Go Godiša Bafsa Bao ba Lego Mahlalagading—Karolo Yeo e Kgathwago ke Temogo
Go Godiša Bafsa Bao ba Lego Mahlalagading—Karolo Yeo e Kgathwago ke Temogo
Akanya o etetše naga e šele gomme o sa kgone go bolela leleme la moo. Ga go pelaelo gore go be go tla ba thata go boledišana le batho ba moo—eupša seo e be e ka se be selo seo se sa kgonegego ka mo go feletšego. Ka mohlala, pukuntšu yeo e dirišago maleme a mabedi e ka go thuša go ithuta dipolelwana tša motheo tša leleme leo. Goba mohlomongwe motho yo mongwe a ka fetolela seo batho ba bangwe ba se bolelago e le gore o ba kwešiše—gomme le bona ba go kwešiše.
KA DINAKO tše dingwe, batswadi bao ba godišago bafsa bao ba lego mahlalagading ba ka ikwa eka ba boemong bjo bo swanago. Go fo swana le leleme lešele, go kwešiša boitshwaro bja bafsa bao ba lego mahlalagading go ka ba thata, eupša ga se selo seo go sa kgonegego go se kwešiša. Tharollo ke gore batswadi ba leke go kwešiša seo se diregago nakong ye ya go gola, yeo ka dinako tše dingwe e kgahlišago eupša gantši e gakantšha.
Mabaka ao a Tutueletšago Boitshwaro bja Bona
Go nyaka ga mofsa go ikemela ga se ka mehla e bago leswao la borabele. Gopola gore Beibele e a dumela gore ge nako e dutše e e-ya, “monna ó tlo tloxêla tata’xwê le mma’xwê.” (Genesi 2:24) E le gore ba itokišeletše boikarabelo bja ge e le batho ba bagolo, go nyakega gore bafsa ba hwetše bonyenyane phihlelo e itšego ya go dira diphetho.
Ela hloko seo e ka bago e le sebaki sa boitshwaro bjoo bo lemogilwego ke batswadi bao ba tsopotšwego sehlogong se se fetilego.
Lia wa kua Brithania o llile ka gore: “Gatee-tee morwa wa-ka o ile a thoma go kgodišega ka dikgopolo tša gagwe le go belaela matla a rena a taolo.”
Ka go swana le bana ba banyenyane, bafsa bao ba lego mahlalagading ba botšiša leboelela gore, “Ke ka baka la’ng?” Lega go le bjalo, ga bjale karabo e kopana le e bonolo e ka no se be e lekanego. Ke’ng seo se fetogilego? Moapostola Paulo o ngwadile gore: “Ge ke be ke le ngwana, ke be ke . . . eleletša bjalo ka ngwana.” (1 Bakorinthe 13:11) Ge bafsa ba gola bokgoning bja bona bja go nagana, ba nyaka ditlhlaloso tše oketšegilego tše di kgodišago e le gore ‘matla a bona a go hlatha’ a ka tlwaetšwa.—Baheberu 5:14.
John wa kua Ghana o itše: “Barwedi ba rena ba ile ba thoma go tshwenyega kudu ka seo ba bangwe ba se naganago ka bona, kudu-kudu ka ponagalo ya bona.”
Go sa šetšwe gore seo se direga e sa le ka pela, go fetile nako goba “ka nako e swanetšego,” go gola ka pela mo go sepedišanago le lebaka la go khukhuša go dira gore bafsa ba bantši ba tshwenyege ka mo go feteletšego ka ponagalo ya bona. Tsela e mpsha yeo mebele ya bona e lebelegago ka yona e ka dira gore banenyana ba thabe goba ba nyame—goba maikwelo ao ka bobedi. Ge o kopanya go lemoga ga bona gore ba na le dikemola—le go lemoga ga bona gore go na le ditlolo tša go ikgabiša—go ba bonolo go lemoga lebaka leo ka lona bafsa ba fetšago nako e ntši ba le seiponeng go feta yeo ba e fetšago ba bala dipuku tša sekolo.
Daniel wa kua Philippines o hlalositše gore: “Bana ba rena ba ile ba thoma go ba le diphiri gomme ba be ba nyaka go ba noši ka mo go oketšegilego. Gantši ba be ba kgetha go ba le bagwera ba bona go e na le go ba le rena.”
Go boloka sephiri go ka ba kotsi. (Baefeso 5:12) Lega go le bjalo, go ba noši ke selo se se fapanego. Gaešita le Jesu o ile a bona bohlokwa bja go nyaka ‘lefelo le le lego lekatana gore a be noši.’ (Mateo 14:13) Ge bafsa ba dutše ba gola, le bona ba nyaka go ba noši—gomme ba nyaka gore batho ba bagolo ba hlomphe seo. Tekanyo e itšego ya go ba noši e thuša bafsa go naganišiša dilo gabotse—bokgoni bja bohlokwa bjoo bo tlago go ba thuša ge e šetše e le batho ba bagolo.
Ka mo go swanago, go ithuta go gwerana le batho ba bangwe ke karolo ya go gola. Ke therešo gore “ditlwaelano tše mpe di senya mekgwa e holago.” (1 Bakorinthe 15:33) Lega go le bjalo, ka nako e swanago, go bjalo ka ge Beibele e bolela gore: “Moxwêra ké moratwa wa ka mehla; ké ngwan’ešo e a ntswáletšwexo wa mohla wa tlalêlô.” (Diema 17:17) Go ithuta kamoo re ka bago le segwera se sebotse le go se boloka ke bokgoni bja bohlokwa bjoo motho a tlago go dula a e-na le bjona go ba go fihla e e-ba motho yo mogolo.
Ge ba lebeletšane le maemo le ge e le afe ao a lego ka mo godimo, batswadi ba tla dira gabotse gore ba be le temogo e le gore ba pheme go se kwešiše boitshwaro bja bafsa ba bona bao ba lego mahlalagading. Ke therešo gore go ba le temogo go swanetše go sepedišana le bohlale, e lego bokgoni bja go arabela boemong bjo itšego ka tsela yeo e tlago go ba le mafelelo a makaone kudu. Batswadi bao ba nago le bafsa bao ba lego mahlalagading ba ka dira seo bjang?
[Ntlhakgolo go letlakala 5]
Ge bafsa ba gola bokgoning bja bona bja go nagana, ba nyaka ditlhlaloso tše oketšegilego tše di kgodišago tša melao ya ka lapeng