Dipelo tše di Kwelego Bohloko le Tumelo e Sentšwego

KA MORAGO ga gore tsunami e senye motse wa gabo ka December 2004, monna yo mongwe kua Sri Lanka o boletše mantšu a: “Kae le kae e be e le ditopo gomme re be re sa kgone go bona moo ntlo ya rena e bego e le gona pele.” Sehlogong se se bego se bolela ka kotsi ye ya tlhago, morulaganyi wa kuranta ya ditaba tša mabapi le bodumedi o boletše gore ka dinako tše dingwe o be a ikhwetša “a rapela a lomagantšhitše meno.”

Ba bantši ba lebelela dikotsi tša tlhago e le kotlo e tšwago go Modimo. Mongwadi yo mongwe wa ditaba o hlalositše ledimo le senyago e le “letsogo la Modimo.” Baetapele ba bangwe ba bodumedi kua United States ba hlalositše ditiragalo tše bjalo ka Ledimo la Katrina e le “bogale bja Modimo metseng yeo e tletšego dibe.” Kua Sri Lanka, Mabuddha a fišegelago thoko a pharile Bakriste molato ka baka la tsunami, ka lebaka la koketšego ya dikarogano tša bodumedi. Monna yo mongwe yo a ikarabelago tempeleng ya Mahindu o ile a nagana gore modimo yo a bitšwago Shiva o be a galefile ka gobane batho ba be ba sa phele ka tsela e swanetšego. Moetapele wa bodumedi wa mo-Buddha kua United States o boletše mabapi le dikotsi tša tlhago gore: “Ga re tsebe lebaka leo ka lona dilo tše di diregago. E bile ga re tsebe le lebaka leo ka lona re lego mo.”

Ge o bona diswantšho tša dintlo tše di sentšwego, tša batho ba hwilego le tša batho ba nyamilego, na o ye o ipotšiše gore, ‘Ke ka baka la’ng Modimo a dumelela tlaišego e kaakaa?’ Goba na o nagana gore, ‘Modimo o swanetše go ba a e-na le mabaka a kwagalago a go dumelela dilo tše bjalo gore di direge eupša a se a utolla mabaka ao’? Dihlogo tše di latelago di ahla-ahla taba ye. Gape di ahla-ahla megato e šomago yeo batho ba ka e gatago e le go fokotša kgonagalo ya gore ba gobale le go hwa ge e ba go lemogwa gore kotsi ya tlhago e ka hlasela goba ge e ba e hlasela.

[Seswantšho go letlakala 19]

Baetapele ba bantši ba bodumedi ga ba tsebe lebaka leo ka lona Modimo a dumelelago dikotsi tša tlhago