Go Ikemišetša go Huma Moyeng

GO HUMA dilong tše di bonagalago go nyaka maiteko a tsepamišitšwego le boikgafo. Go bjalo le ka go huma moyeng. Se se boletšwe ke Jesu ge a be a re: “Ipolokeleng mahumo legodimong.” (Mateo 6:20) Mahumo a moya ga a ikgoboketše. Go fo ba le bodumedi go ka se dire motho gore a hume moyeng go fo swana le ge go ba le akhaonto ya panka go ka se mo dire gore a hume. Go hlagolela tswalano ya kgaufsi le Modimo, go gola bjalo ka motho wa moya le go huma ka dika tša moya go nyaka maikemišetšo, nako, maiteko a tsepamišitšwego le boikgafo.—Diema 2:1-6.

Na o ka ba le Tšona ka Bobedi?

Na ga go kgonege gore motho a be le mahumo a moya le motlalo wa dilo tše di bonagalago? Mohlomongwe go ka ba bjalo, eupša ke se tee sa tšona feela seo se ka phegelelwago ka katlego. Jesu o itše: “Le ka se be makgoba a Modimo le a Mahumo.” (Mateo 6:24b) Ke ka baka la’ng go se bjalo? Ka gobane go phegelela mahumo a moya le a dilo tše di bonagalago go a lwantšhana. Go a šitišana. Ka gona, pele a botša barutiwa ba gagwe gore ba ipolokele mahumo a moya, Jesu o itše: “Tlogelang go ipolokela mahumo lefaseng.”—Mateo 6:19.

Go tla direga’ng ge e ba motho a hlokomologa keletšo ya Jesu gomme a leka go phegelela mahumo a moya le a dilo tše di bonagalago? Jesu o itše: “Ga go yo a ka bago lekgoba la marena a mabedi; gobane o tla hloya yo mongwe a rata yo mongwe, goba o tla kgomarela yo mongwe a nyatša yo mongwe.” (Mateo 6:24a) Ge motho a a phegelela ka bobedi, gona mediro ya moya gaešita le ge e dirwa feela ka go ithola kgwara, e ka fetoga morwalo woo o bonalago e le tšhitišo ka mehla. Go e na le go ithekga ka Modimo, motho a ka lebelela tšhelete le seo e se rekago e le dilo tšeo di tlago pele tšeo di ka mo thušago go lebeletšana le mathata a bophelo. Go bjalo ka ge Jesu a boletše gore: “Gobane moo lehumo la gago le lego gona, ke moo pelo ya gago le yona e tlago go ba gona.”—Mateo 6:21.

Mokriste yo mongwe le yo mongwe o swanetše go hlahlobišiša keletšo e bjalo ya Beibele ka kelohloko pele a dira phetho ya moo a tlago go lebiša nako ya gagwe, tlhokomelo le pelo. Lebaka feela la gore Modimo ga a nee ditekanyo tše itšego tša kamoo Mokriste a ka bago le dilo tše di bonagalago ka gona, ga le bolele gore ditemošo tša Gagwe malebana le megabaru ga di na kotlo. (1 Bakorinthe 6:9, 10) Bao ba hlokomologago keletšo ya Beibele gomme ba hlagolela maikemišetšo a go huma ba a fokola moyeng, monaganong le maikwelong bjalo ka ge re bone. (Bagalatia 6:7) Ka mo go fapanego, Jesu o boletše gore bao ba lemogago go nyaka ga bona dilo tša moya ba tla thaba. (Mateo 5:3) Ka kgonthe, Mmopi wa rena le Morwa wa gagwe ba tseba selo se se kaone kudu seo se ka re tlišetšago lethabo le polokego ya kgonthe!—Jesaya 48:17, 18.

Kgetho Yeo o ka se Itsholelego Yona

Ke’ng seo o tlago go se phegelela, Modimo  goba mahumo? Go molaleng gore re swanetše go hlokomela dinyakwa tša rena tša nama. Lengwalong la gagwe la mathomo le le yago go Timotheo, moapostola Paulo o itše: “Ka kgonthe ge e ba motho a sa babalele bao e lego ba gabo, kudu-kudu ditho tša ntlo ya gagwe, o latotše tumelo gomme ke yo mobe go feta motho yo a se nago tumelo.” Paulo gape o kgothaleditše Bakriste go bea kholofelo ya bona, e sego tšheleteng eupša go Modimo le gore “ba hume mediro e mebotse.” (1 Timotheo 5:8; 6:17, 18) O tla lebiša tlhokomelo ya gago kae? O tla phegelela’ng? Modiro o mogolo gare ga mediro yeo Paulo a boletšego ka yona ke modiro wa go bolela le wa go dira barutiwa woo Jesu a o filego barutiwa ba gagwe gore ba o dire. (Mateo 28:19, 20) Ge Bakriste ba nolofatša maphelo a bona ka boithatelo e se feela gore ba goge maoto le go thabela bophelo eupša e le gore ba be le karolo e kgolo modirong wo o holago, ba “[ipolokela] motheo o mobotse wa bokamoso” lefaseng le lefsa la Modimo le le holofeditšwego. Gaešita le gona bjale ba hwetša gore mahumo a moya a “phala thsipi e khwibidu.”—1 Timotheo 6:19; Diema 16:16; Bafilipi 1:10.

Ela hloko mohlala wa Eddie, yo ba lapa labo ba ilego ba ba Dihlatse tša Jehofa ge e be e sa le yo monyenyane. Ka nako e nngwe ba lapa labo ba ile ba lahlegelwa ke dilo tša bona tše di bonagalago ka moka gomme ba ile ba gapeletšega go tloga legaeng la bona. Eddie o hlalosa gore: “Ka mehla ke be ke dula ke ipotšiša gore go tla direga eng ge go be go ka fihla nako yeo ka yona re tlogago re se na selo. Ga bjale re be re se na selo. Le gona, na o tseba seo se diregilego? Ga go selo se sebe seo se diregilego! Re be re dutše re e-na le dijo le dino le diaparo. Jehofa o ile a re thuša gomme mafelelong boemo bo ile bja boela sekeng. Phihlelo ye e nthutile go tšeela godimo seo Jesu a se holofeditšego go Mateo 6:33—gore ge e ba re dira Mmušo wa Modimo selo seo se tlago pele maphelong a rena, ga se ra swanela go tshwenyega ka dinyakwa tša rena tša nama.” Lehono, Eddie o hlankela bjalo ka modiredi wa mosepedi wa nako e tletšego a e-na le mosadi wa gagwe. Ba na le dilo tše di bonagalago. Sa bohlokwa le go feta, ba humile moyeng.

Mehola e sa Lekanywego

Ka go se swane le mahumo a mo lefaseng ao mahodu a ka a utswago, mahumo a moya e ka ba a ka mo go sa felego. (Diema 23:4, 5; Mateo 6:20) Ke therešo gore tšwelopele ya moya go thata go e lekanya. Ga go bonolo go tiišetša gore motho o gotše go fihla bokgoleng bofe ka lerato, lethabo goba tumelo go swana le ge go le bjalo ka go kgonthišetša koketšego ya mahumo ao motho a nago le ona. Eupša ga go selo seo meputso ya mahumo a moya e ka lekanywago le sona. Ge a bolela ka barutiwa bao ba bego ba tla tlogela dintlo le mašemo a bona—ee, dilo tšeo ba iphedišago ka tšona—e le gore ba bulele dilo tša moya sebaka, Jesu o itše: “Ruri ke re go lena, Ga go yo a tlogetšego ntlo goba bana babo goba dikgaetšedi goba mmagwe goba tatagwe goba bana goba mašemo ka baka la-ka le ka baka la ditaba tše dibotse yo mo nakong ye a ka se hwetšego ga lekgolo dintlo le bana babo le dikgaetšedi le bo-mma le bana le mašemo, gotee le ditlaišego, gomme tshepedišong e tlago ya dilo o tla hwetša bophelo bjo bo sa felego.”—Mareka 10:29, 30.

O tla etiša’ng pele bophelong bja gago? Modimo goba mahumo?

[Seswantšho go letlakala 8]

Na o phegelela mahumo a dilo tše di bonagalago . . .

[Seswantšho go letlakala 9]

. . . goba mahumo a moya?