Modimo le Kriste ba Lebelela Basadi Bjang?

RE KA ba bjang le kwešišo e feletšego ya kamoo Jehofa Modimo a lebelelago basadi ka gona? Tsela e nngwe ke ka go hlahloba boemo bja kgopolo le boitshwaro bja Jesu Kriste, yo e lego “seswantšho sa Modimo yo a sa bonagalego” le yoo a bonagatšago pono ya Modimo ka ditaba ka mo go feletšego. (Bakolose 1:15) Tsela yeo Jesu a ilego a dirišana le basadi ba mehleng ya gagwe ka yona e bontšha gore Jehofa le Jesu ba hlompha basadi le gore ba tloga ba sa amogele kgatelelo ya basadi yeo e tletšego dinageng tše dintši lehono.

Ka mohlala, ela hloko tiragalo yeo go yona Jesu a ilego a boledišana le mosadi sedibeng. Pego ya Ebangedi ya Johane e re: “Mosadi wa Samaria a tla go ga meetse,” gomme “Jesu a re go yena: ‘Mphe meetse ke nwe.’” Jesu o be a ikemišeditše go bolela le mosadi wa Mosamaria phatlalatša gaešita le ge Bajuda ba bantši ba be ba sa dirišane le Basamaria. Go ya ka The International Standard Bible Encyclopedia, go Bajuda, “go boledišana le mosadi lefelong la batho bohle e be e le mo go kgopišago ka mo go kgethegilego.” Lega go le bjalo, Jesu o ile a swara basadi ka tlhompho le go ba naganela, le gona o be a sa kgetholle batho go ya ka morafo goba bong. Go e na le moo, o itsebišitše ka lekga la mathomo e le Mesia ge a be a bolela le mosadi wa Mosamaria.—Johane 4:7-9, 25, 26.

Tiragalong e nngwe, Jesu o ile a batamelwa ke mosadi yo a bego a swerwe ke bolwetši bjo bo lešago dihlong le bjo šoro bja ngope ka nywaga e 12. Gatee-tee ge mosadi a kgwatha Jesu, o ile a fola. “Jesu a retologa, gomme ge a mmona, a re: ‘Tia matla, morwedi wa-ka; tumelo ya gago e go fodišitše.’” (Mateo 9:22) Go ya ka Molao wa Moše, mosadi yo a lego boemong bjo bo swanago le bja gagwe o be a se a swanela go ba gare ga batho, re se sa bolela ka go kgwatha batho ba  bangwe. Lega go le bjalo, Jesu ga se a ka a mo omanya. Go e na le moo, o ile a mo homotša ka kwelobohloko gomme a mmitša ka gore “morwedi wa-ka.” Mantšu ao a swanetše go ba a ile a mo imolla gakaakang! Le gona Jesu o swanetše go ba a ile a thaba gakaakang ge a mo fodišitše!

Ka morago ga ge Jesu a tsošitšwe bahung, o ile a iponagatša la mathomo go Maria Magdalena le yo mongwe wa barutiwa ba gagwe, yoo Beibele e mmitšago “Maria yola yo mongwe.” Jesu a ka ba a ile a iponagatša go Petro, Johane goba yo mongwe wa barutiwa ba gagwe ba banna. Go e na le moo, o ile a bontšha basadi seriti ka go ba dumelela gore e be dihlatse tša pele tšeo di bonego tsogo ya gagwe ka mahlo. Morongwa o ile a ba laela gore ba botše barutiwa ba Jesu ba banna ka tiragalo ye e makatšago. Jesu o boditše basadi bao gore: “E-yang le begele bana bešo.” (Mateo 28:1, 5-10) Ruri Jesu o be a se a tutuetšwa ke kgethollo yeo e bego e tlwaelegile go Bajuda ba mehleng ya gagwe, yeo go ya ka yona basadi ba bego ba ka se nee bohlatse kgorong ya tsheko.

Ka gona, go e na le go kgetholla basadi goba go dumelela banna gore ba ikwe eka ba ba phagametše ka tsela le ge e le efe, Jesu o bontšhitše gore o hlompha basadi le go ba tšea e le ba bohlokwa. Bošoro bjo bo bego bo dirwa go basadi bo be bo fapane ka mo go feletšego le thuto ya Jesu le boemo bja gagwe bja kgopolo, gomme re ka kgodišega gore o be a bonagatša ka mo go phethagetšego tsela yeo Tatagwe, Jehofa, a bonago dilo ka yona.

Basadi ka Tlase ga Tlhokomelo ya Modimo

Ga go lefelo le ge e le lefe kgaufsi le Mediterranean ya kgale goba ka Bohlabela bja Kgaufsi moo basadi ba bego ba neilwe tokologo yeo ba nago le yona lekokong la mehleng yeno la ka Bodikela. Mokgwa wa kakaretšo e be e le wa go ba ga basadi ka tlase ga banna, go fo swana le ge makgoba a be a le ka tlase ga ba ba lokologilego gomme ba banyenyane ba le ka tlase ga ba bagolo. . . . Bana ba bašemane ba be ba swarwa e le ba bohlokwa kudu go feta ba banenyana gomme bana ba banenyana ka dinako tše dingwe ba be ba tlogelwa gore ba hwe ka baka la go se šireletšege boemong bjo šoro bja leratadima. Ke kamoo pukuntšu e nngwe ya Beibele e hlalosago tsela e tlwaelegilego yeo basadi ba bego ba lebelelwa ka yona mehleng ya bogologolo.  Mabakeng a mantši, ba be ba swarwa ka tsela e nyakilego e swana le yeo makgoba a swarwago ka yona.

Beibele e ngwadilwe mehleng ya ge metlwae ya batho e be e bonagatša boemo bjo bja kgopolo. Lega go le bjalo, Molao wa Modimo wo o ngwadilwego ka Beibeleng o be o hlompha basadi kudu, e lego seo se bego se fapane kudu le boemo bja kgopolo bja batho ba bantši ditšong tša bogologolo.

Go tshwenyega ga Jehofa ka tšhireletšego ya basadi go bonagala mabakeng a mmalwa ao go ona a ilego a thuša barapedi ba gagwe ba basadi. O ile a tsena ditaba gare ka makga a mabedi e le gore a šireletše mosadi yo mobotse wa Aborahama e lego Sara, gore a se ke a katwa. (Genesi 12:14-20; 20:1-7) Modimo o ile a gaugela mosadi yo Jakobo a bego a sa mo rate kudu e lego Lea ka go “mo nea bana,” gomme a belega morwa. (Genesi 29:31, 32) Ge babelegiši ba babedi ba Baisiraele bao ba bego ba boifa Modimo ba be ba bea maphelo a bona kotsing ka go šireletša bana ba bašemane ba Baheberu gore ba se ke ba bolawa kua Egipita, Jehofa o ile a ba leboga ka go ‘ba agiša malapeng a bona.’ (Ekisodo 1:17, 20, 21) Le gona, o ile a araba thapelo ya Hanna e tšwago pelong. (1 Samuele 1:10, 20) Le gona, ge mohlologadi yoo monna wa gagwe e bego e le moporofeta a be a lebeletšane le moadimiši wa tšhelete yo a bego a tla tloga a tšea bana ba gagwe gore a ba dire makgoba e le go lefelela sekoloto sa gagwe, Jehofa ga se a ka a mo lahla. Ka lerato Modimo o ile a nea moporofeta Elisa matla a go oketša makhura a mohlologadi yoo e le gore a ka lefelela sekoloto sa gagwe gomme a šale ka a lekanego bakeng sa lapa la gagwe. Ka go realo, o ile a šireletša lapa la gagwe le go boloka seriti sa gagwe.—Ekisodo 22:22, 23; 2 Dikxoši 4:1-7.

Baporofeta ba ile ba kgalemela leboelela go gobošwa ga basadi goba go swarwa ga bona ka bošoro. Moporofeta Jeremia o ile a botša Baisiraele ka leina la Jehofa gore: “Ahlolang ka molaô le ka tokô; Le namolêlê mohlaki xe a pateletšwa. Lesang xo hlakiša wa lethokô le sešuana le basadi ba bahloloxadi. Le se kê la ba dira ka thata; xomme felô fá Le se kê la thšolla madi a a se naxo molato.” (Jeremia 22:2, 3) Ka morago, bahumi le bao ba bego ba e-na le matla a taolo kua Isiraele ba ile ba kgalemelwa ka gobane ba be ba rakile basadi malapeng a bona le go swara bana ba basadi bao gampe. (Mika 2:9) Modimo wa toka o nyatša go tlaišwa mo go bjalo ga basadi le bana ba bona gomme o go lebelela e le bokgopo.

“Mosadi wa Sethakxa”

Mongwadi wa bogologolo wa puku ya Diema o re nea pono e swanetšego ya mosadi wa sethakga. Ka ge tlhaloso ye e botse ya karolo yeo mosadi yo a e kgathago le boemo bja gagwe e ngwadilwe ka Lentšung la Jehofa, re ka kgodišega gore o a e amogela. Go e na le go gatelelwa goba go lebelelwa e le wa tlasana, mosadi yo bjalo o tšeelwa godimo, o a hlompšha e bile o a botwa.

“Mosadi wa sethakxa” yo go bolelwago ka yena go Diema kgaolo 31, ke mošomi yo mafolofolo le yo a šomago ka thata. “Ó dira ka diatla tša serótô” gomme o a rekiša gaešita le go rekiša mašemo. O bona tšhemo gomme o a e reka. O roka diaparo tša ka gare le go di rekiša. O nea bagwebi mašela. O matla e bile o šoma ka thata medirong ya gagwe. Go feta moo, mantšu a gagwe a bohlale le botho bja gagwe bjo lerato di tšeelwa godimo kudu. Ka baka leo, o hlompšha kudu ke monna wa gagwe, bana ba gagwe gomme sa bohlokwa le go feta o hlompšha ke Jehofa.

Basadi ga se ya swanela go ba bahlaselwa bao ba gatelelwago ke banna bao ba ikholago ka bona, bao ba ba swarago gampe goba bao ba ba gobošago ka tsela le ge e le efe. Go e na le moo,  mosadi yo a nyetšwego o swanetše go thaba le go ba “modiriši” yo a nago le bokgoni wa monna wa gagwe.

Ba Neeng Kgodišo

Ge a ngwalela banna ba Bakriste mabapi le kamoo ba swanetšego go swara basadi ba bona ka gona, mongwadi yo a buduletšwego e lego Petro o kgothaleditše banna go ekiša boemo bja kgopolo bja Jehofa le Jesu Kriste. O ngwadile gore: “Lena banna, tšwelang pele le . . . ba nea kgodišo.” (1 Petro 3:7) Go nea motho kgodišo go bolela gore motho o tšeela motho yo bjalo godimo e bile o mo hlompha kudu. Ka gona, monna yo a hlomphago mosadi wa gagwe ga a mo nyenyefatše le go mo tšeela fase goba go mo swara gampe. Go e na le moo, o bontšha ka mantšu le ditiro tša gagwe—ge ba le gare ga batho le ge ba le babedi feela—gore o a mo hlompha e bile o a mo rata.

Go hlompha mosadi go tliša lethabo e le ka kgonthe lenyalong. Ela hloko mohlala wa Carlos le Cecilia. Ka morago ga nako e itšego ba nyalane, gantši ba ile ba ikhwetša ba ngangišana gomme le ka mohla ba sa fihlelele phetho. Ka dinako tše dingwe ba ile ba kgaotša go boledišana. Ba be ba sa tsebe gore ba rarolle mathata a bona bjang. Monna o be a le bogale gomme mosadi a sa kgotsofale e bile a ikgantšha. Lega go le bjalo, ge ba thoma go ithuta Beibele gomme ba diriša seo ba ithutilego sona, dilo di ile tša thoma go kaonefala. Cecilia o re: “Ke a bona gore dithuto tša Jesu le mohlala woo a o beilego di fetotše semelo sa-ka le sa monna wa-ka. Ka baka la mohlala wa Jesu, ke ikokobeditše kutšwanyana e bile ke a kwešiša. Ke ithutile go tsoma thušo ya Jehofa ka thapelo go etša ge Jesu a dirile. Carlos o ithutile go ba le kgotlelelo kutšwanyana le go ba le boitshwaro—go hlompha mosadi wa gagwe go etša ge Jehofa a nyaka gore go be bjalo.”

Lenyalo la bona ga se la phethagala, eupša ba šetše ba e-na le nako e telele ba nyalane. Nywageng ya morago bjale ba ile ba swanelwa ke go lebeletšana le mathata a magolo—Carlos o ile a lahlegelwa ke mošomo gomme a swanelwa ke go buiwa ka baka la kankere. Lega go le bjalo, maemo a a gateletšago ga se a fokodiša tlemo ya lenyalo la bona, le tiile go feta le ge e le neng pele.

Ga e sa le go tloga ge batho ba lahlegelwa ke phethego, ditšong tše dintši basadi ba ile ba swarwa ka tsela e se nago tlhompho. Ba ile ba gobošwa mmeleng, monaganong le ka thobalano. Eupša yeo ga se tsela yeo Jehofa a bego a rerile gore ba swarwe ka yona. Pego ya Beibele e bontšha ka mo go kwagalago gore go sa šetšwe gore setšo sa batho ke sefe, basadi ka moka ba swanetše go swarwa ka seriti le tlhompho. Ke tshwanelo yeo ba e neilwego ke Modimo.

[Seswantšho go letlakala 4, 5]

Mosadi wa Mosamaria

[Seswantšho go letlakala 4, 5]

Mosadi yo a babjago

[Seswantšho go letlakala 4, 5]

Maria Magdalena

[Seswantšho go letlakala 6]

Jehofa o ile a šireletša Sara gabedi

[Seswantšho go letlakala 7]

Lenyalo la Carlos le Cecilia le be le le kotsing

[Seswantšho go letlakala 7]

Carlos le Cecilia lehono