Dira Gore Lapa la Gago e be Lefelo le le Šireletšegilego

“BA BA se nago maikwelo a borutho a tlhago.” Ka mantšu ao a nyamišago, Beibele e hlalosa batho ba bantši ba mehla ya rena, e lego nako yeo e bitšwago ‘mehla ya bofelo.’ (2 Timotheo 3:1, 3, 4) Leuba le la go gobošwa ga bana ka lapeng le nea bohlatse bjo bo bonagalago bja go nepa ga boporofeta bjoo. Ge e le gabotse, lentšu la mathomo la Segerika e lego aʹstor·gos leo ka Seisemane le fetoletšwego e le “ba ba se nago maikwelo a borutho a tlhago,” le šišinya lerato leo le swanetšego go ba gona magareng ga ditho tša lapa, kudu-kudu magareng ga batswadi le bana. * Bjoo gantši ke boemo bjo kgobošo ya bana e diregago go bjona.

Banyakišiši ba bangwe ba re mogoboši yo a tlwaelegilego kudu wa tša botona le botshadi ke motho wa monna. Ditho tše dingwe tša banna tša leloko le tšona ke bagoboši. Gaešita le ge bahlaselwa ba bantši e le banenyana, bašemane ba bantši le bona ba a gobošwa. Bagoboši ba basadi le bona ke ba bantši go feta kamoo o ka naganago ka gona. Mohlomongwe sebopego se sengwe se se sa begwego gantši ke sa kgobošo ya bana ba motho, moo yo mogolo goba yo a nago le matla a gapeletšago goba a goketšago ngwanabo goba kgaetšedi ya gagwe yeo e se nago matla go ba le kopano ya botona le botshadi le yena. Bjalo ka motswadi, ke therešo gore o hwetša ditiro tše bjalo ka moka e le tše di šišimišago.

O ka dira bjang gore mathata a a se ke a tšwelela ka lapeng la gago? Go molaleng gore setho sa lapa le lengwe le le lengwe se swanetše go ithuta le go hlompha melao e itšego ya motheo yeo e thibelago boitshwaro bja kgobošo. Lefelo le le botse kudu leo go ka hwetšwago tlhahlo e bjalo go lona ke ka Lentšung la Modimo, Beibele.

Lentšu la Modimo le Ditswalano tša Batho

E le gore e be le le šireletšegilego, lapa le lengwe le le lengwe le swanetše go latela ditekanyetšo tša Beibele tša boitshwaro. Beibele ga e bolele ka go šia ge e hlalosa ditaba tša tša botona le botshadi. E di hlalosa ka seriti, ka go lebanya gomme e opa kgomo lenaka. E bontšha gore Modimo o be a rerile gore dikopano tša botona le botshadi e be tšhegofatšo go monna le mosadi. (Diema 5:15-20) Lega go le bjalo, e nyatša kopano ya botona le botshadi ka ntle ga tokišetšo yeo. Ka mohlala, Beibele e gana  kopano ya botona le botshadi magareng ga ba leloko. Go Lefitiko kgaolo 18, mehuta e mentši ya ditswalano tša kopano ya botona le botshadi magareng ga ba leloko e a ganetšwa. Ela hloko mantšu a ka mo go kgethegilego: “Motho a se kê a batamêla mosadi e lexo motswalô wa xaxwe a mo hlobodiša [go ba le dikopano tša botona le botshadi]. Ké Nna Morêna.” (Mongwalo o sekamego ke wa rena.)—Lefitiko 18:6.

Jehofa o lokeleditše dikopano tša botona le botshadi tša magareng ga ba leloko gare ga “makgapha” ao kotlo ya ona e lego lehu. (Lefitiko 18:26, 29, PK) Go molaleng gore Mmopi o na le ditekanyetšo tše di phagamego kudu ka taba ye. Lehono, mebušo e mentši e na le pono e swanago, e ganetša go gobošwa ga bana ka tša botona le botshadi ka lapeng. Gantši go ya ka molao ngwana yo a akaretšwago dikopanong tša botona le botshadi le motho yo mogolo o katilwe. Ke ka baka la’ng go šomišwa lentšu leo le matla ge e ba a se a gapeletšwa?

Mebušo e mentši e lemogile gore seo Beibele e se boletšego kgale ka bana ke sa therešo—gore ga ba kgone go nagana ka tsela yeo batho ba bagolo ba naganago ka yona. Ka mohlala, Diema 22:15 e re: “Bošilo . . . bo xwêrana le pelo ya mošemanyana.” Moapostola Paulo le yena o ile a budulelwa gore a ngwale gore: “Ge ke be ke le ngwana, ke be ke . . . nagana bjalo ka ngwana, ke eleletša bjalo ka ngwana; eupša ka ge bjale ke le monna, ke lahlile mekgwa ya ngwana.”—1 Bakorinthe 13:11.

 Ngwana ga a kgone go kwešiša e le ka kgonthe seo se bolelwago ke kopano ya botona le botshadi, goba go kwešiša mafelelo ao a tlago go latela ge nywaga e dutše e feta. Ka gona, batho ba bantši ba dumela gore bana ga ba kgone go ba le kwešišo e feletšego e le gore ba ka dumela go ba le dikopano tša botona le botshadi. Ka mantšu a mangwe, ge e ba motho yo mogolo (goba mofsa yo a gotšego ka mo go lekanego) a e-ba le dikopano tša botona le botshadi le ngwana, motho yo mogolo a ka se ke a lokafatša tiro yeo ka go bolela gore ngwana ga se a mo ganetša goba gore ke ngwana yo a mo dumeletšego. Motho yo mogolo o na le molato wa go kata. Bjo ke bosenyi bjoo gantši kotlo ya bjona e lego go golegwa. Motho yo a katilego ke yena a ikarabelago ka tiro ye, e sego mohlaselwa yo a bego a gana.

Lega go le bjalo, ka manyami, mebušo lehono ga e otle batho bao ba ikarabelago ka bontši bja bosenyi bjoo. Ka mohlala, kua Australia, go akanyetšwa gore ke feela 10 lekgolong ya batho bao ba dirago melato ya tša botona le botshadi bao ba sekišwago gomme ba mmalwa ba hwetšwa ba le molato. Dinaga tše dingwe le tšona di bile le pego e swanago. Le ge mebušo e ka dira mo gonyenyane go šireletša malapa a Bokriste, go diriša melao ya motheo ya Beibele go ka a šireletša le go feta.

Bakriste ba therešo ba lemoga gore Modimo yo a ilego a dira gore melao yeo ya motheo e ngwalwe ka Lentšung la gagwe ga a fetoge. O bona selo se sengwe le se sengwe seo re se dirago, gaešita le seo se utegilego go batho ba bantši. Beibele e re: “Dilo ka moka di hlobotše e bile di molaleng mahlong a yo re ikarabelago go yena.”—Baheberu 4:13.

Modimo o re lebelela re ikarabela ge e ba re roba melao ya gagwe le go kweša ba bangwe bohloko. Ka lehlakoreng le lengwe, o a re šegofatša ge re e-kwa melao ya gagwe e holago ya mabapi le bophelo bja lapa. E mengwe ya melao yeo ke efe?

Lapa le le Kopantšwego ke Lerato

Beibele e re botša gore: “Lerato, . . . ke setlemo se se phethagetšego sa botee.” (Bakolose 3:14) Go etša ge le hlaloswa ka Beibeleng, lerato ga e fo ba maikwelo. Le hlaloswa ke tsela yeo le tutuetšago ka yona—ka boitshwaro bjo le bo kgothaletšago le mediro yeo le e thibelago. (1 Bakorinthe 13:4-8) Go bontšha lerato ka lapeng go bolela go swara yo mongwe le yo mongwe ka seriti, tlhompho le ka botho. Go bolela go phela le ditho tša lapa ka go dumelelana le tsela yeo Modimo a di lebelelago ka yona. Modimo o nea yo mongwe le yo mongwe karolo e hlomphegago le ya bohlokwa.

Bjalo ka hlogo ya lapa, tate o swanetše go etelela pele go bontšheng lerato. O kwešiša gore tate wa Mokriste ga se a newa tumelelo ya go ba mogateledi, a diriša matla a gagwe gampe go mosadi wa gagwe goba bana ba gagwe. Go e-na le moo, o lebelela go Kriste e le mohlala wa gagwe wa bohlogo. (Baefeso 5:23, 25) Ka gona ke yo bonolo le yo lerato go mosadi wa gagwe e bile ga a fele pelo le gona o bonolo baneng ba gagwe. O ba šireletša ka potego gomme o dira sohle seo se lego matleng a gagwe go thibela selo le ge ele sefe seo se ka ba amogago khutšo, go hloka molato goba go ikwa ba ka bota motho yo mongwe le go ikwa ba šireletšegile.

Ka mo go swanago, mosadi le mma o na le karolo ya bohlokwa le ye e nago le seriti. Beibele e diriša maikwelo a tlhago a go šireletša a diphoofolo go bontšha kamoo Jehofa le Jesu ba šireletšago ka gona. (Mateo 23:37) Mma yo e lego motho le yena o swanetše go šireletša bana ba gagwe ka go tia. Ka lerato, o akgofela go ba šireletša go feta kamoo yena a ka itšhireletšago ka gona. Batswadi ga ba dumelele go dirišwa gampe ga matla, bonkgwete goba go tšhošetša go tšwelela tseleng yeo ba dirišanago ka yona le yeo ba dirišanago ka yona le bana ba bona; e bile ga ba dumelele bana ba bona go diriša mekgwa e bjalo magareng ga bona.

Ge setho se sengwe le se sengwe sa lapa se bontšha tlhompho le seriti go ba bangwe, go tla ba le poledišano e botse. Mongwadi William Prendergast o re: “Batswadi ka moka ba swanetše go ba le poledišano ya ka mehla e sa kgaotšego le ya go ntšhetšana sa mafahleng le bana ba bona goba bafsa ba lego mahlalagading.” O oketša ka gore: “Se se bonagala e le tharollo e botse kudu bothateng bja go gobošwa ka tša botona le botshadi.” Ka kgonthe, Beibele e kgothaletša poledišano e bjalo ya ka mehla le e lerato. (Doiteronomio 6:6, 7) Ge keletšo yeo e latelwa, legae e ba lefelo leo setho se sengwe le se sengwe se ka ntšhago sa mafahleng se lokologile e bile se šireletšegile.

Ke therešo gore re phela lefaseng le kgopo gomme re ka se thibele mekgwa ka moka ya kgobošo. Lega go le bjalo, legae le le šireletšegilego e ka ba thušo e kgolo kudu. Ge e ba setho se sengwe sa lapa se kwešitšwe bohloko ke batho ba ka ntle, se tseba gabotse moo se swanetšego go ya gona bakeng sa khomotšo le kwelobohloko. Legae le le bjalo ruri ke botšhabelo, lefelo le le šireletšegilego lefaseng le le dubegilego. Eka Modimo a ka šegofatša maiteko a lena go dira gore lapa la lena le be ka yona tsela yeo!

[Mongwalo wa tlase]

[Lepokisi/Seswantšho go letlakala 10]

DITŠHIŠINYO BAKENG SA LEGAE LE LE ŠIRELETŠEGILEGO

Inthanete: Ge e ba bana ba gago ba e-na le tumelelo ya go šomiša Inthanete, go swanetše go ba le ditaelo tša gore ba e šomiše bjang ka tšhireletšego. Go na le mekero e mentši ya diswantšho tše di kgothaletšago bootswa gaešita le di-chat room le mekero e mengwe ya poledišano yeo bagoboši ba bana ka dikopano tša botona le botshadi ba nyakago bana go yona gore ba ba goketše. Ke gabohlale go bea computer lefelong la phatlalatša moo batswadi ba ka kgonago go e bona ge e dirišwa. Bana ga se ba swanela go nea tsebišo ya motho ka noši goba go rulaganya go bonana le motho le ge e le ofe yoo ba kopanego le yena ka Inthanete ka ntle le tlhahlo ya batswadi.—Psalme 26:4.

Dino tše di Tagago: Mabakeng a mantši a go gobošwa ga bana ka tša botona le botshadi, go ba go nwelwe bjala. Phihlelo e bontšha gore batho ba bagolo bao ba nwago kudu ba palelwa ke go itshwara; ba bangwe ba ineela dikganyogong tšeo ba bego ba ka di thibela. Boemong le ge e le bofe, kotsi ye e oketša lebaka le lengwe la go kwa keletšo ya Beibele ya go phema botagwa le go nwa ka mo go feteletšego.—Diema 20:1; 23:20, 31-33; 1 Petro 4:3.

Nako ya go ba Noši: Mosadi yo mongwe o gopola gore: “Ka morago ga ge mma a hlokofetše, ke tate feela yo a bego a e-na le digareteine mafasetereng ka ntlong goba lebati ka phapošing ya gagwe ya go robala. O be a sa re nee sebaka sa go ba noši—gaešita le ka phapošing ya go hlapela.” Monna yo o ile a goboša barwedi ba gagwe ka moka. Setho se sengwe le se sengwe sa lapa se swanetše go kwešiša bohlokwa bja go ba noši. Go etša ge batswadi ba nyaka nako ya go ba noši ka dinako tše itšego, le bona ba swanetše go nea bana nako e itšego ya go ba noši ge ba dutše ba gola. Batswadi ba bohlale ba swara ba bangwe kamoo ba ka ratago gore le bona ba ba sware ka gona.—Mateo 7:12.