Bafsa Ba A Botšiša . . .

Ke ka baka la’ng o swanetše go phela ka ditekanyetšo tša Beibele?

AKANYA o e-ja dijo tša matena ka phapošing ya bojelo sekolong o e-na le banenyana ba babedi. Yo mongwe wa bona o tsepeletše mošemane yo a sa tšwago go fihla sekolong.

Ngwanenyana wa pele o re go wena: “O a tseba, mošemane yo o tloga a go rata e le ka kgonthe. Ke bona se tseleng yeo a go lebelelago ka yona. Mahlo a gagwe a ganeletše go wena!”

Ngwanenyana wa bobedi o go sebela gore: “E re ke go botše, ga a na kgarebe!”

Ngwanenyana wa pele o re: “Ke maswabi gobane ke na le lesogana. Ke be ke tla ratana le yena di tloga fase!”

Ke moka ngwanenyana wa pele o bolela selo seo ka mehla o sa ratego go se kwa.

“Go tla bjang gore o se be le lesogana?”

O be o tseba gore potšišo yeo e tla latela. Therešo ke gore o be o ka rata go ba le lesogana. Eupša o boditšwe gore pele o ka thoma go beana mabaka, e tla ba mo gobotse go leta go fihlela o loketše go tsena lenyalong. Ge e ba e be e se ka lebaka la . . .

Ngwanenyana wa bobedi o re: “Bodumedi bja gago, na ga go bjalo?”

O ipotšiša gore: ‘O tsebile bjang seo ke bego ke se nagana?’

Ngwanenyana wa pele o go kwera ka gore: “Wena o dula o bolela ka Beibele ka mehla. Ke ka baka la’ng o sa ithabiše go se nene ka dinako tše dingwe?”

Na o kile wa ikhwetša o le boemong bjo bo swanago—o kwerwa ka gobane o leka go phela ka ditekanyetšo tša Beibele? O ile wa arabela bjang?

▪ O ile wa emela ditumelo tša gago tša mabapi le boitshwaro ka kgodišego.

▪ O ile wa ikwa o e-na le dihlong eupša wa hlalosa ditumelo tša gago gabotse kamoo o bego o ka kgona.

▪ O ile wa phetha ka gore bagwera ba gago bao o tsenago le bona sekolo ba be ba nepile—gore o fetwa ke dilo!

Na o kile wa ipotšiša gore: ‘Na go phela ka ditekanyetšo tša Beibele go a hola e le ka kgonthe?’ Mofsa yo a bitšwago Deborah o ile a nagana ka seo. * O re: “Dithaka tša-ka di be di dira seo di se ratago. Go be go bonagala eka ga go na yo di ikarabelago go yena. Ditekanyetšo tša Beibele di be di bonala di tletše dithibelo. Tsela ya bophelo ya bagwera ba-ka ba sekolong e be e ipiletša go nna ka ge e be e se na dithibelo.”

Na go Fošagetše go ba le Dipelaelo?

Mongwadi wa Beibele e lego Asafa le yena o bile le nako yeo ka yona a ilego a ipotšiša ge e ba go phela ka tsela yeo e thabišago Modimo e le mo go holago. O ngwadile gore: “Xe ke pelokxolêla baipoti, ke bôna ba babe bà dula bà thabile.” O ile a  ba a bolela gore: “Hleng e ke ké lefêla xe ke seketša pelo ya-ka, xe ke hlapa diatla ka xo ila dibe.”—Psalme 73:3, 13.

Go molaleng gore Jehofa Modimo o a kwešiša gore ka dinako tše dingwe batho ba ka belaela bohlokwa bja go phela ka ditekanyetšo tša gagwe. Go ba gona, o dirile gore dikgopolo tša Asafa di ngwalwe ka Beibeleng. Mafelelong, Asafa o ile a phetha ka gore go phela ka melao ya Modimo ke tsela e kaone kudu ya bophelo. (Psalme 73:28) O fihleletše phetho yeo bjang? Ge e le gabotse, Asafa o be a le bohlale. Ga se a ka a dira phetho ya gagwe ka baka la go tlaišwa ke masetlapelo le ge e le afe a motho ka noši, eupša o e dirile ka gobane a ithutile diphošong tša ba bangwe. (Psalme 73:16-19) Na o kgona go dira se se swanago?

Seo se Diregago e le ka Kgonthe

Ka go se swane le Asafa, Kgoši Dafida o ithutile gabohloko gore bao ba hlokomologago ditekanyetšo tša Modimo ba a gobala. Dafida o dirile bohlotlolo le mosadi wa yo mongwe wa bahlanka ba gagwe gomme a leka go uta ditiro tša gagwe. Ka baka leo, o ile a kweša ba bangwe bohloko, go akaretša le Modimo gomme a tlaišwa ke pelaelo e šoro. (2 Samuele 11:1–12:23) Ka morago ga gore Dafida a itshole, Jehofa o ile a mmudulela gore a hlalose maikwelo a gagwe ka koša gomme a dira gore mantšu ao a bolokwe ka Beibeleng bakeng sa go re hola. (Psalme 51:1-19; Baroma 15:4) Ka gona, ke gabohlale e bile go dumelelana le Mangwalo go ithuta diphošong tša ba bangwe.

E le go go thuša gore o ekiše mohlala wa Asafa le go phema diphošo tša Dafida, ela hloko mantšu ao a boletšwego ke bafsa ba itšego go tšwa dinageng tše di fapa-fapanego bao ka nako e nngwe ba ilego ba hlokomologa ditekanyetšo tša Beibele. Ka mo go kgethegilego, ba ile ba akaretšwa dikopanong tša botona le botshadi tša pele ga lenyalo. Bjalo ka Dafida, ba itsholetše diphošo tša bona gomme ba na le boemo bjo bo hlwekilego gape pele ga Modimo. (Jesaya 1:18; 55:7) Ela hloko seo ba se bolelago.

Phafoga!: Ke dilo dife tšeo di tutueditšego tsela ya lena ya go nagana le ditiro tša lena?

Deborah: “Ge ke be ke tsena sekolo ke be ke bona yo mongwe le yo mongwe a e-na le lesogana goba kgarebe ya gagwe, gomme ba bonala eka ba thabile. Ge ke be ke fetša nako le bona gomme ke bona ba atlana le go gokarelana, ke be ke ba duma gape ke ikwa ke le bodutu. Gantši ke be ke fetša diiri tše dintši ke nagana ka mošemane yo a itšego yo ke bego ke mo rata. Se se ile sa godiša kganyogo ya-ka ya gore ke be le yena le go dira selo le ge e le sefe go kgotsofatša kganyogo yeo.”

Mike: “Ke be ke bala dipuku le go bogela mananeo ao a kgothaletšago dikopano tša botona le botshadi. Go bolela ka dikopano tša botona le botshadi le bagwera ba-ka go ile gwa godiša kgahlego ya-ka. Ke moka, ge ke be ke le noši le ngwanenyana, ke be ke nagana gore re ka swara-swarana ka ntle le go ba le dikopano tša botona le botshadi le gore ke be nka kgona go kgaotša go dira bjalo ka nako le ge e le efe.”

Andrew: “Ke be ke e-na le mokgwa wa go bogela diswantšho tše di kgothaletšago bootswa Inthaneteng. Ke ile ka thoma go nwa bjala kudu. Le gona, ke be ke e-ya meletlong ya bafsa bao ba bego ba sa hlomphe ditekanyetšo tša Beibele tša boitshwaro.”

Tracy: “Ge ke be ke e-na le nywaga e 16, selo sa bohlokwa go nna e be e le go ba le lesogana la-ka. Ke be ke tseba gore go ba le dikopano tša botona le botshadi pele ga lenyalo go fošagetše, eupša ke be ke sa go hloya. Ke be ke sa ikemišetša go ba le dikopano tša botona le botshadi pele ke nyalwa, eupša maikwelo a-ka a ile a mphenya. Ka nako e itšego, letswalo la-ka le be le se sa hlwa le tshwenywa ke maikwelo le ge e le afe a go ikwa ke le molato.”

Phafoga!: Na tsela ya lena ya bophelo e ile ya le tlišetša lethabo?

Deborah: “Mathomong, ke ile ka kwa ke e-na le tokologo e kgolo gape ke be ke thabile ka gore mafelelong ke be ke amogelwa ke dithaka tša-ka. Eupša maikwelo ao ga se a ka a tšea nako e telele. Ke ile ka thoma go ikwa ke šilafetše, ke le molato e bile ke se selo. Ke ile ka itshola kudu ka gobane ke be ke lahlile bokgarebe bja-ka, selo seo le ka mohla nka se kego ka se hwetša gape. Ga e sa le go tloga ka nako yeo, gantši ke be ke ipotšiša gore, ‘Na ke be ke nagana gore se se ka se ntiragalele?’ Le gore ‘Ke ka baka la’ng—ke ka baka la’ng ke ile ka hlokomologa ditekanyetšo tše lerato tša Jehofa?’”

Mike: “Ke ile ka thoma go kwa eka karolo e nngwe ya-ka e hwile. Ke ile ka leka go hlokomologa  mafelelo ao ditiro tša-ka di bego di e-ba le ona go ba bangwe, eupša ke ile ka palelwa. Ke ile ka kwa bohloko ge ke lemoga gore ka go tsoma go ithabiša, ke be ke kweša ba bangwe bohloko. Ke be ke sa kgone go robala. Mafelelong, lethabo leo le bego le tlišwa ke dikopano tša botona le botshadi tše di gobogilego le ile la fela, gomme ka thoma go tlelwa ke maikwelo a bohloko le a manyami.”

Andrew: “Go ile gwa ba bonolo kudu go kgotsofatša dikganyogo tše di fošagetšego. Eupša ka nako e swanago, ke be ke imelwa ke maikwelo a go ba molato gomme ke be ke sa thaba.”

Tracy: “Ga se gwa ntšea nako e telele gore ke phafoge. Boitshwaro bjo bo gobogilego bo be bo sentše bofsa bja-ka. Ke be ke nagana gore nna le lesogana la-ka re tla ipshina. Ga se gwa ba bjalo. Re ile ra feleletša re kwešana bohloko le go tlišetšana manyami. Bošego bjo bongwe le bjo bongwe ke be ke lla ke le malaong, ke duma eka nkabe ke ile ka dira dilo ka tsela ya Jehofa.”

Phafoga!: Ke keletšo efe yeo le ka e neago bafsa bao ba ipotšišago ge e ba ditekanyetšo tša Beibele tša boitshwaro di tletše dithibelo?

Deborah: “Bophelo bja gago bo ka se be kaone ge e ba o lahla ditekanyetšo tša Beibele. Nagana kamoo Jehofa a tlago go ikwa ka gona ge e ba o latela keletšo ya gagwe. Le gona, naganišiša ka ditla-morago tša go hlokomologa keletšo ya gagwe. Gopola gore taba ye ga e mabapi le wena feela le seo o se nyakago. Ditiro tša gago di tla kgoma ba bangwe. Le gona, ge e ba o hlokomologa keletšo ya Modimo, o tla ikgobatša.”

Mike: “Ke therešo gore tsela ya bophelo ya dithaka tša gago e ka bonala e gogela ge e ba o sa e lebeledišiše. Eupša e lebeledišiše gabotse pele o gata mogato. Gare ga dilo tša bohlokwa kudu tšeo Jehofa a go neilego tšona ke seriti le bohlweki. Go lahla dimpho tšeo e le ka baka la gore ga o kgone go itshwara ke go ithekiša ka sente.” Boledišana le batswadi ba gago le batho ba bangwe bao ba godilego ka mathata a gago. Ge e ba o dira phošo, e bolele ka pela gomme o e lokiše. Ge e ba o dira dilo ka tsela ya Jehofa, o tla ba le khutšo ya kgonthe.”

Andrew: “Ge o se na phihlelo, o nagana gore tsela ya bophelo ya dithaka tša gago e a kgahliša. Boemo bja bona bja kgopolo bo tla go tutuetša. Ka gona, kgetha bagwera ka bohlale. Bota Jehofa gomme o tla itšhireletša manyaming.”

Tracy: “O se ke wa ipotša gore, ‘Seo se ka se ntiragalele.’ Mma o ile a dula le nna fase gomme a mpotša ka go lebanya gore ditiro tša-ka di be di tla feleletša ka manyami. Ke ile ka selekega! Ke be ke nagana gore ke bohlale. Ke be ke fošitše. Phela ka ditekanyetšo tša Jehofa gomme o gwerane le ba bangwe bao ba dirago se se swanago. Ka go rialo, o tla thaba.”

Ditekanyetšo tša Beibele —Na di Tletše Dithibelo Goba di a Šireletša?

Ge e ba dithaka tša gago di go kwera ge o leka go phela ka ditekanyetšo tša Beibele, ipotšiše dipotšišo tše: ‘Ke ka baka la’ng ba gana kgopolo ya go phela ka melao ya Beibele ya boitshwaro? Na bona ka bobona ba badile Beibele gomme ba nyakišiša mehola yeo e tlišwago ke go kwa melao ya Modimo? Na ba naganišišitše ka ditla-morago tša go hlokomologa ditekanyetšo tše bjalo? Goba, go e na le moo, na ba fo latela seo motho yo mongwe le yo mongwe a se dirago?’

Mohlomongwe o tseba batho bao ba fo go “latêla bontši.” (Ekisodo 23:2) Na ga o rate go ba yo a fapanego? O ka dira bjalo bjang? Ka go kwa keletšo ya Beibele ya gore ‘o itlhatselele thato e botse le e amogelegago le e phethegilego ya Modimo.’ (Baroma 12:2) Jehofa ke “Modimo yo a thabilego,” gomme o nyaka gore le wena o thabe. (1 Timotheo 1:11; Mmoledi 11:9) Ditekanyetšo tšeo di ngwadilwego ka Beibeleng di bakeng sa go go hola. Ke therešo gore o ka di lebelela e le dithibelo tšeo di lekanyetšago tokologo ya gago. Lega go le bjalo, therešo ke gore melao ya Beibele ya boitshwaro e bjalo ka lepanta la tšhireletšo ka koloing leo le thušago go šireletša monamedi kotsing.

O ka bota Beibele e le ka kgonthe. Ge e ba o kgetha go phela ka ditekanyetšo tša yona, o ka se thabiše Jehofa feela eupša gape o tla ikhola.—Jesaya 48:17.

Dihlogo tše di oketšegilego go tšwa lelokelelong la dihlogo tša “Bafsa ba a Botšiša . . . ” di ka hwetšwa mokerong wa Web wa www.watchtower.org/ype

SEO GO KA NAGANWAGO KA SONA

▪ Ke’ng seo se ka dirago gore o thatafalelwe ke go phela ka ditekanyetšo tša Beibele?

▪ Ke ka baka la’ng o swanetše go itlhatselela gore go phela ka ditekanyetšo tša Modimo ke tsela e kaone kudu ya bophelo?

[Mongwalo wa tlase]