Go Bota Goba go se Bote

Mongwadi wa Leisemane wa ditiragatšo William Shakespeare o ngwadile gore: “O se ke wa bota mapolanka ao a bodilego.” Ka kgonthe, pele o ka gata mapolanka ao a lego leporogong leo le lego godimo kudu o be o tla rata go kgonthišetša gore ga se a bola.

MANTŠU a Shakespeare a dumelelana le a Kgoši e bohlale ya Isiraele ya bogologolo, Salomo, yoo a ngwadilego nywageng e ka bago 3 000 e fetilego gore: “Lešilo le dumêla ’taba tšohle; mohlale ó hlatha dikxatô.” (Diema 14:15) Ee, ke lešilo feela leo le tlago go phela ka go fo amogela selo se sengwe le se sengwe seo le se kwago ka ntle le go botšiša, le thea diphetho le ditiro tša lona keletšong e sa rego selo goba dithutong tše di se nago motheo. Go bota selo se se sa botegego—go etša go sepela mapolankeng ao a bodilego—go ka lebiša kotsing. O ka ipotšiša gore, ‘Na go na le mothopo le ge e le ofe wa tlhahlo woo o swanelwago ke go botwa?’

Batho ba dimilione go dikologa lefase ba bea kholofelo ya bona e feletšego pukung ya bogologolo yeo e bitšwago Beibele e Kgethwa. Ba ithekga ka puku ye gore e hlahle dikgato tša bona. Ba thea diphetho tša bona keletšong ya yona gomme ba dumelelanya ditiro tša bona le dithuto tša yona. Ge re bolela ka tsela ya seswantšhetšo, na batho ba bjalo ba sepela godimo ga mapolanka ao a bodilego? Karabo ya potšišo ye e ithekgile kudu ka karabo ya potšišo e nngwe gape, Na go na le mabaka a kwagalago a go bota Beibele? Tokollo ye ya Phafoga! e ahla-ahla bohlatse bja seo.

Morero wa tokollo ye ya Phafoga! ga se go go gapeletša gore o amogele ditumelo le dipono tša bodumedi bjo itšego. Go e na le moo, e reretšwe feela go nea bohlatse bjo matla bjoo bo kgodišitšego batho ba dimilione gore Beibele e swanelwa ke gore ba e bote. Ka morago ga ge o badile dihlogo tše di latelago, o tla ikgethela ka noši ge e ba Beibele e swanelwa ke gore o e bote.

Taba ye e nyaka gore o naganišiše ka yona. Ge e le gabotse, ge e ba Beibele e le mothopo o botegago ka kgonthe wa tlhahlo e tšwago go Mmopi wa rena, gona wena le bao o ba ratago le swanetše go hlahloba seo e se bolelago.

Lega go le bjalo, sa pele anke re boleleng ka dintlha tše dingwe tše di kgahlišago kudu tša Beibele. Ga go pelaelo gore Beibele ke puku ya moswana-noši e le ka kgonthe.