“Go Hlahlwa ke Moya wa Modimo”

Kopano ya Selete ya Dihlatse tša Jehofa

▪ DIKOPANO tše tše dikete-kete tša selete tša matšatši a mararo, tšeo di thomilego United States mafelo-bekeng a May 23-25, di tla swarwa dikgweding tše tlago metse-megolong e dikete go dikologa lefase. Ka 2006, batho ba fetago 11 724 000 ba bile gona dikopanong tše bjalo tša selete tše 3 400!

Mafelong a mantši lenyaga, mananeo a tla thoma ka 9:20 a.m. ka mmino letšatšing le lengwe le le lengwe. Sehlogo sa Labohlano, seo se theilwego go Johane 16:13 se re “Moya . . . O tla le Hlahla Therešong ka Moka.” E nngwe ya dipolelo tša mathomo ke e nago le sehlogo se se rego “Ke ka Baka La’ng o Swanetše ‘go Hlahlwa ke Moya wa Modimo’?” le e rego “Moya o Mokgethwa—O a Šoma Tlholong!” Tšhiedišano e nago le sehlogo se se rego “Bahlanka ba Botegago ba Bogologolo—Ba be ba Hlahlwa ke Moya wa Modimo” e tla akaretša dikarolo tša “Mehleng ya Moše,” “Mehleng ya Baahlodi” le “Lekgolong la Pele la Nywaga.” Polelo ya thwadi e nago le sehlogo se se rego “Karolo ya Moya o Mokgethwa go Phethagatšweng ga Morero wa Jehofa” e tla phetha lenaneo la mesong.

Polelo ya mathomo mathapameng a Labohlano ke e nago le sehlogo se se rego “Dikarabo tša Dipotšišo Mabapi le Moya o Mokgethwa,” yeo e tlago go latelwa ke dipolelo tšeo di nago le dihlogo tše di rego “Moya o Nyakišiša Dilong . . . tše di Tseneletšego tša Modimo” le “E-bang Bakwi le Badiri ba Lentšu la Modimo.” Tšhiedišano e nago le sehlogo se se rego “Bafsa—Sepelang ka Moya o Mokgethwa!” e tla akaretša dikarolo tše di rego “Sekolong,” “Mošomong,” “Ka Lapeng,” “Ka Phuthegong,” “Medirong ya Boithabišo” le “Ge le le Noši.” Lenaneo le tla phetha ka polelo e nago le sehlogo se se rego “Bafsa—Šireletšang Tswalano ya Lena le Jehofa,” yeo e tlago go ba thuša go dira bjalo.

Sehlogo sa lenaneo la Mokibelo se re “‘Go Bjalela Moya’” gomme se theilwe go Bagalatia 6:8. Lenaneo la mesong le tla akaretša tšhiedišano ya dipolelo tše tharo yeo e nago le sehlogo se se rego “Go Hlahlwa ke Moya wa Modimo Bodireding bja Rena.” Lenaneo le tla phetha ka polelo ya kolobetšo, yeo ka morago ga yona bao ba swanelegago ba tlago go kolobetšwa.

Polelo ya mathomo mathapameng a Mokibelo yeo e nago le sehlogo se se rego “Bangwadi ba Beibele—‘Ba be ba Išwa ke Moya o Mokgethwa,’” e tla latelwa ke tšhiedišano ya dipolelo tše hlano yeo e nago le sehlogo se se rego “Go Matlafatšwa ke Moya wa Modimo Bakeng sa” “Go Lwantšha Diteko,” “Go Lebeletšana ka Katlego le go Lapa le Manyami,” “Go Ema re Tiile Kgahlanong le Tlaišo,” “Go Ganetša Kgatelelo e Mpe ya Dithaka” le “Go Kgotlelela Mathata.” Lenaneo le tla phetha ka polelo e nago le sehlogo se se rego “Itoteng Leratong la Modimo.”

Lenaneo la mesong ya Sontaga le godiša sehlogo se se rego “Tšwelang Pele le Sepela ka Moya” seo se theilwego go Bagalatia 5:16. Tšhiedišano ya dipolelo tše senyane yeo e nago le sehlogo se se rego “Hlagolela ‘Dienywa tša Moya’” e ahla-ahla sebopego se sengwe le se sengwe sa seenywa sa moya seo go bolelwago ka sona go Bagalatia 5:22, 23. Polelo ya phatlalatša yeo e nago le sehlogo se se rego “Hwetša Ditšhegofatšo ka Kgoši ya Jehofa Yeo e Hlahlwago ke Moya!” e tla phetha lenaneo la mesong. Karolo e kgethegilego ya lenaneo la thapama ke terama ya moaparo wa mehleng ya Beibele yeo e nago le sehlogo se se rego “O se ke wa Tlogela Lerato le o Bego o E-na le Lona Pele.” E bontšha boemo bja kgopolo le maemo ao mohlomongwe a bego a le gona gare ga Bakriste bofelong bja lekgolo la pele la nywaga. Kopano e phetha ka polelo e nago le sehlogo se se rego “Go Hlankela ka Potego le Mokgatlo wa Jehofa o Hlahlwago ke Moya.”

Dira dithulaganyo gona bjale e le gore o be gona. E le gore o hwetše lefelo leo le lego kgaufsi le wena, e-ya Holong ya Mmušo ya Dihlatse tša Jehofa ya lefelong la geno goba o ngwalele bagatiši ba makasine wo.