke ile ka lemoga gore e le gore ke hlankele Jehofa Modimo ka tsela e amogelegago, ke swanetše go fenya bothata bja-ka bja bjala. Ka morago ga dikgwedi tše tharo tša go katana ke be ke tlogetše bjala. Dikgwedi tše tshela ka morago, ke ile ka neela bophelo bja-ka go Modimo gomme ka bontšha seo ka go kolobetšwa.

Ka go kgaotša go ba lekgoba la bjala, ke ile ka kgona go lefelela dikoloto tša-ka. Mafelelong ke ile ka reka ntlo le koloi, yeo re e dirišago go ya dibokeng tša Bokriste le go tšea karolo bodireding bja ntlo le ntlo. Mafelelong, ke ile ka boelwa ke seriti.

Ka dinako tše dingwe ge re le dipokanong tša segwera ke laletšwa gore ke nwe bjala. Ba bantši ga ba tsebe ntwa e matla yeo ke bilego le yona gomme seno se tee se ka mpušetša morago ditseleng tša-ka tša kgale. Ke sa dutše ke e-na le kganyogo ya bjala. E nyaka thapelo e tiilego le boikemišetšo le go ba le matla a go gana. Ge ke nyorilwe, ke nwa kudu seno le ge e le sefe se se hlokago tagi. E šetše e le nywaga e lesome bjale ke sa nwe bjala.

Jehofa a ka dira se motho a sa se kgonego. O nthušitše gore ke thabele tokologo yeo ke bego ke sa kgolwe gore e a kgonega! Ke sa dutše ke e-kwa bohloko bja mabadi a maikwelo a ge ke sa le ngwana, gomme ke tšwela pele ke e-lwa le megopolo e fošagetšego. Ka lehlakoreng le lengwe, ke šegofaditšwe ka go ba le tswalano e botse le Modimo, bagwera ba kgonthe ka phuthegong le lapa le le botse le le nago le nna tumelong. Mosadi wa-ka le bana ba nthekga ka dipelo tša bona ka moka ntweng ya go lwa le bjala. Mosadi wa-ka o re: “Bophelo bja-ka bo be bo sa thabiše le gatee. Lehono, ke leboga Jehofa ka gore ke thabela bophelo bja lapa bjo bo thabilego le monna wa-ka le bana ba babedi.”—Se neetšwe.

[Ntlhakgolo go letlakala 19]

Ge ke e-na le nywaga e 14, ke be ke e-nwa ka mehla

[Ntlhakgolo go letlakala 20]

Jehofa a ka dira se motho a sa se kgonego

[Lepokisi/Seswantšho go letlakala 20]

BEIBELE LE BJALA

▪ Beibele ga e ganetše go dirišwa ga bjala. E hlalosa “morara wa xo thabiša pelo ya motho” e le mpho e tšwago go Modimo e yago go batho. (Psalme 104:14, 15) Beibele e bolela ka beine e le seka sa katlego le tšhireletšego. (Mika 4:4) Ge e le gabotse, mohlolo wa pele wo Jesu Kriste a ilego a o dira e be e le go fetola meetse gore e be beine monyanyeng wa lenyalo. (Johane 2:7-9) Le gona ge moapostola Paulo a e-kwa ka Timotheo “yo a felago a tlelwa ke bolwetši” o ile a mo eletša gore a nwe “beine e nyenyane.”—1 Timotheo 5:23.

▪ Seo Beibele e se ganago ke go nwa bjala ka mo go feteletšego:

“Matagwa . . . ba ka se je bohwa bja mmušo wa Modimo.”—1 Bakorinthe 6:9-11.

“Le se ke la tagwa ke beine, moo go nago le kgobogo.”—Baefeso 5:18.

“Yo madi-mabe ké mang?—Mahlomola a xo mang?—Dikxang di xo mang?—Manyami a xo mang?—Dinthô tša lefêla di xo mang?—Mahlômahwibidu a xo mang?— Ké tša bao ba tsêtsaxo mabyalweng, ba xo y’o leka setswaka sa sebelá. Se bônê sebelá bokwala, le lehulô xo tlokoma senwêlong, le xo kwala xa monatê moxôlong. Ka moraxo se Xo loma bo-ka nôxa, se Xo thswêla ’hloko bya petla. Mahlô a xaxo a bôna dilô tše di sexo xôna; pelo ya xaxo e búa dilô tše di raranexo.”—Diema 23:29-33.

Bjale ka ge re bone sehlogong seo se sepedišanago le lepokisi le, ba bangwe bao ba bilego le mathata ka bjala, ka bohlale ba kgethile go bo tlogela ka mo go feletšego.—Mateo 5:29.