Go se go ye Kae Bosenyi ‘bo tla ba bo se Gona’

“Xo se xokae e mobe ó tlo ba a ile; o tlo bôxa lešope, yêna à se xôna.”—PSALME 37:10.

MMOPI wa rena, Jehofa Modimo, o tloga a kgahlegela tlholo ya gagwe yeo e lego batho; ga a kgole le rena go etša ge batho ba bangwe ba nagana gore go bjalo. (Psalme 11:4, 5) Go feta moo, o bona ditiro ka moka tša bosenyi le go hloka toka, go akaretša le tšeo batho ba sa kgonego go di bona. “A mo xo fêla, mahlô a Morêna; a okametše ba babe le ba boló.” (Diema 15:3) Ka gona, o ka kgonthišega gore ba babe ba “matheleding” e le ka kgonthe.—Psalme 73:12, 18.

Lega go le bjalo, bao ba se nago molato le bao ba itshwerego gabotse ba na le tebelelo e kgahlišago gaešita le ge ba ka ba ba diila e bile ba gatelelwa. Mopsalme Dafida o ngwadile gore: “Šetša yo a hlokago molato gomme o dule o lebeletše moloki, gobane bokamoso bja motho yoo e tla ba bja khutšo.” (Psalme 37:37, NW) Mantšu a e ka ba ao a homotšago ka mo go kgethegilego go rena lehono, ka gobane re na le kholofelo ya go a bona a phethagala lefaseng ka bophara nakong e tlago yeo e lego kgaufsi.

Re Phela Mehleng ya Bofelo

Nywageng e 2 000 e fetilego, barutiwa ba Jesu Kriste ba ile ba mmotšiša potšišo yeo e bego e tla re kgoma le rena lehono. Ba itše: “Re botše, . . . pontšho . . . ya bofelo bja tshepedišo ya dilo e tla ba eng?” (Mateo 24:3) Karabo ya Jesu e ngwadilwe ka botlalo ka Beibeleng go kgaolo 24 ya Mateo, kgaolo 13 ya Mareka le kgaolo 21 ya Luka. Dipego tše tša Diebangedi tšeo di dumelelanago di hlalosa  mehla ya bofelo ya lefase la mehleng yeno e le yeo e swailwego ka dintwa, ditlala, malwetši, ditšhišinyego tše dikgolo tša lefase le go ata ga go hloka molao.

Mehla e thata yeo Jesu a boletšego ka yona e sa le pele e thomile ka 1914. Bjalo ka ge radihistori Eric Hobsbawm a bolela ka pukung ya gagwe ya Age of Extremes, lekgolo la bo-20 la nywaga “e bile ngwaga-kgolo woo ka ntle le pelaelo o tletšego dipolao kudu historing.”

Ge e bolela mabapi le go ata ga bokgopo lehono, Beibele e re: “Ba babe xe ba hloxa wa mabyang, ’me ba-dira-bobe bohle xe ba taxa wa matšoba, sa bôná ké xo y’o lôba ya ba moka.” (Psalme 92:7) Ee, bohlatse bo molaleng: Go ata ga go hloka molao lehono—go swana le go hloga ga dimela ka seruthwane—ge e le gabotse ke pontšho ya gore phedišo ya batho ba kgopo e batametše! Na tše ga se ditaba tše dibotse?—2 Petro 3:7.

“Baloki e ba Beng ba Naxa”

Psalme 37:29 e re: “Baloki e ba beng ba naxa, ba dula mo xo yôna ka mehla le ka mehla.” Mehuta ka moka ya bosenyi le go hloka molao e tla ba e se gona. Ka gona, selo se sengwe le se sengwe seo se sepedišanago le bosenyi se tla ba se se gona: di-alarm, dinotlelo, dikgoro tša tsheko, bo-ramolao, maphodisa le dikgolego. Beibele e holofetša gore: “Tša kxalê di ka se hlwê di tsebywa, le mo pelong ya motho di ka se hlwê di rotoxa.”—Jesaya 65:17.

Ee, lefase le tla fetošwa gotee le moloko wa batho ka tsela yeo e sa kago ya bonwa le ge e le neng pele. (Jesaya 11:9; 2 Petro 3:13) Yeo ke kholofelo ya kgonthe yeo Dihlatse tša Jehofa di nago le yona gomme di go laletša gore o itlhatselele ka noši gore e tla tloga e phethagala kgaufsinyane. Gopola gore Yo a buduletšego Mangwalo a Makgethwa ‘a ka se aketše.’—Tito 1:2.

[Lepokisi/Seswantšho go letlakala 17]

THUŠO YA MOYA BAKENG SA BAGOLEGWA

Go theoša le nywaga, Dihlatse tša Jehofa kua United States di amogetše mangwalo a tšwago go bagolegwa bao ba lego dikgolegong tše 4 169, dipetleleng le mafelong a go thuša batho go tlogela dihlare-tagi. Bagolegwa ba bangwe ba kgopela dikgatišo tšeo di theilwego Beibeleng; ba bangwe ba kgopela go swarelwa thuto e sa lefelelwego ya Beibele. Dihlatse tše di swanelegago di ikgokaganya le batho bao ba dirago dikgopelo tše. Ge e le gabotse, lefaseng ka bophara, Dihlatse di etela dikgolego e le gore di ithute Beibele le bagolegwa, ba banna le ba basadi, bao ba tsomago thušo ya moya. Bontši bja bagolegwa ba ba dirile diphetogo tše di makatšago semelong sa bona, ba kolobeditšwe bjalo ka Bakriste e bile ba phela ka go dumelelana le molao.