Ke Mang yo a Swanetšego go Dira Phetho ya Gore Bodumedi bja Therešo ke Bofe?

JESU o bontšhitše gabotse gore mehuta e mengwe ya bodumedi ga e amogelege go Modimo. O boletše ka “baporofeta ba maaka” bao a ilego a ba bapiša le sehlare seo se enywago dienywa tše di hlokago mohola seo ‘se rengwago gomme sa lahlelwa mollong.’ Le gona o itše: “Ga se yo mongwe le yo mongwe yo a rego go nna, ‘Morena, Morena,’ a tlago go tsena mmušong wa magodimo.”—Mateo 7:15-22.

Ge e le gabotse, Jesu o boletše mabapi le bao ba bego ba tla ipolela gore ba a mo latela gore: “Ke tla ba botša ka re: Ga se ka ka ka le tseba! Tlogang go nna lena badiri ba go hloka molao.” (Mateo 7:23) Go oketša moo, ge a bolela le baetapele ba bodumedi ba mehleng ya gagwe, Jesu o dirišitše go bona mantšu ao a boletšwego ke Modimo ge a be a botša setšhaba sa bahlanogi sa Isiraele gore: “Ke ga lefeela ge ba tšwela pele ba nthapela, gobane ba ruta ditaelo tša batho e le dithuta-tumelo.”—Mareka 7:6, 7.

Go molaleng gore ga se mehuta ka moka ya borapedi yeo e amogelwago ke Modimo goba Morwa wa gagwe. Ka gona, ga se mehuta ka moka ya borapedi yeo e lego ya therešo. Na se se bolela gore ke bodumedi bjo tee feela bjo bo rutago therešo? Na go ka direga gore Modimo o diriša madumedi a itšego mola a gana a mangwe? Goba na Modimo a ka ba a amogela goba a gana borapedi bja batho bao ba gašanego madumeding a mantši go sa šetšwe seo mekgatlo ya bona e se rutago?

Moapostola Paulo o buduletšwe ke Modimo go ngwala gore: “Bjale ke a le kgothatša, bana bešo, ka leina la Morena wa rena Jesu Kriste gore ka moka le bolele ka go dumelelana, le gore go se be le dikarogano gare ga lena, eupša gore le be batee ka mo go swanetšego monaganong o swanago le tseleng e swanago ya go nagana.” (1 Bakorinthe 1:10) Le gona, Beibele e kgothaletša Bakriste gore e be ‘ba monagano o swanago gomme ba be le lerato le le swanago, ba kopane gotee moyeng, e be ba kgopolo e tee monaganong.’—Bafilipi 2:2.

Ge e le gabotse, moo botee bjo bjalo bo lego gona, mafelelo e ba  bodumedi bjo tee. Ke ka lebaka leo Beibele e rego go na le “Morena o tee, tumelo e tee, kolobetšo e tee.”—Baefeso 4:4, 5.

Seo Pego ya Beibele e se Bontšhago

Taba ya gore phetho e lego ka mo godimo e thekgwa ka mo go feletšego ke Mangwalo e bonala pegong ya Beibele. Ka go nyakišiša pegong ye, o tla hwetša gore Modimo o be a dirišana le batho ba gagwe ka mohuta o tee wa borapedi. Mathomong a histori ya moloko wa batho, Modimo o dirišitše bapatriareka, goba dihlogo tša malapa, e le baemedi ba gagwe. Bapatriareka ba tsebegago kudu e be e le Noa, Aborama (Aborahama), Isaka le Jakobo.—Genesi 8:18-20; 12:1-3; 26:1-4; 28:10-15.

Ditlogolwana tša Jakobo di ile tša dirwa makgoba kua Egipita. Ge di le moo, di ile tša gatelelwa o šoro eupša tša oketšega go fihlela palo ya tšona e balwa ka dimilione. Modimo o ile a di lokolla bokgobeng gomme a di tshediša Lewatle le Lehwibidu ka mohlolo. Ke moka, o ile a di tšea ya ba batho ba gagwe gomme a di nea melao a diriša mmoelanyi e lego Moše. Di ile tša fetoga setšhaba sa bogologolo sa Isiraele, setšhaba sa Modimo.—Ekisodo 14:21-28; 19:1-6; 20:1-17.

Taba ya bohlokwa kudu ke ya gore Modimo ga se a ka a amogela mehuta ya borapedi bja batho ditšhabeng tšeo di bego di dikologile Baisiraele. Ge e le gabotse, o ile a otla batho ba gagwe ge ba be ba hlanogela melao ya gagwe gomme ba amogela mehuta e bjalo ya borapedi.—Lefitiko 18:21-30; Doiteronomio 18:9-12.

Go thwe’ng ka batho bao ba tšwago ditšhabeng tše dingwe bao ba bego ba nyaka go rapela Modimo wa therešo? Sa pele, ba be ba swanetše go tlogela borapedi bja bona bja pele bja maaka ke moka ba rapele Jehofa Modimo ba e-na le Baisiraele. Bontši bja bona bo ile bja amogelwa ke Modimo gomme ya ba bahlanka ba gagwe ba botegago. Bahlanka ba ba akaretša basadi ba bjalo ka Rahaba wa Mokanana le Ruthe wa Momoaba; banna ba bjalo ka Uria wa Mohethe le Ebede-Meleke wa Moethiopia le dihlopha tša batho tše bjalo ka Bagibeone. Kgoši Salomo wa Isiraele o ile a dira thapelo e tšwago pelong legatong la bohle bao ka go swana le batho ba ba boletšwego ka mo godimo, ba lego borapeding bja therešo le batho ba Modimo. *—2 Koronika 6:32, 33.

Ka Morago ga ge Jesu a Tlile Lefaseng

Ka morago ga ge Jesu a rometšwe lefaseng, go ile gwa thewa borapedi bja therešo motheong wa dithuto tša gagwe gomme merero ya Modimo e ile ya hlaloswa ka tsela e makatšago. Ge nako e dutše e e-ya, barapedi ba therešo ba ile ba bitšwa “Bakriste.” (Ditiro 11:26) Ka gona, Bajuda bao ba bego ba nyaka go amogelwa ke Modimo ba be ba swanetše go tlogela borapedi bja bjona bja pele. Go be go se na gore ba ka kgetha magareng ga mehuta e mebedi ya borapedi goba gore yo mongwe le yo mongwe a ka ithapelela Modimo ka tsela ya gagwe. Go etša ge re bone ka Lentšung la Modimo, barapedi ba therešo ba be ba kopantšwe ‘tumelong e tee.’—Baefeso 4:4, 5.

Lehono ba bangwe ba ka bona eka kgopolo ya gore Modimo o dirišana le batho ka bodumedi bjo tee feela ke e feteletšego le yeo go lego thata go e amogela. Lega go le bjalo, ye ke phetho yeo Beibele e re lebišago go yona. Nakong e fetilego, batho ba bantši bao ba bego ba ithapelela Modimo ka tsela ya bona ba ile ba kwešiša taba ye gomme ba phela ka go dumelelana le yona. Ba ile ba rapela Jehofa ba le gotee le barapedi ba gagwe ba therešo gomme dipelaelo le ge e le dife tšeo ba bego ba e-na le tšona mathomong di ile tša tšeelwa legato ke ditšhegofatšo tše dintši le lethabo. Ka mohlala, Beibele e re ka morago ga ge monna yo mongwe wa Ethiopia a amogetše Bokriste gomme a kolobeditšwe, ‘o ile a sepela a thabile.’—Ditiro 8:39.

Motho le ge e le ofe lehono yo a amogelago bodumedi bja therešo gomme a phela ka go dumelelana le bjona o tla hwetša ditšhegofatšo tše di swanago. Eupša o ka tseba bjang bodumedi bja therešo ka ge go e-na le madumedi a mantši gakaakaa?

[Mongwalo wa tlase]

[Seswantšho go letlakala 27]

Go tla direga’ng ka bodumedi bjo bo enywago dienywa tše di se nago mohola?