Kotsi Yeo e Tshwenyago Motswadi yo Mongwe le yo Mongwe
Kotsi Yeo e Tshwenyago Motswadi yo Mongwe le yo Mongwe
HEATHER le Scott ke banyalani ba ba phetšego gabotse le ba ba thabilego, batswadi ba mošemane yo bohlale yo a phetšego gabotse wa nywaga e meraro. * Ba hlokomela morwa wa bona gabotse. Lefaseng la lehono, wo ga se mošomo o bonolo. O akaretša go tshwenyega ka dilo tše dintši le boikarabelo bjo bogolo. Go na le dilo tše dintši tšeo bana ba swanetšego go di rutwa! Heather le Scott ba tšea boikarabelo bjo bongwe e le bjo bohlokwa ka mo go kgethegilego: Ba nyaka go šireletša ngwana wa bona dikotsing tša go gobošwa ka tša botona le botshadi. Ka baka la’ng?
Heather o re: “Tate o be a se botho e bile e le setagwa sa go befelwa. O be a mpetha kudu le gona o ile a goboša nna le bana bešo ka tša botona le botshadi.” * Batho ba bantši ba dumela gore go gobošwa ka tsela ye go tlogela mabadi a tseneletšego kudu maikwelong. Ga go makatše ge Heather a ikemišeditše go šireletša morwa wa gagwe! Scott le yena o ikwa ka mo go swanago.
Batswadi ba bantši ba tshwenyegile ka go gobošwa ga bana. Mohlomongwe le wena o tshwenyegile. Go fapana le Scott le Heather, mohlomongwe ga se wa ka wa lebeletšana le go gobošwa le mafelelo a gona, eupša ka ntle le pelaelo o ile wa kwa dipego tše di tšhošago tša mokgwa wo o šišimišago le o aparetšego. Go dikologa lefase, batswadi ba lerato ba tšhošwa ke go kwa ka seo se diragalelago bana tikologong ya bona.
Ga go makatše ge monyakišiši yo mongwe wa kgobošo ya bana ka tša botona le botshadi a e bitša gore ke “kutollo ye e nyamišago kudu mehleng ya rena.” Tšeo ka kgonthe ke ditaba tše di nyamišago, eupša na ditiro tše bjalo di a makatša? E sego go barutwana ba Beibele. Lentšu la Modimo le hlalosa gore re phela nakong ya tlalelo yeo e bitšwago ‘mehla ya bofelo,’ nako ye e swailwego ka boitshwaro bjo “bogale” ge batho e tla ba e le “baithati” gomme e e-ba “ba ba se nago maikwelo a borutho.”—2 Timotheo 3:1-5.
Kgobošo ya tša botona le botshadi ke bothata bjo bo tšhošago. Ka kgonthe, batswadi ba bangwe ba ikwa ba nolega moko ge ba nagana ka bokgopo bja batho ba ba tšwilego lesolo la go nyaka bana e le gore ba ba goboše ka tša botona le botshadi. Lega go le bjalo, na bothata bjo ke bjo bogolo kudu gore batswadi ba ka bo rarolla? Goba na go na le megato e šomago yeo batswadi ba ka e gatago gore ba šireletše bana ba bona? Dihlogo tše di latelago di tla ahla-ahla dipotšišo tše.
[Mengwalo ya tlase]
^ ser. 2 Maina a fetotšwe lelokelelong le la dihlogo.
^ ser. 3 Go gobošwa ga ngwana ka tša botona le botshadi go direga ge motho yo mogolo yo e lego monna goba mosadi a diriša ngwana go kgotsofatša dikganyogo tša gagwe ka noši tša botona le botshadi. Gantši go akaretša seo Beibele e se bitšago bootswa, goba por·neiʹa, yeo e ka akaretšago go phophola ditho tša pelego, kopano ya botona le botshadi le kopano ya botona le botshadi ka go hupa setho sa botona goba ka go se tsenya ka morago. Ditiro tše dingwe tša kgobošo—tše bjalo ka go phophola matswele, ditšhišinyo tše di gobogilego ka mo go feletšego, go bontšha ngwana diswantšho tše di kgothaletšago bootswa, go kgotsofatša kganyogo ya kopano ya botona le botshadi ka go lebelela batho ka sephiring ge ba e-ba le dikopano tša botona le botshadi goba ba apola diaparo le go bonagatša ditho tša mmele mo go sa swanelago di ka ba seo Beibele e se nyatšago e le “boitshwaro bjo bo hlephilego” goba “ditšhila . . . ka megabaru.”—Bagalatia 5:19-21; Baefeso 4:19.