Mogato 3

Dirišang Matla a Lena a Taolo

Ke ka baka la’ng le swanetše go gata mogato wo? Go ya ka makasine wa Parents, dinyakišišo di bontšha gore “bana bao ba godišwago ke batswadi ba lerato eupša e le bao ba dirišago matla a bona a taolo—bao ba thekgago bana ba bona eupša ba beile dithibelo tše tiilego—ba a atlega sekolong, ba kgona go dirišana gabotse le batho ba bangwe, ba a ikholofela gomme ke bana ba ba thabilego go feta bana ba bangwe bao batswadi ba bona ba dumelelago dilo kudu goba ba lego bogale kudu.”

Tlhohlo: Go tloga boseeng go fihla ge ba le nywageng ya bona ya mahlalagadi, bana ba tla hlohla tokelo ya lena ya gore le diriše matla a lena a taolo go bona. Mongwadi wa puku ya Parent Power! e lego John Rosemond o ngwala gore: “Bana ba lemoga ka pela ge batswadi ba tšhaba go diriša matla a bona a taolo gaešita le go lemoga ge go e-na le kgonagalo ya gore batswadi ba ineele dikganyogong tša bona.” O re: “Ge go tliwa tabeng ya gore ‘Seeta go lla sa mang?’ ge e ba batswadi ba sa tiiše letsogo, bana ba tla itaola.”

Tharollo: Le se tshwenyege ka gore le tla dira gore bana ba se ke ba le rata goba le tla ba nola moko ge e ba le diriša matla a lena a taolo. Jehofa Modimo, Mothomi wa bophelo bja lapa, ga se a rera gore bana ba be le tokelo ya go dira phetho ya gore lapa le swanetše go sepetšwa bjang. Go e na le moo, o beile batswadi boemong bja bona bja go ba le matla a taolo gomme a laela bana gore: “Kwang batswadi ba lena.”—Baefeso 3:14, 15; 6:1-4.

Le ka diriša matla a lena a taolo ka ntle le gore le be bagateledi. Bjang? Ka go latela mohlala wa Jehofa. O na le matla a go gapeletša bana ba gagwe ba lefaseng gore ba dire thato ya gagwe, lega go le bjalo o re kgopela se se lokilego. Lentšu la gagwe le re: “Mola O ka be O theeditše xe ke Xo laêla, moláô wa xaxo o ka be o swana le noka.” (Jesaya 48:18) Jehofa o nyaka gore re ikokobeletše yena, e sego ka gobane re e-na le poifo e sa swanelago eupša ka baka la gore re a mo rata. (1 Johane 5:3) Ke yo a leka-lekanego ka seo a se nyakago go rena gomme o tseba gore re tla holega ge e ba re phela ka ditekanyetšo tša gagwe tša boitshwaro.—Psalme 19:7-11.

Ke’ng seo se ka le neago matla a go diriša matla a lena a taolo bjalo ka batswadi ka teka-tekano? Sa mathomo, le swanetše go kgodišega gore Modimo o nyaka gore le dire bjalo. Sa bobedi, le swanetše go kgonthišega gore go phela ka ditekanyetšo tša Modimo tša boitshwaro ke selo se se le loketšego le bana ba lena.—Baroma 12:2.

Ke’ng seo ka mo go kgethegilego le swanetšego go se dira e le gore le diriše matla a lena a taolo?

[Mantšu a ipiletšago a tsopotšwego go letlakala 5]

“Sôla ngwana wa xaxo, . . . a kwišê pelo y’axo bose.” —Diema 29:17