Bokamoso bjo bo Šireletšegilego ka Tlase ga Pušo ya Modimo
Bokamoso bjo bo Šireletšegilego ka Tlase ga Pušo ya Modimo
KGAUFSINYANE dipelaelo tša rena ka bokamoso di tla fela, ka gobane Modimo o tla thoma go laola Lefase ka go hloma mmušo wa gagwe, wo o bitšwago Mmušo wa Modimo. Jesu Kriste o be a naganne ka tebelelo yeo e kgahlišago ge a be a ruta balatedi ba gagwe go rapela ka gore: “Mmušo wa gago a o tle. Thato ya gago a e direge le mo lefaseng bjalo ka ge e direga legodimong.”—Mateo 6:9, 10.
Mmušo wa Modimo o ka se dirišane le baetapele ba dipolitiki ba batho goba wa ba diriša. Go e na le moo, o tla fediša mašaledi le ge e le afe a go ipuša ga batho bjalo ka ge go bontšhitšwe boporofeteng bjo bo latelago bja Daniele bja mabapi le ‘mehla ya bofelo,’ e lego nako yeo re phelago go yona. (2 Timotheo 3:1) “Mehleng ya dikxoši tšeo, ké mo Modimo a tl’o xo tsoša mmušô wo o ka se kexo wa šwalalanywa neng le neng, . . . O tlo phšatla mebušô e mengwê ka moka [ya batho] wa e fediša; xe e le wôna, o tlo êma xo ya xo ile.” (Daniele 2:44) Mantšu ao ga a nee batho bao ba ratago go bušwa ke batho khomotšo goba kholofelo, eupša go bohle bao ba ratago bogoši bja Modimo bjoo bo bonagatšwago ka Mmušo wa gagwe a tliša kholofelo e kgahlišago.
Bokamoso bjo bo Kgahlišago!
Ge Mmušo wa Modimo o buša lefase ka moka, balata ba ona ba ka se arolwe ke dipolitiki, morafe, bodumedi goba mellwane e lego mmapeng. Go e na le moo, ba tla bopa borwarre bja lefase ka bophara bjo bo kopantšwego ke therešo ya mabapi le Modimo le lerato la kgonthe. (Johane 13:34, 35; 17:3, 17) Ee, ka tlase ga pušo ya Mmušo, “e a lokilego o tlo paleša” gomme “khutšo e tlo ba e kgolo go fihla ge kgwedi e sa hlwe e le gona.”—Psalme 72:7, PK.
Ka ntle le dilo tše, Mmušo wa Modimo o tla thuša batho ba ikokobeditšego gore e be ba phethagetšego monaganong le mmeleng gomme o fediše malwetši ka moka, tlaišego le lehu. (Kutollo 21:3, 4) Ka mafelelo afe? Polanete ya rena e tla ba paradeise ka mo go feletšego, ka go realo gwa phethagala morero wa Modimo wa mathomong bjalo ka ge o boletšwe tšhemong ya Edene.—Genesi 1:28.
Ditaba Tšeo ka Kgonthe e Lego Tšona Feela tše Dibotse
Ge a be a bolela ka pontšho e akaretšago dilo tše dintši ya “bofelo bja tshepedišo ya dilo,” Jesu o akareditše le selo se sengwe sa bohlokwa. (Mateo 24:3-7) O itše: “Ditaba tše tše dibotse tša mmušo di tla bolelwa lefaseng ka moka le go agilwego go lona gore e be bohlatse go ditšhaba tšohle; ke moka bofelo bo tla tla.”—Mateo 24:14.
Ka go dumelelana le thato ya Modimo, ka 2007 Dihlatse tša Jehofa tše e nyakilego go ba tše dimilione tše šupa dinageng tše 236 di tšere karolo go boleleng le baagišani ba tšona ka molaetša wa Mmušo, di gafa diiri tša tšona tša ka godimo ga dimilione tše dikete tše 1,4 ka lethabo. Ke ka baka la’ng Dihlatse di kgodišegile gakaakaa ka dikholofetšo tšeo di huperwego ka Beibeleng? Karabo e bonolo kudu. Bjalo ka ge sehlogo se se latelago se hlalosa, Modimo ka mehla o phethagatša seo a se boletšego.—Baroma 3:4.
[Ntlhakgolo go letlakala 16]
Beibele e re “khutšo e tlo ba e kgolo”