“Hle Jehofa, Ntumelele Gore ke go Hlankele”

BJALO KA GE GO ANEGA DANIELLE HALL

Ge ke be ke sa le ngwanenyana, ke be ke rata go etela makgolo, yo a bego a dula kgaufsi le gae. Ka mehla o be a robala go se nene thapama. Ge e ba go be go ka direga gore ke mo etele ka yona nako yeo, re be re tla dula gotee godimo ga malao ge a dutše a mpalela dikanegelo tša Beibele. O be a mpotša gantši gore: “O se ke wa lebala gore Jehofa o a go rata. Le gona, ge e ba o mo rata, o tla dula a go hlokomela.” Mantšu a gagwe a ile a nwelela ka mogopolong wa-ka le pelong ya-ka.

MAKGOLO o hwile ka 1977, ge ke be ke e-na le nywaga e mene. E be e le yo mongwe wa Dihlatse tša Jehofa ka ge go be go le bjalo ka bohle ba meloko ya tate motsaneng wa rena wa Moe kua Australia. Batswadi ba-ka e be e se Dihlatse, eupša tate o be a tlwaelane le tšona gakaone. Ka morago, lapa lešo le ile la hudugela torotswaneng ya Tintenbar, yeo e lego kgaufsi le lebopo la New South Wales. Ka dinako tše dingwe gona moo, nna le mogol’a-ka e lego Jamie, re be re e-ya dibokeng tša Dihlatse le tate.

Ge ke be ke e-na le nywaga e seswai, batswadi ba-ka ba ile ba arogana. Tate o ile a boela Moe mola nna le Jamie re ile ra šala le mma. Mma o be a sa kgahlegele Beibele gomme o be a sa nyake re e-ya dibokeng tša Dihlatse. Se se ile sa nnyamiša kudu. Ke ile ka nagana ka mantšu a makgolo ao a bego a nweletše pelong ya-ka. Ke be ke tseba gore ke be ke rata Jehofa! Le gona, ke be ke nyaka go mo hlankela.  Ka gona, ke ile ka rapela Jehofa gomme ka mmotša gore le nna ke yo mongwe wa Dihlatse tša gagwe. Jamie o be a ikwa ka mo go swanago.

Diteko Sekolong

Go se go ye kae ka morago ga moo, morutiši yo mongwe sekolong o ile a kgopela ngwana yo mongwe le yo mongwe ka klaseng ya rena go bolela ka go hlaboša bodumedi bja gagwe e le gore a ka ngwala seo ka pukung ya go ingwadiša. Ge go fihla nako ya Jamie, o ile a bolela ka lentšu le le hlabošago le leo le kwalago a re, “Dihlatse tša Jehofa.” Morutiši o ile a ema gomme a mo kgopela gore a bušeletše karabo ya gagwe, e lego seo a se dirilego. Morutiši o ile a re “Ga ke dumele seo, eupša ke tla go bona ka morago.” Ge go fihla nako ya-ka, le nna ke ile ka bolela ka go hlaboša gore, “Dihlatse tša Jehofa.” A ferekane e le ruri, morutiši o ile a bitša hlogo ya sekolo.

Hlogo ya sekolo e ile ya bolela ka go tia gore: “Mo ke na le dipampiri tša lena tša go ingwadiša gomme batswadi ba lena ga se ba le ngwadiša le le Dihlatse tša Jehofa.” Re ile ra araba ka tlhompho gore, “eupša bjoo ke bodumedi bjo re bo latelago.” Morutiši le hlogo ya sekolo ga se ba ka ba re botšiša ka taba yeo gape.

Sekolong, ke ile ka leka go boledišana le bao ke bego ke tsena le bona ka klaseng ka tsebo ya-ka e lekanyeditšwego ya Beibele. Ka go ya le Puku ya-ka ya Ditaba tša Beibele sekolong, ka dinako tše dingwe ke be ke kgona go balela ngwanenyana yo mongwe yo a bego a dumela go Modimo dikanegelo. * Ke be ke sa ratwe ke bana ba bangwe e bile ka dinako tše dingwe ke be ke lewa ke bodutu kudu ka baka la ge ke be ke leka go phela ka go dumelelana le ditekanyetšo tša Bokriste.

Ke ile ka rapela Jehofa gantši-ntši le ka mo go tseneletšego moo a ilego a ba mogwera wa-ka wa kgaufsi-ufsi. Letšatši le lengwe le le lengwe ka morago ga sekolo, ke be ke dula malaong a-ka gomme ke botša Jehofa ditiragalo ka moka tša letšatši leo. Ke be ke lla gantši. Ge megokgo e dutše e theoga marameng a-ka, ke be ke lopa ka gore, “Hle Jehofa, ntumelele gore ke go hlankele gotee le batho ba gago.” Ka mehla ka morago ga go rapela, ke be ke ikwa ke le kaone kudu.

Lengwalo Leo le Mmatlafaditšego

Ge ke e-na le nywaga e lesome, Jamie o ile a boela Moe go yo dula le tate. Ga bjale ke be ke le kgole kudu le boemo bja moya. Ke moka, ge ke be ke etetše legaeng la moagišani, ke ile ka hwetša dimakasine tše di gatišitšwego ke Dihlatse tša Jehofa. Ke thabile, ke ile ka swara ka hlogo aterese ya ofisi ya lekala la moo gomme ka kitimela gae go yo e ngwala fase. Ke ile ka ngwalela lekala lengwalo le tšwago pelong ke hlalosa maemo a-ka gomme ka kgopela thušo ya moya. Karabo ya bona ya mantšu a kgomago pelo ya matlakala a mabedi, yeo e bego e ngwaletšwe nna feela, e ile ya tlatša mahlo a-ka ka megokgo. Bjo e be e le bohlatse bja gore ke be ke le wa bohlokwa go Jehofa!

Lengwalo le ile la nkgothaletša go ekiša tumelo ya ngwanenyana wa Moisiraele yo a ilego a ba mohlanka wa Naamane, molaodi wa madira a Siria mehleng ya Beibele. O ile a dula a le kgaufsi le Modimo wa gagwe, Jehofa, gaešita le ge a be a le bothopša gomme a dula kgole le naga ya gabo. Le gona, ka go bolela ka tumelo ya gagwe ka sebete, o ile a ipontšha e le hlatse ya gagwe ya therešo.—2 Dikxoši 5:1-4.

Lengwalo le le tšwago ofising ya lekala le okeditše ka gore: “Bjalo ka ngwanenyana, o swanetše go hlankela Jehofa ka go kwa batswadi ba gago le go šoma ka thata sekolong. Le gona, o swanetše go dula o le kgaufsi le Jehofa ka thapelo le ka go ithuta.” Lengwalo ge le phetha le itše: “Danielle, gopola gore go sa šetšwe moo re ka dulago gona, Jehofa o dula a le kgaufsi le rena. Re a tseba gore o dumela se.” (Baroma 8:35-39) Lengwalo le leo ga bjale le hlagetšego e bile le onetšego, le dula le le ka mathomong a Beibele ya-ka. Ke le badile gantši go theoša le nywaga eupša ga go letšatši leo ke ilego ka le bala ka se sekiše megokgo.

Go se go ye kae ka morago ga moo, ke ile ka amogela lengwalo le lengwe. Le be le bontšha gore tate o rulaganyeditše gore ke hwetše dimakasine tša Morokami le Phafoga! ka poso. Ke be ke thabile kudu! Ga bjale ke be ke e-na le kabo ya dijo tša moya ya ka mehla. Ge tokollo e nngwe le e nngwe e fihla, ke be ke e bala ka moka. Ke sa dutše ke e-na le dikopi tša-ka tša mathomo tša dikgatišo tšeo tša bohlokwa. Mo e nyakilego go ba ka yona nako ye, mogolo wa Mokriste go tšwa phuthegong ya lefelong leo o ile a thoma go nketela. Gaešita le ge diketelo tša gagwe e be e le tše kopana, feela e be e le tše di kgothatšago kudu.

Diphetogo di Tliša Tšwelopele

Go sa šetšwe boemo bja-ka bja moya bjo bo kaonefetšego, ke be ke sa dutše ke nyaka go hlankela Jehofa ka bolokologi. Ka gona, ge ke e-ba le nywaga e 13, ke ile ka kgopela mma ge e ba nka yo dula le  tate. Mma o be a nthata gomme le nna ke be ke mo rata kudu, eupša ke be ke ikemišeditše go hlankela Modimo. Ge a se na go dumela, ke ile ka boela Moe gomme ka thoma go ithuta Beibele le phuthego ya lefelong leo. Tate gape o ile a dumelela nna le Jamie gore re be gona dibokeng ka moka. Dihlatse tša lefelong leo di ile tša dira sohle gore di re thuše. Nna le Jamie re ile ra dira tšwelopele ya moya ka go akgofa gomme ka morago ra kolobetšwa re fetana ka dikgwedi tše mmalwa. Ee, thapelo ya bjaneng bja-ka e be e arabilwe. Ke be ke hlankela Jehofa gotee le batho ba gagwe!

Go sa dutše go le bjalo, ke ile ka hlagolela tswalano e kgethegilego le mogatša-rakgadi le rakgadi, e lego Philip le Lorraine Taylor, bao le bona ba bego ba le Phuthegong ya Moe. Ba ile ba ntshwara bjalo ka morwedi wa bona. Ge ba hudugela sehlakahlakeng sa Bougainville, Papua New Guinea go yo hlankela moo go nago le tlhokagalo e kgolo ya bagoeledi ba Mmušo, ke ile ka dumela gatee-tee ge ba ntaletša gore ke sepele le bona. Ke be ke e-na le nywaga e 15 feela, eupša tate le mma ba ile ba ntumelela go sepela.

Kua Bougainville, ke ile ka tšwetša pele sekolo ka go ithuta ke le gae. Ge ke be ke sa ithute, ke be ke fetša nako ya-ka e ntši ke nea bohlatse. Go be go thabiša gakaakang go šoma gotee le badiredi ba baromiwa le ba babulamadibogo! Batho ba lefelong leo e be e le ba ikokobeditšego kudu bao nkilego ka kopana le bona, gomme bontši bja bona bo be bo fišegela go ithuta Beibele.

Ka morago ngwageng woo, dintwa tša bopolitiki di ile tša phulega gomme go ile gwa ba kotsi kudu gore ke dule moo. Go be go le bohloko go tloga sehlakahlakeng seo se se nyenyane le go tlogela batho ba sona ba ba botse. Ge sefofane se hlatloga, ke ile ka bona Philip e lego mogatša-rakgadi a eme tsejaneng ya sefofane a emišeditše letsogo godimo a ntaela. Ge ke dutše ke lla, ke ile ka kgopela Jehofa ka pelong go ntumelela gore ka letšatši le lengwe ke hlankele bjalo ka moromiwa nageng e šele.

Dithapelo tše Oketšegilego di a Arabja

Morago kua Australia, ka morago ga go aloga sekolong se se phagamego, ke ile ka tlwaeletšwa mošomo wa ofising khamphaning ya tša molao. Go sa dutše go le bjalo, tate o be a nyetše gape gomme a hlokomela lapa le legolo la lenyalo la bobedi. Jamie o be a dula le mma. Ka nakwana, ke ile ka dula le motswadi yo mongwe le yo mongwe gare ga bona. Bophelo bo be bo bonagala bo raragane. Ke be ke nyaka go nolofatša bophelo bja-ka gomme ke lebiše tlhokomelo dipakaneng tša moya. Ka gona, ka 1994, ke ile ka tsenela bodiredi bja nako e tletšego kua Moe bjalo ka mmulamadibogo.

Ke be ke thabile gape. Bagwera ba-ka ka phuthegong e be e le bafsa ba sekametšego dilong tša moya gomme ba ile ba ba thekgo e matla go nna. Ge e le gabotse, ka 1996, ke ile ka nyalwa ke yo mongwe wa bona—Will—monna yo a ikokobeditšego, yo a bolelago ka boleta le yo botho, yo ruri e bego e le tšhegofatšo e tšwago go Jehofa.

Re ile ra thabela bophelo bja lenyalo gomme lethabo la rena le be le bonagala le feletše. Ka letšatši le lengwe, Will o ile a fihla gae ka morago ga go šoma le molebeledi wa mosepedi yo a bego a etetše diphuthego tša tikologong ya gabo rena. Ge a se na go nkgopela go dula fase, o ile a botšiša gore, “Na o be o ka rata go huduga go yo thuša phuthego e nngwe?” Gatee-tee ke ile ka re ee ka pelong ya-ka. Lega go le bjalo, ke ipapalela, ke ile ka botšiša gore: “Kae? Vanuatu? Fiji?” Ge Will a araba ka gore “Morwell,” ke ile ka goeletša ka gore, “Eupša moo ke kgaufsi le rena!” Re ile ra sega bobedi bja rena gomme ra dumela gatee-tee gore re tla thabela go hudugela phuthegong ya kgaufsi le rena go yo hlankela bjalo ka babulamadibogo.

Nywageng e meraro e latetšego re le Morwell, re be re thabile e bile bodiredi bja rena bo enywa dienywa. Ke moka, selo se sengwe se se makatšago se ile sa direga. Re ile ra amogela taletšo e tšwago ofising ya lekala la Australia la Dihlatse tša Jehofa ya gore re hlankele bjalo ka babulamadibogo ba kgethegilego. Kabelo ya rena e be e le kae? E be e le nageng e nyenyane ya East Timor, yeo e lego mafelelong a ka bohlabela bja dihlopha tša dihlakahlaka tša Indonesia. * Mahlo a-ka a ile a tlala megokgo. Ke ile ka leboga Jehofa ge a arabile dithapelo tša-ka ka moka. Ga se feela gore o nkamogetše bjalo ka mohlanka gagwe, eupša ga bjale nna le monna wa-ka re be re hlankela nageng e šele.

Go Hlankela Moše wa Mawatle

Re fihlile motse-mošate wa Dili, ka July 2003. Phuthego ya Dili—phuthego e nnoši nageng yeo—e be e e-na le babulamadibogo ba kgethegilego ba 13 ba tšwago Australia le Dihlatse tše sego kae tša lefelong leo. Bana babo rena le dikgaetšedi ba East Timor ba be ba diila kudu;  gomme ba bantši ba be ba lahlegetšwe ke dithoto le ditho tša malapa ntweng ya selegae yeo e tšerego nywaga e 24 gomme ya fela ka 1999. Gape, ba bantši ba kgotleletše kganetšo e šoro ya lapa ka ge ba hweditše tumelo e mpsha. Lega go le bjalo, go sa šetšwe tlaišego ya bona le bodiidi, ba be ba humile moyeng gomme ba thabile.—Kutollo 2:8, 9.

Re hweditše gore bontši bja batho ba East Timor e be e le ba boifago Modimo gomme ba hlompha Beibele. Ge e le gabotse, go se go ye kae ke ge re šetše re e-na le dithuto tša Beibele tše oketšegilego moo re bego re palelwa ke go di swara ka moka! Ge nako e dutše e e-ya, ba bangwe ba barutwana ba rena ba pele ke ge ba šetše ba hlankela le rena e le bana babo rena le dikgaetšedi ba ba kolobeditšwego. Go bona tšwelopele ya bona ya moya go re tlišeditše lethabo le legolo.

Ke moka ka 2006, go ile gwa tsoga mmudubudu o mongwe gape kua Dili. Go se kwane ga dihlopha tša merafe tše di fapa-fapanego go ile gwa baka ntwa e kgolo. Dintlo tše dintši di be di fišitšwe ka mo go feletšego gomme Dihlatse tša lefelong leo di ile tša tšhabela magaeng a babulamadibogo ba kgethegilego. Ntlo ya rena le jarata di be di fetotšwe kampa ya bafaladi ya nakwana gomme ka nako e nngwe batho ba e nyakilego go ba ba lekgolo ba be ba dula le rena! Lefelo la rena le legolo la go emiša dikoloi le ile la dirišwa e le lefelo la go apeela, la go jela le Holo ya Mmušo ya nakwana.

Gaešita le ge kgaufsi le rena go be go thuntšhanwa e bile go thuthupišwa dipomo tše di fošwago ka seatla, legae la rena la babulamadibogo e be e le setšhabelo sa khutšo. Ka moka re ile ra kwa tšhireletšo ya Jehofa. Letšatši le lengwe le le lengwe le be le thoma ka go ahla-ahlwa ga temana ya Beibele. Diboka di be di swarwa bjalo ka mehleng. Re ile ra swara gape le dithuto tša Beibele le bao ba thabelago.

Ge dibeke di feta, go bile molaleng gore go tla ba kotsi bakeng sa bana babo rena bao ba belegetšwego ka bohlabela bja naga go tšwela pele ba dula Dili. Ka gona, bana babo rena ba etelelago pele ba ile ba kgetha go hloma sehlopha se sefsa kua Baucau, e lego motse wa bobedi o mogolo woo o lego bokgoleng bja diiri tše tharo ka bohlabela bja Dili. Ka gona, ke ka baka leo nna le Will re hweditšego kabelo e mpsha.

Re fihlile Baucau ka July 2006, mo e nyakilego go ba nywaga e meraro tlwaa letšatšing leo re fihlilego ka lona East Timor. Sehlopha sa rena se sefsa se be se akaretša babulamadibogo ba kgethegilego ba bane le Dihlatse tša East Timor tše tshelelago. Bana babo rena ba moo ba be ba tlogetše dilo tša bona ka moka kua Dili, lega go le bjalo, ga se ba lahla go myemyela ga bona ka lethabo. Re be re tloga re tšeela godimo kudu potego ya bona le moya wa bona wa boikgafo!

Nna le Will re sa dutše re hlankela Baucau. Re rata kabelo ya rena gomme re sa e lebelela e le e nngwe ya tšhegofatšo e tšwago go Jehofa. Ge ke lebelela morago, ke kgona go bona gore makgolo o be a nepile. Jehofa ga se a ka a palelwa ke go ntlhokomela go theoša le nywaga. Ke mo leboga ka mehla bakeng sa go nnea tokelo ya go mo hlankela gotee le batho ba gagwe. Le gona, ke lebeletše pele ka phagahlo go tlo bona makgolo gape tsogong. Ke moka, nka kgona go mo leboga ge a mphile senotlelo seo se butšego mojako o lebišago bophelong bjo bo thabišago le bjo bo putsago e le ka kgonthe.

[Mengwalo ya tlase]

[Seswantšho go letlakala 26]

Ke e-na le makgolo

[Seswantšho go letlakala 28, 29]

Ke e-na le monna wa-ka, Will