Na go Phegelela Tšhelete go a go Lwatša?

GE E ba gosasa o ka tsoga o humile le dinala, o be o tla dira’ng? Na o be o tla iketla gomme wa thabela bophelo? Na o be o tla tlogela mošomo wa gago gomme wa fetša nako e ntši o e-na le lapa la gago le bagwera? Na o be o tla thoma mošomo wo o o thabelago e le ka kgonthe? Ka mo go kgahlišago, batho ba bantši bao ba humilego ga ba dire dilo tše bjalo. Go e na le moo, ba fetša maphelo a bona ka moka ba kgoboketša tšhelete e oketšegilego—e ka ba e le bakeng sa go lefelela dikoloto tša bona tše difsa goba gore ba hume le go feta.

Lega go le bjalo, ba bangwe bao ba latetšego tsela ye, ba lemoga mafelelo a gobatšago ao go rata dilo tše di bonagalago go go bakilego bophelong bja bona, bja lapa le mokgweng wa boitshwaro wa bana ba bona. Morago bjale, dipuku, dihlogo tša dikuranta, mananeo a thelebišene le dibidio di lemošitše malebana le megabaru gomme go e na le go kgothaletša mokgwa wo wa bophelo, di kgothaleditše batho gore ba kgethe “mokgwa o bonolo wa bophelo.” Methopo e mentši e bontšha gore go nwelela go phegeleleng dilo tše di bonagalago go ka go lwatša—monaganong, maikwelong gaešita le mmeleng.

Ke therešo gore go tshwenyega ka dikotsi tša go rata dilo tše di bonagalago ga se selo se sefsa. Nywageng e ka bago e 2 000 e fetilego, Beibele e boletše gore: “Bao ba ikemišeditšego go huma ba wela molekong le molabeng le dikganyogong tše dintši tša go hloka tlhaologanyo le tše gobatšago, tšeo di phonkgetšago batho tahlegong le tshenyegong. Gobane lerato la tšhelete ke modu wa mehuta ka moka ya dilo tše di gobatšago, gomme ka go phegelela lerato le, ba bangwe ba ile ba arošwa tumelong gomme ba itlhabile gohle ka mahloko a mantši.”—1 Timotheo 6:9, 10.

Eupša na seo ke sa therešo? Na bao ba phegelelago tšhelete le go ba le dilo tše di bonagalago ba tlaišega e le ka kgonthe ka baka la tšona? Goba na ba na le dilo tšohle—lehumo, bophelo bjo bobotse bja mmele le malapa a thabilego? Anke re boneng.