Pono Ya Beibele

Ke’ng Seo ge e le Gabotse Bohlogo bo se Bolelago Lenyalong?

DINAGENG tše dintši ditirelo tša manyalo ka tlwaelo di akaretša go dira dikeno tšeo go tšona basadi ba holofetšago banna ba bona gore ba tla ba kwa. Lega go le bjalo, basadi ba bantši ba galefišwa ke taba ya gore banna ke dihlogo lenyalong. Ela hloko seo Beibele e se rutago ka taba ye. O tla hwetša gore thuto ya yona ke e leka-lekanego le e šomago.

Bohlogo ka ge bo Hlalositšwe ke Modimo

Tlhaloso ya motheo ya Beibele ya bohlogo e hwetšwa go Baefeso 5:22-24 yeo e rego: “Basadi ba ikokobeletše banna ba bona go etša ge ba ikokobeletša Morena, gobane monna ke hlogo ya mosadi  wa gagwe go etša ge Kriste le yena e le hlogo ya phuthego . . . Ge e le gabotse, go etša ge phuthego e ikokobeletša Kriste, basadi le bona ba ikokobeletše banna ba bona dilong tšohle.” Ka ge e le “hlogo ya mosadi wa gagwe,” monna o swanetše go etelela pele ka lapeng, mosadi a latele boetapele bja gagwe gomme a hlomphe bohlogo bja gagwe.—Baefeso 5:33.

Matla a monna a bolaodi a lekanyetšwa ke go ikokobeletša ga gagwe Modimo le Kriste. Ga se a newa matla a go laela mosadi wa gagwe gore a tshele melao ya Modimo goba a imetše letswalo la gagwe leo le tlwaeditšwego ka Beibele. Lega go le bjalo, Modimo o mo neile boikarabelo bja go dira diphetho tše bohlokwa bakeng sa lapa la gagwe gare ga mellwane yeo a mmeetšego yona.—Baroma 7:2; 1 Bakorinthe 11:3.

Beibele e laela monna gore a diriše bohlogo bja gagwe ka go hloka boithati, a naganele mosadi wa gagwe a se ke a inaganela a nnoši. Baefeso 5:25 e re: “Banna, tšwelang pele le rata basadi ba lena go etša ge Kriste le yena a ratile phuthego gomme a ikgafela yona.” Monna yo a latelago mohlala o phagamego wa Kriste wa lerato a ka se ke a diriša bohlogo ka boithati.

Go oketša moo, Beibele e laela monna gore a dule le mosadi wa gagwe “go ya ka tsebo.” (1 Petro 3:7) Se se akaretša se se fetago go fo tseba go se swane mo go lego gona mmeleng le maikwelong magareng ga banna le basadi. O swanetše go kwešiša dinyakwa tša mosadi wa gagwe.

“Ke Molekane wa Gago”

Na go ikokobetša ga mosadi go bolela gore ga se a swanela go tšweletša pono ya gagwe? Nagana ka Sara, yo go bolelwago ka yena ka Beibeleng e le mohlala wa go kwa monna wa gagwe, Aborahama. (1 Petro 3:5, 6) O ile a ikokobeletša yena ditabeng tše dikgolo le tše dinyenyane tše bjalo ka go tlogela legae la gagwe le lebotse go yo dula ditenteng le go apea dijo go sa letelwa. (Genesi 12:5-9; 18:6) Lega go le bjalo, mabapi le taba ya bohlokwa, o ile a tšweletša pono ya gagwe yeo e bego e fapane le ya Aborahama. Se se diregile ge a be a nyaka gore Aborahama a leleke mosadi wa gagwe wa serethe e lego Hagara le morwa wa Aborahama wa leitšibolo e lego Išimaele legaeng la gagwe. Go e na le go kgalema Sara, Modimo o ile a botša Aborahama gore: “O kwe lentšu la gagwe.” Ka nako e swanago, Sara o ile a tšwela pele go ikokobeletša Aborahama ka go mo letela gore a tšee kgato go e na le gore a leleke Hagara le Išimaele ka boyena.—Genesi 21:8-14, PK.

Mohlala wa Sara o bontšha gore go e na le go se tšee karolo ditabeng tša lapa, mosadi o swanetše go ba “molekane” wa monna, a be le boemo bjo bo hlomphegago. (Maleaki 2:14, NW) Bjalo ka molekane wa monna wa gagwe, o nea ditšhišinyo tša bohlokwa mabapi le diphetho tša lapa gomme o newa matla a lekanyeditšwego a taolo ka lapeng, gantši o laola mediro ya ka gae gaešita le ditaba tše itšego tša tša ditšhelete. Ke therešo gore bjalo ka hlogo ya lapa, mafelelong monna ke yena a ikarabelago ka go dira diphetho.—Diema 31:10-31; 1 Timotheo 5:14.

Go Hlompha Mothomi wa Lenyalo

Jehofa Modimo o bopile monna le mosadi gomme a thea lenyalo e le tlemo e kgethwa magareng ga bona. (Genesi 2:18-24) Le gona o ile a hlalosa karolo ya monna le mosadi yeo e bego e tla ba tlišetša lethabo le legolo.—Doiteronomio 24:5; Diema 5:18.

Bjalo ka Mothei wa lenyalo, Jehofa o na le tshwanelo le matla a go bea ditekanyetšo tša tokišetšo ya lenyalo. Balekane ba lenyalo bao ba phethagatšago dikarolo tša bona gomme ba latela tokišetšo ya Modimo ya bohlogo, e sego feela ka gobane e šoma eupša ka baka la go hlompha matla a Modimo a taolo, ba hwetša kamogelo ya gagwe le thekgo.

NA O ILE WA IPOTŠIŠA?

▪ Ke mang yo a beilego mohlala o phethagetšego wa bohlogo?—Baefeso 5:25.

▪ Na Modimo o lekanyeditše matla a monna a taolo?—1 Bakorinthe 11:3.

▪ Morero wa lenyalo le tokišetšo ya bohlogo ke ofe?—Diema 5:18.

[Seswantšho go letlakala 18]

Bohlogo bjoo bo dirišwago go latela mohlala wa Kriste bo tliša lethabo le kgotsofalo go balekane ka bobedi