Go Godiša Bafsa Bao ba Lego Mahlalagading​—Karolo Yeo e Kgathwago ke Bohlale

“Re leka ka matla go hlahla morwa le morwedi wa rena, eupša go bonagala eka re ba omanya ka selo se itšego ka mehla. Ka dinako tše dingwe re ipotšiša ge e ba re aga boikholofelo bja bona goba re bo senya. Go leka-lekanya dilo tše ka bobedi ke tlhohlo e le ruri.”—George le Lauren, kua Australia.

GA GO bonolo go godiša mofsa yo a lego mahlalagading. Ka ntle le go lebeletšana le ditlhohlo tše difsa tšeo ngwana wa bona a di bakago, batswadi ba ka swanelwa ke go lebeletšana le dipelaelo tša mabapi le taba ya gore morwa goba morwedi wa bona o a gola. Tate wa kua Australia yo a bitšwago Frank, o re: “Go tseba gore bana ba rena ba tla tloga gae ka letšatši le lengwe ke taba e bohloko. Ga go bonolo go amogela gore ga o sa ba laola.”

Lia yo a tsopotšwego pejana lelokelelong le la dihlogo o dumela seo. O re: “Go thata go swara morwa wa-ka bjalo ka mofsa yo a godilego, ka gobane ke sa mo lebelela e le mošemanyana wa-ka. Go bonagala eka ke maabane ge a be a e-ya sekolong ka lekga la pele!”

Le ge go ka ba thata go amogela seo, bafsa bao ba lego mahlalagading ga e sa le bana ba banyenyane. Ke ‘bana bao ba tlwaeletšwago go ba batho ba bagolo’ gomme batswadi ke barutiši le bathekgi ba bona. Lega go le bjalo, go etša ge George le Lauren ba boletše ka mo godimo, batswadi ba na le bobedi matla a go aga le go senya go ikholofela ga ngwana. Batswadi ba ka hwetša bjang teka-tekano ya maleba? Beibele e na le keletšo yeo e thušago. (Jesaya 48:17, 18) Anke re hlahlobeng mehlala e itšego.

Poledišano e Botse e Bohlokwa

Beibele e botša Bakriste gore e be bao ba “akgofago mabapi le go kwa” le bao ba “diegago mabapi le go bolela.” (Jakobo 1:19) Gaešita le ge keletšo ye e le e botse ge motswadi a dirišana le bana ba nywaga le ge e le efe, go kwa—goba go theetša—ke gabohlokwa kudu-kudu ge go dirišanwa le bafsa bao ba lego mahlalagading. Le gona go ka nyaka maiteko a magolo kudu.

Peter, e lego tate wa kua Brithania o re: “Ke ile ka swanelwa ke go kaonefatša bokgoni bja-ka bja poledišano ge barwa ba-ka ba tsena nywageng ya mahlalagadi. Ge e be e sa le bašemanyana, nna le mosadi wa-ka re be re ba botša gore ba dire eng gomme ba be ba re theetša. Eupša ka ge gona bjale ba godile, re swanelwa ke go beelana mabaka le bona, re boledišane ka dilo gomme re ba dumelele gore ba diriše bokgoni bja bona bja go nagana gore ba rarolle mathata. Ka bokopana, re swanetše go ba fihlelela dipelo.”—2 Timotheo 3:14.

Go theetša ke gabohlokwa, kudu-kudu ge go e-na le phapano. (Diema 17:27) Danielle, yo a dulago kua Brithania, o hweditše se e le therešo tabeng ya gagwe. O re: “Ke be ke e-na le bothata le yo mongwe wa barwedi ba-ka mabapi le kamoo a bego a nkaraba ge ke be ke mo kgopela gore a dire selo le ge e le sefe. Eupša o ile a mpotša gore ka mehla ke be ke mo kgadimola e bile ke mo laela gore a dire dilo. Re ile ra rarolla bothata bjo ka go boledišana le go theetšana e le ka kgonthe. O ile a hlalosa tsela yeo ke boledišanago le yena ka yona le kamoo e mo dirago gore a ikwe ka gona, gomme le nna ka mo hlalosetša seo ke se naganago le kamoo ke ikwago ka gona.”

Danielle o ile a hwetša gore go ba yo a “akgofago mabapi le go kwa” go mo thušitše go lemoga modu wa bothata. O re: “Ga bjale ke leka go se felele morwedi wa-ka pelo gomme ke leka go boledišana le yena feela ge ke se ka galefa.” O okeditše ka gore: “Tswalano ya rena e a kaonefala.”

Diema 18:13 e re: “Mo-fetola-lentšu à sešo a kwišiša, ó tlo dira tša bošilo tša mo iša dihlonyeng.” Greg, tate wa kua Australia, o hweditše seo e le therešo. O re: “Ka dinako tše dingwe diphapano magareng ga rena le bana ba rena di tšwelela ge  nna le mosadi wa-ka re akgofela go ba laela gore ba dire eng go e-na le go ba theetša le go amogela tsela yeo ba ikwago ka yona pele. Gaešita le ge re sa dumelelane ka mo go feletšego le tsela yeo ba itshwarago ka yona, re hweditše gore ke gabohlokwa go ba dumelela go hlalosa maikwelo a bona pele re ka ba phošolla ka tsela le ge e le efe goba go ba nea keletšo.”

Ba Swanetše go Newa Tokologo e Kaaka’ng?

Mohlomongwe se sengwe sa dibaki tše dikgolo tša diphapano magareng ga batswadi le bafsa bao ba lego mahlalagading ke taba ya tokologo. Mofsa yo a lego mahlalagading o swanetše go newa tokologo e kaaka’ng? Tate yo mongwe o re: “Ka dinako tše dingwe ke nagana gore ge nka nea morwedi wa-ka tokologo e nyenyane, o tla nyaka go lokologa ka mo go feletšego.”

Go molaleng gore go nea bafsa tokologo e se nago meedi go tla ba le mafelelo a mabe. Ka kgonthe Beibele e lemoša gore “mošemana-moipuši ó leša mm’axwe dihlong.” (Diema 29:15) Bafsa ba nywaga le ge e le efe ba nyaka tlhahlo e tiilego gomme batswadi ba swanetše go ba nea lerato eupša ba diriše melao ya ka gae ka go se kgaotše. (Baefeso 6:4) Ka nako e swanago, bafsa ba swanetše go newa tokologo e itšego e le gore ba kgone go dira diphetho tše bohlale ge ba godile.

Ka mohlala, nagana kamoo o ithutilego go sepela ka gona. Sa pele, ge o be o sa le lesea, o be o kukwa e bile o pepulwa. Ge nako e dutše e e-ya, o ile wa thoma go abula ke moka wa sepela. Ke therešo gore go kgona go sepela go ka ba kotsi ngwaneng yo monyenyane. Ka gona batswadi ba gago ba ile ba dula ba go beile leihlo gomme go ka direga gore ba ile ba go thibela gore o se ye mafelong a kotsi a bjalo ka manamelo a ka  ntlong. Lega go le bjalo, ba ile ba go dumelela gore o itshepelele e le gore ge nako e dutše e e-ya—ka morago ga go wa ka makga a mmalwa mo go sa phemegego—o ka ithuta go sepela ka bolokologi.

Go hwetša tokologo go akaretša mogato o swanago. Sa pele, go ba bjalo ka ge eka batswadi ba kuka le go pepula bana ba bona. Ba dira se ka go ba direla diphetho. Ka morago, ge bana ba bontšha gore ba godile ka tekanyo e itšego, batswadi ba ba dumelela go abula ka tsela ya seswantšhetšo. Ba ba dumelela go itirela dikgetho tše itšego. Nakong ye ka moka, ba ba beetše dithibelo gomme dithibelo tšeo di šireletša bafsa dikotsing. Ge bana ba bona ba gola, batswadi ba ba dumelela go itshepelela ka tsela ya seswantšhetšo. Ka gona, ge ba e-ba batho ba bagolo, ba tla ba ba kgona go ‘rwala morwalo wa bona’ ka mo go feletšego.—Bagalatia 6:5.

Go Ithuta Mohlaleng wa Beibele

Go bonala eka batswadi ba Jesu ba ile ba mo nea tokologo e itšego ge e be e sa le mofsa yo a sego a hlwa a tsena mahlalagading, eupša ga se a ka a e diriša gampe. Go e na le moo, o ile a “tšwela pele a ikokobeleditše” batswadi ba gagwe ge “a tšwela pele a gatela pele bohlaleng le go goleng mmeleng le ka go kgahla Modimo le batho.”—Luka 2:51, 52.

Bjalo ka motswadi, o ka ithuta mohlaleng wo gomme wa nea bana ba gago tokologo e oketšegilego ge ba ipontšha e le bao ba ka e dirišago gabotse. Ela hloko seo batswadi ba bangwe ba se bolelago mabapi le diphihlelo tša bona tabeng ye.

“Ke tlwaetše go tšea karolo kudu medirong ya bana ba-ka. Ka morago, ke ile ka ba ruta melao ya motheo gomme ka ba tlogelela gore ba itirele diphetho ba diriša seo ba ithutilego sona. Ka morago ga moo, ke ile ka lemoga gore ba thomile go naganišiša ka kelohloko ka diphetho tša bona.”—Soo Hyun, kua Korea.

“Nna le monna wa-ka re dula re belaela ka go nea bana ba rena tokologo e oketšegilego, eupša ga se ra dumelela se gore se thibele bana ba rena go diriša gabotse tokologo yeo ba e hweditšego ka tshwanelo.”—Daria, kua Brazil.

“Ke hweditše e le gabohlokwa go reta morwa wa-ka yo a lego mahlalagading ka baka la tsela e botse yeo a dirišago tokologo yeo ke mo neago yona. Le nna ke dira seo ke mo kgopelago gore a se dire. Ka mohlala, ke mmotša gore ke ya kae le gore ke ya go dira eng. Ge e ba ke šiiwa ke nako, ke a mo tsebiša.”—Anna, kua Italy.

“Lapeng la rena re gatelela taba ya gore tokologo ga se selo seo barwa ba rena ba nago le tshwanelo ya go se hwetša, eupša ke selo seo ba swanetšego go ipontšha ba ka se newa.”—Peter, kua Brithania.

Go Lebeletšana le Ditla-morago

Beibele e re: “Ké mo xo botse, monna xe a rwala yoko è sa le e mofsa.” (Dillo tša Jeremia 3:27) Tsela e nngwe e kaone kudu yeo mofsa a ka rwalago joko ya boikarabelo ke ya go ithuta ka phihlelo therešo ya mantšu a rego: “Se sengwe le se sengwe seo motho a se bjalago, ke sona seo a tlago go se buna.”—Bagalatia 6:7.

 Mohlomongwe e le ka maikemišetšo a mabotse, batswadi ba bangwe ba šireletša bana ba bona bao ba lego mahlalagading ditla-moragong tša ditiro tša bošilo. Ka mohlala, a re re morwa o tsena dikolotong ka go diriša tšhelete gampe. O tla ithuta thuto efe ge e ba tatagwe le mmagwe ba mo lefelela sekoloto seo? Ka lehlakoreng le lengwe, mošemane o tla ithuta thuto efe ge e ba batswadi ba gagwe ba mo thuša go hwetša leano leo le tlago go mo thuša go lefelela sekoloto seo?

Batswadi ga ba thuše bana ba bona ge ba palelwa ke go ba dumelela go ithuta ditla-morago tša boitshwaro bjo bo bontšhago go hloka boikarabelo. Go e na le gore ba ba lokišeletše bakeng sa go ba batho ba ba godilego, se se ba ruta gore go tla dula go e-na le motho yo a itšego yo a tlago go ba ntšha mathateng, go lokiša ditla-morago tša diphošo tša bona le go fihla diphošo tša bona. Ke gabohlokwa kudu go nea bafsa bao ba lego mahlalagading sebaka sa go buna seo ba se bjetšego le go ithuta kamoo ba ka rarollago mathata a bona. Se ke sebopego sa bohlokwa sa gore ba ‘tlwaetše matla a bona a go hlatha, ba kgethologanye se se nepagetšego le se se fošagetšego.’—Baheberu 5:14.

“Motho yo a Fetogago le yo a Golago”

Ga go pelaelo gore batswadi bao ba nago le bafsa bao ba lego mahlalagading ba lebeletšane le modiro o thata. Ka dinako tše dingwe, ba tla lla ka baka la kgakanego ge ba dutše ba katanela go godiša bana ba bona “ka tayo le tlhahlo ya monagano ya Jehofa.”—Baefeso 6:4.

Mafelelong, go ba motswadi yo a atlegago ga go bolele go laola, eupša go bolela go ruta le go tiišetša ditekanyetšo tše di swanetšego. (Doiteronomio 6:6-9) Na go bonolo go dira se? Aowa. Greg yo a tsopotšwego pejana o re: “Re dirišana le motho yo a fetogago le yo a golago. Se se bolela gore re swanetše go tšwela pele re tseba motho yoo le go itumelelanya le yena.”

Katanela go diriša melao ya motheo ya Beibele yeo e ahla-ahlilwego sehlogong se. E ba le teka-tekano go seo o se letetšego baneng ba gago. Eupša o se ke wa hlokomologa karolo ya gago bjalo ka motho yoo a ba beelago mohlala. Beibele e re: “Ngwana mo eteletše tsela y’axwe ké mo a tl’o xo tšofala à sa ka a e lahla.”—Diema 22:6.

[Seswantšho go letlakala 7]

Ba dumelele go hlalosa maikwelo a bona pele o ba phošolla ka tsela le ge e le efe goba go ba nea keletšo

[Ntlhakgolo go letlakala 7]

Go hwetša tokologo go swana le go ithuta go sepela—ke mogato wo o diregago ganyenyane-ganyenyane

[Tlhaloso ya seswantšho go letlakala 8]

Batswadi ba swanetše go ruta bana ba bona go ba ba ikarabelago

[Lepokisi go letlakala 7]

“Go Tiiša Matla a Gago a Taolo”

Taba ya gore mofsa wa gago yo a lego mahlalagading a ka selekišwa ke dithibelo tšeo o mmeelago tšona ga e bolele gore o swanetše go kgaotša go diriša matla a gago a taolo. Gopola gore bafsa bao ba lego mahlalagading ga ba na phihlelo bophelong le gore ba sa dutše ba nyaka tlhahlo.—Diema 22:15.

Ka pukung ya gagwe ya New Parent Power! John Rosemond o ngwala gore: “Go bonolo gore batswadi ba ikwe ba gateletšwa ke maikwelo a feto-fetogago a bana ba bona gomme ba thome go ba dumelela go ba le boikarabelo bjo bo oketšegilego bjoo ba ka se kgonego go bo rwala e le ge ba phema go ngangišana le bona. Eupša batswadi ba swanetše go dira se se fapanego le seo. Ye ke nako ya gore le tiiše matla a lena a taolo go e na le go dumelela bana ba lena go a hlokomologa. Gaešita le ge go se pelaelo gore ba tla gana kgopolo ye, e sa dutše e le nako ya gore bana ba tsebe gore batswadi ba bona ba boemong bjo bobotse bja go ba hlahla.”

[Lepokisi go letlakala 9]

Go ba Nea Tokologo e Oketšegilego

Gantši bafsa bao ba lego mahlalagading ba nyaka tokologo e oketšegilego go feta yeo ba swanetšego go e newa. Ka nako e swanago, gantši batswadi ba bangwe ba nea bafsa tokologo e nyenyane go feta yeo e ba swanetšego. Go na le teka-tekano magareng ga maemo a ka bobedi. O ka e hwetša bjang? Sa pele, o ka rata go naganišiša ka lelokelelo le le lego ka mo tlase. Ke dikarolong dife tšeo go tšona morwa goba morwedi wa gago a itshwarago ka tsela yeo e bontšhago gore o na le boikarabelo?

□ Go kgetha bagwera

□ Go kgetha diaparo

□ Go diriša tšhelete ka bohlale

□ Go boa gae ka nako e beilwego

□ Go phetha mediro ya ka gae

□ Go phetha mediro ya sekolo

□ Go kgopela tshwarelo ge a dirile diphošo

□ Le go tše dingwe․․․․․․․․․․․․․․․․․․․․․․․․․․․․․․․․․․․․

Ge e ba mofsa wa gago yo a lego mahlalagading a šetše a bontšha go gola dikarolong tše dintši tše di lego ka mo godimo, ke ka baka la’ng o sa nagane ka ditsela tše itšego tšeo ka tšona o ka mo neago tokologo e oketšegilego?

[Seswantšho go letlakala 7]

Ba dumelele go hlalosa maikwelo a bona pele o ba phošolla ka tsela le ge e le efe goba go ba nea keletšo

[Seswantšho go letlakala 8, 9]

Ge e be e sa le mofsa yo a sego a hlwa a tsena mahlalagading, Jesu o ile a newa tokologo e itšego