“Go Diragetše’ng ka Ngwan’a-ka?”

Scott le Sandra * ba ile ba tšhoga kudu ge morwedi wa bona wa nywaga e 15 a be a tsena ka phapošing ya bodulo. Moriri wa gagwe, woo pele e bego e le wa mmala o blond, ga bjale e be e le o mohwibidu! Seo se ilego sa gakantšha le go feta ke poledišano yeo e ilego ya latela ka morago.

“O dumeletšwe ke mang go taya moriri wa gago?”

“Ga se la ka la mpotša gore ke se ke ka o taya.”

“Ke ka baka la’ng o sa ka wa re kgopela go o taya?”

“Ka gobane ke tsebile gore le tla gana!”

GO ETŠA ge Scott le Sandra ba ka hlatsela, nywaga ya mahlalagadi ke nako ya mathata—e sego go bafsa feela eupša le go batswadi ba bona. Ke therešo gore bo-tate le bo-mma ba bantši ba tloga ba sa itokišetša ka mo go feletšego bakeng sa diphetogo tše dikgolo tšeo di diregago ge bana ba bona ba tsena lebakeng la go khukhuša. Mma yo mongwe wa kua Canada e lego Barbara o gopola gore: “Morwedi wa rena o ile a fetoga ntle le go re lemoša. Ke ile ka ipotšiša gore, ‘Go diragetše’ng ka ngwan’a-ka?’ Go be go le bjalo ka ge eka o tšerwe re robetše gomme legatong la gagwe gwa tlišwa yo mongwe!”

Seo se diragaletšego Barbara ga se sa moswana-noši le gatee. Ela hloko seo batswadi ba bangwe go dikologa lefase ba se boditšego Phafoga!

“Ge morwa wa-ka a tsena nywageng ya mahlalagadi, gatee-tee o ile a thoma go kgodišega ka dikgopolo tša gagwe le go belaela matla a rena a taolo.”—Lia, kua Brithania.

“Barwedi ba rena ba ile ba thoma go tshwenyega kudu ka seo ba bangwe ba se naganago ka bona, kudu-kudu ka ponagalo ya bona.”—John, kua Ghana.

“Morwa wa-ka o be a nyaka go itirela dipheto. O be a sa nyake go botšwa gore a dire eng.”—Celine, kua Brazil.

“Morwedi wa rena o be a se sa hlwa a nyaka gore re mo gokarele goba re mo atle.”—Andrew, kua Canada.

“Bašemane ba rena ba ile ba thoma go ba bogale kudu. Go e na le gore ba amogele dipheto tša rena, ba be ba di belaela e bile ba ngangišana le rena ka tšona.”—Steve, kua Australia.

“Morwedi wa-ka o be a fihla maikwelo a gagwe. O be a dula a ikarotše gomme a selekega ge ke be ke leka go mo tutueletša go ntšha sa mafahleng.”—Joanne, kua Mexico.

“Bana ba rena ba ile ba thoma go ba le diphiri gomme ba be ba nyaka go ba noši ka mo go oketšegilego. Gantši ba be ba kgetha go ba le bagwera ba bona go e na le go ba le rena.”—Daniel, kua Philippines.

Bjalo ka motswadi yo a nago le mofsa yo a lego mahlalagading, o ka hwetša gore tše dingwe tša dilo tše di boletšwego ka mo godimo di a go diragalela. Ge e ba go le bjalo, kgonthišega gore go a kgonega gore o kwešiše “motho o šele yo” yoo o dulago le yena, morwa goba morwedi wa gago yo a lego mahlalagading. Beibele e ka go thuša. Bjang?

Bohlale le Temogo

Seema sa Beibele se re: ‘Hwetša bohlale, o tlelwe ke temogo.’ (Diema 3:13) Dika tše ka bobedi di bohlokwa ge o dirišana le mofsa yo a lego mahlalagading. Go nyakega gore o be le temogo e le gore o se ke wa kwešiša feela boitshwaro bja gagwe eupša o lemoge seo ge e le  gabotse ngwana wa gago a lebeletšanego le sona. Le gona go nyakega gore o be le bohlale e le gore o arabele ka tsela yeo e tlago go tšwela pele e hlahla ngwana wa gago gore e be motho yo mogolo yo a nago le boikarabelo.

O se ke wa forwa ke seo go bonagalago eka ke sekgoba seo se tšwelago pele se gola magareng ga gago le morwa goba morwedi wa gago. Taba ke gore bafsa bao ba lego mahlalagading ba tsoma—gaešita le go nyaka—gore batswadi ba bona ba kgathe tema nywageng ye e nago le ditlhohlo. Temogo le bohlale di ka go thuša bjang gore o nee tlhahlo e bjalo?

[Mongwalo wa tlase]