Mogato 6

Kwešišang Maikwelo a Ngwana wa Lena

Ke ka baka la’ng le swanetše go gata mogato wo? Bana ba nyaka gore batho ba bohlokwa kudu maphelong a bona—batswadi ba bona—ba tsebe gore ba ikwa bjang. Ge e ba batswadi ba sa dumelelane le bana ba bona ge maikwelo a bjalo a bontšhwa, bana ba ka se sa bolela le bona ka bolokologi mohlomongwe ba ka ba ba thoma go ikwa ba se sa kgona go ikwa ba lokologile le gore ba inaganele.

Tlhohlo: Bana ba sekametše go bontšheng megopolo ya bona ka tsela ye e feteletšego kudu. Ke therešo gore dilo tše dingwe tšeo bana ba di bolelago di ka befediša batswadi ba bona. Ka mohlala, ngwana yo a ferekanego a ka re, “Ke hloile bophelo.” * Karabo ya motswadi ka tlhago e ka ba gore, “Aowa ga se o bo hloye!” Batswadi ba ka tshwenyega gore ge e ba ba bontšha gore ba kwešiša maikwelo a ngwana a fošagetšego goba megopolo, go swana le gore ba a e amogela.

Tharollo: Dirišang keletšo ya Beibele ya go ba “yo a akgofago mabapi le go kwa, yo a diegago mabapi le go bolela, yo a diegago mabapi le go galefa.” (Jakobo 1:19) Hlokomela gore Jehofa Modimo o ile a kwešiša maikwelo a fošagetšego a bahlanka ba gagwe ba botegago ka go dira gore a ngwalwe ka Beibeleng. (Genesi 27:46; Psalme 73:12, 13) Ka mohlala, ge Jobo a be a welwa ke diteko tše šoro, o ile a re o duma eka a ka hwa.—Jobo 14:13.

Go molaleng gore megopolo e mengwe ya Jobo le maikwelo a gagwe di be di nyaka go phošollwa. Eupša go e na le go ganetša maikwelo a Jobo goba go mo thibela go a bolela, Jehofa o ile a hlompha Jobo ka go se mo felele pelo gomme a mo dumelela go ntšha sa mafahleng. Ke ka morago ga moo, ka botho Jehofa a ilego a mo phošolla. Tate yo mongwe wa Mokriste o boletše taba ye ka gore: “Ka ge Jehofa a ntumelela gore ke tšhollele pelo ya-ka go yena ka thapelo, ke nagana gore ke mo go loketšego gore ke dumelele bana ba-ka go tšhollela maikwelo a bona a lokilego le a sa lokago go nna.”

Nakong e tlago ge o lekega gore o botše ngwana wa gago gore, “Ga o ikwe ka tsela yeo ka kgonthe” goba “O ka se nagane seo e le ka kgonthe” gopola molao wa Jesu wo o tlwaelegilego wo o rego: “Ka mo le nyakago batho ba le dira ka gona, le lena le ba direng ka wona mokgwa woo.” (Luka 6:31) Ka mohlala, nagana ge o ile wa swarwa gabohloko mošomong goba mohlomongwe o ile wa nyamišwa ka baka la go palelwa ga gago. O botša mogwera wa gago wa paale kamoo o ferekanego ka gona e bile o mmotša gore ga o kgone go lebeletšana le mošomo wa gago. O be o ka nyaka gore mogwera wa gago a dire’ng? A go botše gore ga o ikwe ka tsela yeo e le ka kgonthe gomme kapejana a go botše ge bothata e le phošo ya gago? Goba o be o ka rata ge mogwera wa gago a ka re: “Se e swanetše go ba e le bothata. Na letšatši la gago le go sepeletše gabotse”?

Bana go swana le batho ba bagolo ba nyaka go amogela keletšo ge e ba ba nagana gore yo a e neago o a ba kwešiša le go kwešiša seo ba lebeletšanago le sona. Lentšu la Modimo le re: “Pelo ya mohlale e ruta leleme la xaxwe; e atiša thutô molomong wa xaxwe.”—Diema 16:23.

O ka kgonthišega bjang gore tayo ye o e neago e amogelwa ka kgonthe?

[Mongwalo wa tlase]

[Mantšu a ipiletšago a tsopotšwego go letlakala 8]

“Mo-fetola-lentšu à sešo a kwišiša ó tlo dira tša bošilo tša mo iša dihlonyeng.”—Diema 18:13