Bafsa Ba A Botšiša . . .

Nka Kgaotša Lesebo Bjang?

“Ka nako e nngwe ke ile ka ya moletlong gomme letšatši le le latelago go ile gwa phatlalatšwa mabare-bare a gore ke bile le kopano ya botona le botshadi le yo mongwe wa bašemane bao ba bego ba le gona moletlong woo. Seo e be e se therešo le gatee!”—Linda. *

“Ka dinako tše dingwe ke kwa mabare-bare a gore ke beana mabaka le motho yo a itšego—motho yoo ge e le gabotse ke sa mo tsebego le go mo tseba! Batho ba bantši bao ba sebago ga ba itshwenye ka go lekodišiša ditaba ka botlalo.”—Mike.

LESEBO le ka dira gore bophelo bja gago bo raragane go feta kamoo re bonago go le bjalo difiliming. Botšiša Amber yo a nago le nywaga e 19. O re: “Ke bile mohlaselwa wa ka mehla wa lesebo. Go ile gwa ba le mabare-bare a gore ke imile le a gore ke ile ka ntšha dimpa, gwa ba le a gore ke rekiša dihlare-tagi, ke a di reka le gore ke a di diriša. Ke ka baka la’ng batho ba bolela dilo tša mohuta wo ka nna? Ruri ga ke tsebe!”

Lesebo Leo le Fetišwago ka Thekinolotši ya Maemo a Godimo

Nakong ya ge batswadi ba gago ba be ba le nywageng ya mahlalagading, gantši batho ba be ba swanetše go bonana e le gore ba kgone go botšana ditaba tša morago-rago. Lega go le bjalo, lehono lesebo le fetišwa ka thekinolotši ya maemo a godimo. Mošemane goba ngwanenyana yo a nago le maikemišetšo a mabe a ka go senya leina ntle le go ntšha lentšu ka molomo a diriša e-mail le melaetša ya megala ya cellular. Selo feela seo go nyakegago gore a se dire ke go kgotla dikonotswana tše sego kae e le gore a romele mabare-bare a kotsi go batho ba bantši bao ba a letetšego ka tetelo-kgolo.

Ba bangwe ba re Inthanete e šetše e tšeela mogala sebaka bjalo ka sedirišwa se se rategago sa go fetiša lesebo. Mabakeng a mangwe go ile gwa thewa mekero ya Web ka morero wa go goboša motho yo mongwe. Ka mo go tlwaelegilego, di-online blog—mekero ya Web yeo e nago le tsebišo ya motho ka noši—di tletše ka lesebo leo motho a ka se kego a le botša motho yo mongwe ba lebane. Ka kgonthe, nyakišišong e nngwe 58 lekgolong ya bafsa e boletše gore go ile gwa ngwalwa dilo tše kwešago bohloko ka yona Inthaneteng.

Eupša, na ka mehla go fošagetše go bolela ka ba bangwe? Le gona, na go na le selo seo go thwego ke . . .

 Lesebo le se Nago Kotsi?

Na se se latelago ke therešo goba maaka?

Lesebo le Dula le le Kotsi. □ Therešo □ Maaka

Karabo e nepagetšego ke efe? Therešo ke gore go ithekgile ka tsela yeo o hlalosago “lesebo” ka yona. Ge e ba lentšu le le bolela go fo ipolelela, go ka ba le dinako tšeo ka tšona le swanetšego. Ge e le gabotse, Beibele e re botša gore “re kgahlegele maphelo a ba bangwe.” (Bafilipi 2:4, New Century Version) Se ga se bolele gore re swanetše go ba bafeane ditabeng tšeo di sa re kgomego. (1 Petro 4:15) Eupša go fo ipolelela gantši go re thuša go hwetša tsebišo ya bohlokwa e bjalo ka gore ke mang yo a tlogo nyala goba go nyalwa, ke mang yo a hweditšego ngwana le gore ke mang yo a nyakago thušo ya mohuta o itšego. Therešo ke gore re ka se re re na le taba le ba bangwe ge e ba re sa bolele ka bona.

Lega go le bjalo, go fo ipolelela go ka fetoga lesebo le kotsi gabonolo. Ka mohlala, motho yo mongwe a ka fetiša taba e sa rego selo ya gore “Matome le Refilwe ba a swanelana” e le e bolelago gore “Matome le Refilwe ba a ratana”—gaešita le ge Matome le Refilwe ba sa tsebe selo ka go ratana ga bona. Mohlomongwe o ka re ‘Seo ga se bothata bjo bogolo,’ eupša o be o ka se bolele bjalo ge e ba o be o le Matome goba Refilwe!

Julie yo a nago le nywaga e 18 o ile a ba mohlaselwa wa lesebo le bjalo, gomme seo se ile sa mo kweša bohloko kudu. O re: “Ke ile ka galefa gomme seo se ile sa dira gore ke ipotšiše ge e ba nka bota batho ba bangwe.” Jane yo a nago le nywaga e 19 le yena o ile a ba boemong bjo bo swanago. O re: “Ke ile ka feleletša ke phema mošemane yoo go thwego ke beana mabaka le yena.” O oketša ka gore: “Go be go nyamiša ka gore re be re le bagwera le gona ke be ke nagana gore re swanetše go kgona go boledišana ka ntle le gore go be le mabare-bare.”

Go molaleng gore lesebo le kotsi le na le mafelelo a šoro kudu. Lega go le bjalo, ba bantši bao ba ilego ba gobatšwa ke lesebo ba a dumela gore le bona ba ile ba seba ba bangwe. Taba ke gore ge motho yo mongwe a bolelwa gampe, teko ya gore re kopanele lesebong leo e ba matla. Ka baka la’ng? Phillip yo a nago le nywaga e 18 o šišinya gore: “Ke tsela ya go tšhabela mathata a bophelo. Batho ba bona go le kaone go bolela ka mathata a ba bangwe go e na le go bolela ka a bona.” Ka gona, o ka dira’ng ge e ba poledišano e sa rego selo e fetoga lesebo le kotsi?

Laola Dipoledišano ka Kelohloko!

Nagana ka bokgoni bjo bo nyakegago e le gore motho a otlele koloi mmileng wa lephefo. Go ka tšwelela boemo bjo bo nyakago gore o sepelele ka lehlakoreng le lengwe la tsela, o sepele ganyenyane goba o eme ka mo go feletšego go sa letelwa. Ge e ba o phafogile gomme o tshwenyegile ka go šireletšega ga gago, o ka bona seo se letšego kua pele gomme wa gata mogato o swanetšego.

Go bjalo le ka poledišano. Gantši o ka kgona go bona ge poledišano e fetoga lesebo le kotsi. Ge seo se direga, na ka bohlale o ka fapogela ka lehlakoreng le lengwe la tsela ge re bolela ka tsela ya seswantšhetšo? Ge e ba o sa dire bjalo, e re re go lemoše—lesebo le ka baka kotsi. Mike o re: “Ke ile ka bolela selo seo se sa kgahlišego ka ngwanenyana yo mongwe—ka re o rata bašemane kudu—gomme taba yeo e ile ya fihla ditsebeng tša gagwe. Nka se ke ka lebala kamoo a bego a bolela le nna ka gona ge a be a mpotšiša ka taba ye le kamoo a bego a kwešitšwe bohloko ka gona ke selo seo ke se boletšego ke sa nagane. Re ile ra lokiša ditaba, eupša ke be ke sa thaba ka ge ke be ke tseba gore ke kwešitše motho yo mongwe bohloko ka tsela yeo!”

Ke therešo gore go ka nyakega sebete e le gore o kgaotše poledišano yeo e šetšego e fetogile lesebo. Lega go le bjalo, go bjalo ka ge Carolyn yo a nago le nywaga e 17 a bolela gore: “O swanetše go ba šedi ka seo o se bolelago. Ge e ba o sa ka wa kwa taba go tšwa mothopong o ka botwago, go ka direga gore o phatlalatša maaka.”

E le gore o pheme lesebo le kotsi, latela keletšo ya mangwalo a a Beibele:

“Dipolelong tše dintši bošaedi ga bo hlokwe, eupša e a thibago molomo wa gagwe, ke yo bohlale.” (Diema 10:19, PK) Ge o tšwela pele o bolela, go ba le kgonagalo e ntši ya gore o tla bolela selo se itšego seo o tlago go itsholela sona ka morago. Ka gona, go kaone go tsebja o le motho yo a theetšago ka setu go e na le go tsebja o le motho yo a bolelago kudu!

“Pelo ya moloki e akanya diphetolô; molomo wa yo kxôpô o thšoloxa tše di befilexo.” (Diema 15:28) Nagana pele o bolela!

“Bolelang therešo yo mongwe le yo mongwe wa lena le moagišani wa gagwe.” (Baefeso 4:25.5) Pele o fetiša tsebišo, kgonthišetša gore ke ya therešo.

“Ka mo le nyakago batho ba le dira ka gona, le  lena le ba direng ka wona mokgwa woo.” (Luka 6:31) Pele o bolela selo se itšego ka motho yo mongwe gaešita le ge e le sa therešo, ipotšiše gore ‘Ke be ke tla ikwa bjang ge e ba ke be ke le boemong bja gagwe gomme motho yo mongwe a utolla ditaba tšeo di lego mabapi le nna?’

“A re phegeleleng dilo tše di išago khutšong le dilo tše e lego tša go agana.” (Baroma 14:19) Gaešita le tsebišo yeo e lego ya therešo e ka ba kotsi ge e ba e sa age ba bangwe.

‘Go dire boikemišetšo bja gago go phela ka khutšo le go šetša ditaba tša gago le go šoma ka diatla tša gago.’ (1 Bathesalonika 4:11) O se ke wa tsena-tsenana le ditaba tša ba bangwe. Go na le ditsela tše kaone tša go diriša nako ya gago.

Ge Wena o le Mohlaselwa

Mohlomongwe o ka dumela gore motho o swanetše go laola leleme le go phema go seba ka ba bangwe. Eupša ge e le wena o sebjago, o ka se tšee taba yeo gabohwefo le ganyenyane. Joanne yo a nago le nywaga e 16 le yo a ilego a ba mohlaselwa wa lesebo le kotsi o re: “Ke be ke nagana gore nka se tsoge ke bile le bagwera gape. Mašegong a mangwe ke be ke lla go fihlela ke robala. Ke be ke ikwa eka ke sentšwe leina ka mo go feletšego!”

O ka dira’ng ge e ba o le mohlaselwa wa mabare-bare a sa kgonthišetšwago?

▪ Nyakišiša lebaka. Leka go kwešiša selo seo se tutueletšago batho go seba. Ba bangwe ba dira bjalo e le gore ba ikhweletše botumo, gore go bonale eka ba tseba ditaba. Karen yo a nago le nywaga e 14 o re: “Ba nyaka gore batho ba nagane gore ba tseba dilo feela ka gobane ba bolela ka batho ba bangwe.” Go se ikholofele go ka dira gore bafsa ba bangwe ba bolele ba bangwe gampe e le gore ba ikwe ba ba phagametše. Renee yo a nago le nywaga e 17 o hlalosa lebaka le lengwe. O re: “Batho ga ba thabele bophelo. Ba nyaka go thoma ditaba tšeo di sego gona ka go thoma mabare-bare e le gore ba dire gore bophelo bo thabiše.”

▪ Laola Maikwelo a Gago. Motho yo a kwešitšwego bohloko ke lesebo le kotsi gomme a palelwa ke go laola maikwelo a gagwe a go hlabišwa dihlong le lehloyo a ka dira dilo tšeo a tlago go itsholela tšona ka morago. Diema 14:17 e re: “Yo pelo-xále ó tlo dira tša bošilo.” Gaešita le ge go se bonolo go dira seo, ye ke nako ya go itshwara ka tsela e fetago e tlwaelegilego. Ge e ba o dira bjalo, o tla phema go wela molabeng woo motho yo a go sebilego a wetšego go wona.

▪ Lemoga maikemišetšo a kgonthe. Ipotšiše dipotšišo tše di latelago: ‘Na ke kgodišegile gore seo ke se kwelego ke sona seo se boletšwego ka nna? Na ke mabare-bare goba ke go se kwešišane ga kgonthe? Na ke tšeela dilo godimo ka mo go sa nyakegego?’ Ke therešo gore re ka se lokafatše lesebo le kotsi. Lega go le bjalo, go galefa go ka go gobatša kudu go feta kamoo lesebo le ka dirago. Ka gona, e-ba le pono yeo e ilego ya thuša Renee. O re: “Ke kwa bohloko ge motho yo mongwe a bolela selo se sebe ka nna, eupša ke leka gore ke se ke ka se tšeela godimo kudu. Lebaka ke gore mohlomongwe bekeng e tlago ba tla be ba bolela ka motho yo mongwe goba ka selo se sengwe.” *

Selo se Sekaone-kaone Seo o ka Itšhireletšago ka Sona

Beibele e a dumela gore “ka moka ga rena re kgopša gantši,” e bile e oketša ka gore: “Ge e ba motho a sa kgopše ka lentšu, yo ke motho yo a phethagetšego, yo a kgonago go laola mmele wa gagwe ka moka.” (Jakobo 3:2) Ka gona, e tla ba bošilo go tšeela godimo selo se sengwe le se sengwe seo se bolelwago ka rena. Mmoledi 7:22 e re: “Xobane pelo ya xaxo e tseba xobane ké xa-ntši le wêna Ò roxa ba bangwê.”

Ge o le mohlaselwa wa lesebo le kotsi, selo se sekaone-kaone seo o ka itšhireletšago ka sona ke boitshwaro bja gago bjo bobotse. Jesu o itše: “Bohlale bo hlatselwa gore bo lokile ke mediro ya bjona.” (Mateo 11:19) Ka gona leka go dula o e-na le bogwera le lerato e le ka kgonthe. O ka makatšwa ke kamoo go dira bjalo go ka kgaotšago lesebo ka pela ka gona—goba go ka go thušago gore o kgone go kgotlelela ditla-morago tša lona.

Lelokelelo la dihlogo tše oketšegilego tša “Bafsa ba a Botšiša . . . ” le ka hwetšwa go mokero wa Web wa www.watchtower.org/ype

SEO GO KA NAGANWAGO KA SONA

▪ O ka phema bjang go seba ba bangwe?

▪ O tla dira’ng ge e ba motho yo mongwe a go seba?

[Mengwalo ya tlase]