Pono Ya Beibele

Ke ka Baka La’ng re Swanetše go Hlokomela Tikologo ya Lefase?

GO BONALA mediro ya batho e senya boemo bja polanete ya rena kudu gona bjale go feta le ge e le neng pele historing. Ge dikotsi tša go ba le mathata a bjalo ka go phagama ga tekanyo ya phišo ya lefase di gola kudu, bo-rathutamahlale, mebušo le dihlopha tša bo-rakgwebo ba oketša maiteko a bona a go rarolla mathata.

Na re na le boikarabelo bja go thuša go hlokomela tikologo re le motho ka o tee ka o tee? Ge e ba go le bjalo, re ikarabela go fihla bokgoleng bofe? Beibele e re nea mabaka a kwagalago a go dira dilo ka tsela yeo e holago lefase. Le gona e re thuša go ba ba leka-lekanego maitekong a rena a go dira bjalo.

Go Thekga Morero wa Mmopi wa Rena

Jehofa Modimo o bopile lefase gore e be legae la batho le bjalo ka serapa. O hlalositše modiro wa gagwe ka moka e le o “botse kudu” gomme a abela motho gore a ‘leme lefase le go le diša.’ (Genesi 1:28, 31; 2:15) Modimo o ikwa bjang ka boemo bja gona bjale bja lefase? Go molaleng gore o kwešwa bohloko ke tsela yeo batho ba swarago lefase gampe ka yona, ka gobane Kutollo 11:18 e bolela e sa le pele gore o tla “senya bao ba senyago lefase.” Ka gona ga se ra swanela go hlokomologa seo se diragalelago lefase.

Beibele e re kgonthišetša gore Modimo o tla fediša mehlala ka moka ya tshenyo yeo e bakilwego ke motho, ge a ‘dira gore dilo ka moka e be tše difsa.’ (Kutollo 21:5) Lega go le bjalo, ga se ra swanela go phetha ka gore ka ge mafelelong Modimo a tla tsošološa lefase, tsela yeo re le swarago ka yona gona bjale ga e na taba. Ga go bjalo le gatee! Re ka bontšha bjang gore re na le pono e swanago le ya Modimo ka polanete ya rena le gore re thekga thato ya gagwe ya gore e be paradeise?

Go Tsenya Letsogo go Direng Gore Lefase e be le le Hlwekilego

Mediro e tlwaelegilego ya batho e tšweletša ditšhila ka tekanyo e itšego. Ka bohlale,  Jehofa o hlamile medikologo ya lefase ya tlhago ya go tloša ditšhila tše bjalo bakeng sa go hlwekiša moya, meetse le mobu. (Diema 3:19) Dilo tšeo re di dirago di swanetše go dumelelana le medikologo yeo. Ka gona, re swanetše go ba šedi gore re se ke ra tlaleletša mathateng a tikologo ya lefase go sa nyakege. Go ba šedi ka mokgwa woo go bontšha gore re rata baagišani ba rena bjalo ka ge re ithata. (Mareka 12:31) Ela hloko mohlala o kgahlišago wa mehleng ya Beibele.

Modimo o ile a laela setšhaba sa Isiraele gore se tšheletše mantle “ka ntlê xa mešaša.” (Doiteronomio 23:12, 13) Se se ile sa boloka mešaša ya bona e hlwekile gomme sa akgofiša mokgwa wa go bodiša dilo ka tsela ya tlhago. Ka mo go swanago lehono, Bakriste ba therešo ba katanela go lahla ditlakala le ditšhila tše dingwe ka pela le ka mokgwa wa maleba. Re swanetše go ba šedi ka mo go kgethegilego ge re lahla dilo tše di nago le mpholo.

Dilo tše dintši tšeo di lahlwago di ka dirišwa lefsa. Ge e ba lefelong la geno go e na le melao ya go laola go dirišwa lefsa ga dilo tše di lahlwago, gona go kwa melao e bjalo ke karolo ya go nea “Kesara tša Kesara.” (Mateo 22:21) Go dirišwa lefsa ga dilo tše di lahlwago go ka nyaka maiteko a oketšegilego, eupša go bontšha kganyogo ya go nyaka gore lefase e be le le hlwekilego.

Go Seketša Ditšweletšwa tša Lefase

E le gore re kgotsofatše dinyakwa tša rena tša dijo, madulo le dibešeletši gomme re tšwele pele re phela, re swanetše go diriša ditšweletšwa tša tlhago. Tsela yeo re dirišago ditšweletšwa tšeo ka yona e bontšha ge e ba re di lebelela e le dimpho tše di tšwago go Modimo. Ge Baisiraele ba be ba nyaka nama ge ba be ba le lešokeng, Jehofa o ile a ba nea dikhwiri tše dintši. Megabaru e ile ya dira gore ba diriše mpho yeo gampe ka boithati, e lego seo se ilego sa galefiša Jehofa Modimo kudu. (Numeri 11:31-33) Modimo ga se a fetoga ga e sa le go tloga nakong yeo. Ka mo go swanetšego, Bakriste ba nago le boikarabelo ba phema go diriša ditšweletšwa tša tlhago ka bošaedi go sa nyakege, e lego seo se ka bontšhago megabaru.

Ba bangwe ba ka bona eka ba na le tshwanelo ya go diriša mohlagase goba ditšweletšwa tše dingwe tša tlhago ka go se lekanetše. Eupša ga se ra swanela go senya ditšweletšwa tša tlhago feela ka gobane re ka kgona go di lefelela goba di le gona ka bontši. Ka morago ga gore Jesu a fepe lešaba le legolo ka mohlolo, o ile a laela gore go kgoboketšwe dihlapi le dinkgwa tše di šetšego. (Johane 6:12) O be a le šedi gore a se ke a senya seo Tatagwe a bego a ba neile sona.

Go ba ba Leka-lekanego Maitekong a Rena

Letšatši le lengwe le le lengwe re dira dikgetho tšeo di kgomago tikologo. Na re swanetše go dira dilo ka tsela e feteletšego, re ikarole lekokong la batho e le gore re pheme go baka tshenyo tikologong? Ga go na moo Beibele e kgothaletšago tsela e bjalo. Ela hloko mohlala wa Jesu. Ge a be a le mo lefaseng, o be a phela bophelo bjo bo tlwaelegilego e lego seo se ilego sa mo thuša go phetha modiro wo a bego a o neilwe ke Modimo wa boboledi. (Luka 4:43) Ka godimo ga moo, Jesu o ile a gana go diriša dipolitiki e le mokgwa wa go rarolla mathata a batho ba mehleng ya gagwe. O ile a bolela ka mo go kwagalago gore: “Mmušo wa-ka ga se karolo ya lefase le.”—Johane 18:36.

Lega go le bjalo, ke mo go swanetšego gore re nagane kamoo dikgetho tša rena di kgomago tikologo ka gona dilong tše bjalo ka didirišwa tša ka gae tšeo re di rekago, dinamelwa le boitapološo. Ka mohlala, ba bangwe ba kgetha go reka ditšweletšwa tšeo di dirilwego goba tšeo di šomago ka tsela yeo di fokotšago tshenyo tikologong. Ba bangwe ba katanela go fokotša tsela yeo ba tsenyago letsogo ka yona medirong yeo e bakago tšhilafalo goba yeo e dirišago ditšweletšwa tša tlhago go sa nyakege.

Ga go nyakege gore motho a gapeletše batho ba bangwe go amogela diphetho tša gagwe tša mabapi le tikologo. Maemo a batho le a mafelo ga a swane. Lega go le bjalo, yo mongwe le yo mongwe wa rena o dula a ikarabela ka diphetho tša gagwe. Go etša ge Beibele e bolela, “yo mongwe le yo mongwe o tla rwala morwalo wa gagwe.”—Bagalatia 6:5.

Mmopi o neile batho boikarabelo bja go hlokomela lefase. Go leboga ga rena kabelo ye gotee le go hlompha ka boikokobetšo Modimo le tlholo ya gagwe, go swanetše go re tutueletša go dira diphetho tše di naganišišitšwego gabotse tša mabapi le tsela yeo re swarago lefase ka yona.

NA O ILE WA IPOTŠIŠA?

▪ Na Modimo o tla gata mogato wa go lokiša mathata a tikologo?—Kutollo 11:18.

▪ Modimo o neile batho boikarabelo bofe ka lefase?—Genesi 1:28; 2:15.

▪ Jesu Kriste o beile mohlala ofe wa go phema go senya?—Johane 6:12.