Dumelela Modimo a go Hlahle Gore o Hwetše ‘Bophelo bja Kgonthe’

SEKA sa bohlokwa sa mohlahli yo mongwe le yo mongwe ke go botega ga gagwe. Bao ba tsebago Jehofa, Mongwadi wa Beibele, ba kgodišegile gore ke motho yo a ka botwago go feta bohle. ‘A ka se ke a aketša.’ (Tito 1:2; 2 Timotheo 3:16) Jošua yo a boifago Modimo le yo a ilego a etelela Baisiraele pele ge ba tsena Nageng ya Kholofetšo, o ile a hlatsela ka noši go botega ga Jehofa. Ge a be a bolela le setšhaba o itše: “Lena le a tseba ka pelo tša lena ka moka le ka moya wa lena ka moka gobane ga go hlokwe lentšu le tee go mantšu a mabotse ka moka ao Jehofa, Modimo wa lena a a boletšego godimo ga lena, a tšweletše ka moka, ga go lentšu le tee le le welego.” (Mongwalo o sekamego ke wa rena.)—Jošua 23:14, PK.

Ga e sa le go tloga mehleng ya Jošua, boporofeta bjo bontši kudu bja Beibele bo phethagetše. Boporofeta bjo bjo bontši bjo bo phethagetšego bo re nea mabaka a tiilego a go ba le tumelo e matla boporofeteng bjo bo sa dutšego bo tla phethagala. Bontši bja boporofeta bjo bo mabapi le morero wa Modimo ka lefase le batho ba kwago.

 Na o tla Holwa ke Tlhahlo ya Modimo?

Jehofa, mothofatšo wa lerato, o nyaka gore re thabe gona bjale le ka mo go sa felego. (Johane 17:3; 1 Johane 4:8) Ee, Modimo o rata gore re thabele ‘bophelo bja kgonthe’—bophelo bjo bo sa felego. (1 Timotheo 6:12, 19) Ke ka lebaka leo Dihlatse tša Jehofa tše fetago dimilione tše tshela di botšago baagišani ba tšona ‘ditaba tše dibotse tša mmušo’ ka lethabo e le go bontšha gore di kwa taelo ya Modimo. (Mateo 24:14) Ga bjale, di dira modiro wo dinageng tše 235—mo e ka bago setšhabeng se sengwe le se sengwe lefaseng!

Mmušo wa Modimo ke pušo ya legodimong yeo e lego ka diatleng tša Jesu Kriste. (Daniele 7:13, 14; Kutollo 11:15) Ka tlase ga pušo ya gagwe batho ka moka ba kgopo—bao ba ganago go ikokobeletša ditekanyetšo tša Jehofa tša go loka—ba tla fedišwa. (Psalme 37:10; 92:7) Ka morago ga moo, “xo tseba Morêna xo tlo tlala ’fase lohle bo-ka meetse xe a nabile lewatleng.”—Jesaya 11:9.

Nagana ka khutšo le kwano tšeo di tlago go ba gona polaneteng ye, ge motho yo mongwe le yo mongwe a rapela Modimo “ka moya le ka therešo” gomme ka go rata a ikokobeletša tlhahlo le ditekanyetšo tša gagwe tše di phethagetšego! (Johane 4:24) Mafelelong, batho ba tla thabela ‘bophelo bja kgonthe’ bjo Modimo a bo holofeditšego!

Lega go le bjalo, go etša ge go boletšwe e sa le pele, ke batho ba sego kae bao ba tlago go amogela tlhahlo ya Modimo gomme ba hwetša bophelo. (Mateo 7:13, 14) Na o nyaka go ba gare ga bona? Ge e ba go le bjalo, Dihlatse tša Jehofa di go laletša ka borutho gore o hlahlobe Mangwalo gomme o dumelele keletšo ya Modimo gore e go hlahle. Ka go dira bjalo, o tla ‘leka’ gomme wa bona kamoo Jehofa ge e le gabotse a lokilego ka gona. (Psalme 34:8) Ka ntle le pelaelo, go fo etša ge bohlale bja tlhago bo hlahla dinonyana gore di fihle mo di yago, Jehofa o tla hlahla batho ba gagwe ba botegago go ba iša bophelong paradeiseng.—Luka 23:43.

[Tlhaloso ya seswantšho go letlakala 17]

“Go thaba ba moya o boleta, ka ge ba tla ja bohwa bja lefase.”—MATEO 5:5

[Tlhaloso ya seswantšho go letlakala 17]

“Ba bolêta e tlo ba bôná beng ba naxa; ba tlo thaba ka botlalô bya moláô.” —PSALME 37:11

[Tlhaloso ya seswantšho go letlakala 18]

“Tente ya Modimo e go batho . . . O tla phumola megokgo ka moka mahlong a bona, gomme lehu le ka se hlwe le sa ba gona.”—KUTOLLO 21:3, 4

[Tlhaloso ya seswantšho go letlakala 18]

“Ba ba tl’o xo dula mo naxeng, ké baloki; ba ba tl’o xo šala bà le xôna, ké bôná ba-ila-bokxôpô. Ba babe ba tlo fedišwa naxeng; bakxeloxi ba tlo rakwa mo xo yôna.”—DIEMA 2:21, 22