“Ipontšheng le le ba lebogago”

▪ Beibele e kgothaletša barapedi ba Modimo leboelela gore ba leboge. Psalme 92:1 e re: “Xo leboxa Morêna ké mo xo botse.” Ka mo go swanago, moapostola Paulo o eleditše ka gore: “Ipontšheng le le ba lebogago.”—Bakolose 3:15.

Go na le lebaka le le kwagalago la go ba ba lebogago. Moprofesara Robert Emmons wa Yunibesithi ya California kua Davis o re: “Banyakišiši ba ditaba tša mabapi le go leboga ba šišinya gore maikwelo a go ba yo a lebogago a hola kudu go thušeng batho go lebeletšana le mathata a letšatši le letšatši, kudu-kudu kgateletšego le go kgona go ikwa ba le bohlokwa.”

Makasine wa Time o bolela mehola e mengwe ka gore: “Batho bao ba itlhalosago e le ba lebogago . . . gantši ba ba mafolofolo kudu le go ba le pono e botse ka dilo, ga ba gateletšege kudu e bile ga ba hlaselwe ke kgateletšego e tseneletšego go feta batho ka kakaretšo.”

Lega go le bjalo, ka manyami Beibele e boletše e sa le pele gore “mehleng ya bofelo,” batho ba bantši ba be ba tla ipontšha e le “baithati” le “ba go se leboge.” (2 Timotheo 3:1-5) Bakriste ba therešo ba ka phema bjang go fetetšwa ke moya wo? Mongwadi wa Beibele o re: “Nna Morêna Modimo wa xaxo ke Xo ruta tše di Xo holaxo; ke Xo sepediša mo tseleng ye O swanetšexo xo e swara.” (Jesaya 48:17) Ka go kwa melao ya Modimo, re šireletšwa manyaming a mantši ao a welago bao ba ineetšego go phegeleleng dikganyogo tša boithati. Go oketša moo, re na le kgodišego ya gore Jehofa o bona maiteko a rena le gore o tla re putsa ka mo go swanetšego. (Baheberu 6:10) Mehola e bjalo e re tutueletša go ‘leboga Jehofa.’—Psalme 107:8.