Dikotsi di Kgaufsi le go Fela

DITŠHIŠINYEGO tša lefase, dintwa, ditlala le malwetši—tše ke tše dingwe tša dilo tšeo Jesu a boletšego e sa le pele gore di tla swaya “bofelo bja tshepedišo ya dilo” yeo re phelago go yona ga bjale. (Mateo 24:3, 7, 8; Luka 21:7, 10, 11) Ke therešo gore ditiragalo tšeo ga se tša bakwa ke Modimo. Jesu le Tatagwe, Jehofa Modimo, ga ba ikarabele ka tšona.

Eupša Modimo o tla ikarabela ka seo ditiragalo tšeo di boletšwego e sa le pele di se bolelago, e lego go tla ga Mmušo wa Modimo—mmušo wa legodimong ka diatleng tša Jesu Kriste—le go senywa ga bohle bao ba ganago bogoši bja Jehofa. (Daniele 2:44; 7:13, 14) Ka morago ga moo, lefase le tla dirwa lefelo le le šireletšegilego la khutšo, moo go ka se bego le go boifa dikotsi tša tlhago. Kholofetšo ya Modimo e tla phethagatšwa ka kgopolo e feletšego: “Sethšaba sa-ka se tlo dula maxaeng a moláô, nywakong e bôtêxaxo madulong a xo iketla.”—Jesaya 32:18.

Theetša Modimo Gomme o Phele ka mo go sa Felego!

Bjalo ka ge go hlalositšwe sehlogong se se fetilego lelokelelong le la dihlogo, go kwa ditemošo  go ka phološa bophelo. Molao wa motheo o swanago o šoma le go feta ditemošong tše di tšwago go Modimo tše di begilwego ka Beibeleng. Modimo o holofetša gore, “Xe e le eo a kwaxo nna, ó tlo dula a iketla, ó ikaxêla à sa šie kotsi.”—Diema 1:33.

Dihlatse tša Jehofa di katanela go kwa Modimo ka go bala Lentšu la gagwe le le buduletšwego ka mehla le ka go diriša dithuto tša lona. Di go laletša go dira se se swanago. Ee, bohle bao ba kwago Jehofa ka go ikokobetša ga go nyakege gore ba boife bokamoso le kotsi yeo e tlago go tlela ba kgopo. Go e na le moo, ba ka lebelela pele go amogeleng bophelo bjo bo sa felego Paradeiseng mo lefaseng, moo ba tlago go “thaba ka botlalô bya moláô.”—Psalme 37:10, 11.

[Lepokisi go letlakala 24]

KHOMOTŠO GO BAO BA LLAGO

Na o lahlegetšwe ke bao o ba ratago ka lehu, mohlomongwe ka baka la kotsi ya tlhago goba kotsi e nngwe e itšego? Mo e nyakilego go ba nywaga e 2 000 e fetilego, mogwera wa Jesu wa paale e lego Latsaro o ile a hwa go sa letelwa. Ka morago ga go kwa ka se, Jesu o ile a ya motseng wa gabo Latsaro e lego Bethania, gomme a mo tsoša “borokong” bja lehu.—Johane 11:1-44.

Jesu ga se a dira mohlolo wo e le feela go bontšha gore o rata Latsaro le lapa labo eupša gape o be a dira se go tiišetša kholofetšo ya gagwe ya go tsoša “bohle bao ba lego mabitleng a kgopotšo” nakong ya pušo ya Mmušo wa gagwe. (Johane 5:28, 29) Ee, Paradeiseng e tlago, Jesu o tla tloša dikotsi ka moka tšeo di thomilego ka borabele bja kua Edene. *—1 Johane 3:8.

[Mongwalo wa tlase]

[Lepokisi/Seswantšho go letlakala 25]

TŠHIŠINYEGO YA LEFASE E FETOTŠE DIPAKANE TŠA-KA

Ka 1971, ke be ke le mma yo mofsa gomme ke holofetše go tlo ba seopedi sa mmino wa opera. Ke tlogile motseng wo ke belegetšwego go ona wa Winnipeg, Manitoba kua Canada ka 1957, e le gore nka ba kgaufsi le Hollywood, California kua U.S.A., ke holofetše go phegelela pakane ya-ka ya mmino.

Ka nywaga e senyane, mma e lego yo mongwe wa Dihlatse tša Jehofa, o be a nketela a e-tšwa Canada. O be a diriša dinako tše bjalo go boledišana le nna ka Beibele, a kgodišegile gore e be e nea keletšo e botse kudu ka lethabo le bophelo bja lapa. Ke be ke rata mma, ka gona ke ile ka mo theetša ka tlhompho. Lega go le bjalo, nako le nako ge a tloga, ke be ke lahla dikgatišo tšeo a mphilego tšona, ke kgodišegile gore bophelo bja-ka bo be bo lebile tseleng e nepagetšego.

Ke moka, e sa le ka pela mesong ya Labobedi la February 1971, tšhišinyego ya lefase ya bogolo bja 6,6 sekaleng sa Richter e ile ya mphafoša. Lešata le be le thiba ditsebe gomme tšhišinyego e le e šoro. Ke tšhogile, ke ile ka kitimela go ngwan’a-ka gomme ka imologa ge ke mo hwetša a šireletšegile malaong. Ge tšhišinyego e kgaoditše, mapotlelo ao a pšhatlegilego le dilo tšeo di bego di le ka rakeng di be di phatlaletše fase gomme meetse ao a bego a le ka letamong la go rutha a be a tletše jarata yohle. Gaešita le ge lapa la-ka le be le šireletšegile, ga se ka kgona go robala gape.

Mma o be a ile a bolela ka ‘mehla ya bofelo,’ yeo ponagatšo ya yona e nngwe e lego “ditšhišinyego tša lefase tše dikgolo.” (2 Timotheo 3:1; Luka 21:7-11) Ngwageng woo, o ile a nketela gape ka ge a be a dira bjalo ngwaga le ngwaga eupša o be a se a swara dikgatišo tšeo di theilwego Beibeleng. O be a phethile ka gore ga ke na kgahlego ka morago ga gore a nnee bohlatse ka nywaga e senyane go se na nko e tšwago lemina. O be a fošitše gakaakang! Ge a se na go fihla, ke ile ka mo hloma ka dipotšišo. Gatee-tee go opela le go tuma di ile tša se sa hlwa di e-ba bohlokwa.

Bekeng yona yeo ke ile ka ba gona dibokeng tša Bokriste Holong ya Mmušo ya lefelong la gešo ke e-na le mma gomme ka morago ga moo ke be ke foša diboka ka sewelo. O ile a rulaganya gore ke swarelwe thuto ya legae ya Beibele. Ke ile ka kolobetšwa ka 1973, gomme lehono ke fetša palo-gare ya diiri tše 70 kgwedi e nngwe le e nngwe ke tsebatša ditaba tše dibotse tša Mmušo wa Modimo go ba bangwe. (Mateo 24:14) Ee, go e na le gore tšhišinyego ya lefase e fediše tumelo ya-ka go Modimo, e ile ya nthuša go e aga.—Bjalo ka ge go anega Colleen Esparza.